Hwilas Tokyn

Mark 8:11-13; Luk 12:54-56

1Ha'n Fariseow ha'n Sadukeow a dheuth dhodho, ha rag y brevi i a wovynnas orto may tiskwettha dhedha tokyn a nev. 2Ev a worthybis dhedha ow leverel,16:2 War-lergh re a'n dornskrifow nyns usi omma an geryow dhiworth Pan vo bys yn diwedh gwers 3. ‘Pan vo an gorthugher devedhys, hwi a lever, “Teg vydh an gewer, rag rudh yw an ebron”; 3hag y'n myttin, “Hager-awel y fydh hi hedhyw rag an ebron yw rudh ha tewl.” Hwi a woer dissernya enep an ebron, mes a ny yllowgh dissernya toknys an termynyow? 4Henedh drog hag avoutrek a hwila tokyn, mes ny vydh tokyn res dhodho saw tokyn Yona.’ Hag ev a's gasas ha mos yn-kerdh.

Goell an Fariseow ha'n Sadukeow

Mark 8:14-21

5Ha pan o an dhyskyblon devedhys dhe'n tu arall, i a ankovsa dri bara. 6Ha Yesu a leveris dhedha, ‘Omwithewgh ha bedhewgh war a woell an Fariseow ha'n Sadukeow.’ 7Hag i a resnas yntredha aga honan ha leverel, ‘Hemm yw drefenn na dhresen bara.’ 8Ow merkya henna, Yesu a leveris, ‘A hwi a voghes fydh, prag y hwrewgh hwi resna yntredhowgh y vos drefenn na dhresowgh bara? 9A ny gonvedhowgh hwath, na perthi kov a'n pymp torth rag an pymp mil ha pygemmys kanstellas a gemmersowgh yn-bann? 10Nag a'n seyth torth rag an peswar mil ha pygemmys kanstellas a gemmersowgh yn-bann? 11Fatell yw na gonvedhowgh na gewsis vy dhywgh a-dro dhe vara? Mes bedhewgh war a woell an Fariseow ha'n Sadukeow.’ 12Ena i a gonvedhas na leveris ev dhedha bos war a woell bara, mes a dhyskas an Fariseow ha'n Sadukeow.

Peder a Avow Yesu dhe Vos an Krist

Mark 8:27-30; Luk 9:18-21

13Pan dheuth Yesu dhe rannvro Sesarea Filippi, ev a wovynnas orth y dhyskyblon ow leverel, ‘Piw y lever tus, Mab an den dhe vos?’16:13 Piw y lever tus, Mab an den dhe vos? War-lergh re a'n dornskrifow Piw a lever tus my, Mab an den, dhe vos? 14Yn-medhons, ‘Re anedha, Yowann Besydhyer, re erell Elias, hag erell Yeremia, po onan a'n brofoesi.’ 15Yn-medh ev dhedha, ‘Mes piw y leverowgh hwi ow bos evy?’ 16Ha Simon Peder a worthybis ha leverel, ‘Ty yw an Krist, Mab an Duw bew.’ 17Ha Yesu a worthybis ha leverel dhodho, ‘Gwynn dha vys, Simon mab Yona, rag kig ha goes ny dhiskudhas henna dhis, mes ow Thas eus y'n nevow. 18Ha my a lever dhis, ty yw Peder ha war an garrek ma y trehavav ow eglos, ha porthow ifarn ny wra hy thryghi. 19Ha my a re dhis alhwedhow gwlaskor nev, ha pypynag oll a gelmi war an nor a vydh kelmys y'n nevow, ha pypynag oll a dhigelmi war an nor a vydh digelmys y'n nevow.’ 20Ena ev a erghis dhe'n dhyskyblon na wrellens derivas dhe dhenvyth ev dhe vos an Krist.16:20 an Krist: War-lergh re a'n dornskrifow Yesu an Krist.

Yesu a Dhargan y Vernans ha'y Dhasserghyans

Mark 8:31–9:1; Luk 9:22-27

21Alena rag, Yesu a dhallathas diskwedhes dh'y dhyskyblon y fia res dhodho mones dhe Yerusalem ha godhevel lies tra dhiworth an henavogyon ha'n bennoferysi ha'n skribys, ha bos ledhys, ha bos drehevys y'n tressa dydh. 22Ena Peder a'n kemmeras dhe denewen ha dalleth y geredhi ow leverel, ‘Bynner re bo, Arloedh! Ny hwyrvydh henna dhis!’ 23Mes ev a dreylyas ha leverel dhe Peder, ‘Ke a-dryv dhymm, Satnas; ty a wra ow sklandra, rag ny brederydh an taklow a Dhuw, mes an taklow a dus.’ 24Ena Yesu a leveris dh'y dhyskyblon, ‘Mar mynn nebonan dos war ow lergh, gwres ev nagha y honan ha kemmeres y grows yn-bann hag ow holya. 25Rag piwpynag a vynno sawya y vewnans, ev a'n kyll, ha piwpynag a gollo y vewnans a-barth dhymm, ev a'n kyv. 26Rag py les a vydh dhe dhen mar kwra ev gwaynya oll an bys mes ev a gyll y enev y honan? Po pandr'a wra den y ri yn attal rag y enev? 27Rag Mab an den a dal dos yn golewder y Das gans y eledh, hag ena attyli a wra ev dhe bubonan herwydh y ober.16:27 y ober: War-lergh re a'n dornskrifow y oberow. 28Yn hwir y lavarav dhywgh, yma re ow sevel omma na wra tastya mernans kyns i dhe weles Mab an den ow tos yn y wlaskor.’