An Moyha y'n Wlaskor

Mark 9:33-37; Luk 9:46-48

1Y'n eur na an dhyskyblon a dheuth dhe Yesu ha leverel, ‘Piw yw an moyha yn gwlaskor nev?’ 2Ha wosa ev dhe elwel flogh dhodho, ev a'n gorras yn aga mysk, 3hag yn-medh ev, ‘Yn hwir y lavarav dhywgh, marnas hwi a dreyl, ha dos ha bos avel fleghes, nyns ewgh kammenn vyth a-bervedh yn gwlaskor nev. 4Rakhenna piwpynag a omuvelhaho avel an flogh ma, ev yw an moyha yn gwlaskor nev, 5ha piwpynag a dhegemmerro unn flogh a'n par ma y'm hanow vy, ev a'm degemmer vy.

Temptyans dhe Begh

Mark 9:42-48; Luk 17:1-2

6‘Mes piwpynag a wrello dhe onan a'n re vyghan ma trebuchya, neb a grys ynnov, gwell via dhodho mar pe kregys men-melin meur a-dro dh'y gonna ha'y vos beudhys yn downder an mor. 7Go-ev an bys drefenn sklanderyow; rag res yw sklanderyow dhe dhos, mes go-ev an den may teu an sklander dredho! 8Mar kwra dha leuv po dha droes dhis trebuchya, trogh ev ha tewl ev dhiworthis; gwell yw dhis mos a-bervedh yn bewnans mans po evredhek ages ty dhe vos tewlys yn tan nevra a bys ha'th tiwleuv po dha dhewdroes genes. 9Ha mar kwra dha lagas dhis trebuchya, tenn e mes ha towl e dhiworthis; gwell yw dhis mos unnlagasek a-bervedh yn bewnans ages bos tewlys yn tan ifarn,18:9 yn tan ifarn: Greka y'n Gehenna a dan. ha'th tewlagas genes.

Parabolenn an Dhavas Kellys

Luk 15:3-7

10‘Gwaytyewgh na wryllowgh dispresya onan a'n re vyghan ma; rag yn-medhav dhywgh bos aga eledh y'n nevow pup-prys ow mires war fas ow Thas eus y'n nevow. 11Rag Mab an den a dheuth dhe selwel an dra yw kellys.18:11 Nyns usi gwers 11 yn re a'n dornskrifow. 12Pandr'a dybowgh hwi? Mar pydh gans den kans davas hag onan anedha gyllys yn stray a ny as ev an nownsek ha peswar-ugens war an menydhyow ha mos dhe hwilas an dhavas yw gyllys dhe stray? 13Ha mar hwyrvydh ev dh'y havoes, yn hwir y lavarav dhywgh, ev a'n jevydh moy a lowena warnedhi ages war an nownsek ha peswar-ugens nag ethons dhe stray. 14Yn kettellma nyns yw bodh agas18:14 agas: War-lergh re a'n dornskrifow agan. Tas y'n nevow bos onan a'n re vyghan ma kellys.

Broder Neb a Wra Kammweyth

Luk 17:3

15‘Mar kwrella dha vroder kamm er dha bynn, ke dhe dhiskwedhes dhodho y gammweyth yntredhowgh agas dew yn priva. Mar koslow orthis, ty re waynyas dha vroder; 16mes mar ny goslow, kemmer genes onan po dew arall may fo pub lavar destys dre anow dew po tri dustunier; 17ha mara skon ev dhedha, deriv an dra dhe'n eglos; ha mara skon ev hwath dhe'n eglos, ev bedhes dhiso avel pagan po toller.

18‘Yn hwir y lavarav dhywgh, pypynag oll a gelmowgh war an nor a vydh kelmys yn nev, ha pypynag a dhigelmowgh war an nor a vydh digelmys yn nev. 19Arta yn hwir y lavarav dhywgh, mar pydh dew ahanowgh unnverhes war an nor a-dro dhe neppyth oll a wovynnons, henna a vydh grontys dhedha gans ow Thas eus y'n nevow. 20Rag le may ma dew po tri kuntellys war-barth y'm hanow vy, ena yth esov yn aga mysk.’

Parabolenn an Gwas na Wrug Gava

21Ena Peder a dheuth ha leverel dhodho, ‘Arloedh, peskweyth y hwra ow broder pegha er ow fynn, ha my a av dhodho? Bys yn seyth gweyth?’ 22Yn-medh Yesu dhodho, ‘Ny lavarav dhis bys yn seyth gweyth, mes bys yn deg ha tri ugenskweyth seythgweyth. 23Rakhenna gwlaskor nev a vydh hevelebys dhe vyghtern a vynnas rekna y akont gans y gethwesyon. 24Ha pan dhallathas rekna, y feu dres dhodho kendoner a dheg mil dalent.18:24 dalent: Greka talanton. 25Hemma pan na'n jeva pygans dhe attyli, y vester a worhemmynnis may fe gwerthys keffrys ha'y wreg ha'y fleghes ha pup-tra oll a'n jeva ha'n gendon dhe vos attylys. 26An kethwas ytho a goedhas dhe'n dor a-ragdho, hag a bysis, “Gwra ow ferthi, ha my a attal dhis pup-tra.” 27Ha mester an kethwas na a gemmeras truedh anodho ha gava dhodho y gendon. 28Ha'n kethwas na ow mos alena a gavas onan a'y geswesyon neb o yn kendon dhodho a gans diner, hag ev a'n dalghennas orth y daga ha leverel, “Attal dha gendon.” 29Y geswas ytho a goedhas orth y dreys18:29 Yn re a'n dornskrifow nyns usi omma an geryow orth y dreys. ha pysi warnodho, “Gwra ow perthi, ha my a attal dhis.” 30Ev ny vynna, mes ev eth dh'y dewlel yn prison bys pan wre pe an gendon. 31Pan welas y geswesyon ytho an taklow a veu gwrys, i a's teva keudh bras, hag yth ethons ha derivas dh'aga mester pup-tra re bia gwrys. 32Ena y vester a'n gelwis ha leverel dhodho, “Ty gethwas drog, my a avas dhis oll an gendon na, rag ty dhe bysi warnav. 33A ny dalvia dhis ynwedh kemmeres truedh a'th keswas kepar dell gemmeris vy truedh ahanas jy?” 34Ha'y vester o serrys hag a'n daskorras dhe'n dormentorys bys pan wrella attyli dhodho oll an gendon. 35Yn kettellma ynwedh y hwra ow Thas a nev dhywgh hwi mar ny wrewgh gava kettep onan dh'y vroder a leun golonn.’