Devedhyans an Dus Fur

1Ha pan veu Yesu genys yn Bethlehem Yudi yn dydhyow myghtern Herod, awotta, tus fur a dheuth dhiworth an howldrevel dhe Yerusalem, 2ow leverel, ‘Ple'ma ev yw genys Myghtern an Yedhewon? Rag ni a welas y sterenn y'n howldrevel2:2 y'n howldrevel: Poowth yskynna. Ynwedh yn gwers 9. hag yth on ni devedhys dh'y wordhya.’ 3Pan wrug myghtern Herod klewes hemma, ev a veu troblys, hag oll Yerusalem ganso, 4ha wosa kuntell oll an bennoferysi ha skribys an bobel war-barth, ev a wovynnas orta ple fe Krist genys. 5Hag i a'n gorthybis, ‘Yn Bethlehem Yudi; rag yndellma y feu skrifys gans an profoes:

6“Ha ty, Bethlehem, pow Yuda,

nyns os mann an lyha yn mysk gwelhevin Yuda,

rag yn-mes ahanas y teu hembrenkyas

neb a wra bugelya ow fobel Ysrael.” ’

7Ena Herod, wosa gelwel an dus fur yn privedh, a wovynnas orta an termyn poran mayth omdhiskwedhas an sterenn. 8Hag ev a's dannvonas dhe Bethlehem, ha leverel, ‘Ewgh ha hwilewgh yn tiwysyk derivadow a-dro dhe'n flogh; ha pan y'n kevsowgh, dannvenewgh derivadow dhymm, mayth ylliv vy ynwedh dh'y wordhya.’ 9Ha wosa klewes an myghtern yth ethons yn-kerdh, hag awotta'n sterenn a welsons y'n howldrevel ow mos a-dheragdha bys pan dheuth ha sevel a-ugh an tyller mayth esa an flogh. 10Ha pan welsons an sterenn, i a lowenhas gans joy meur dres eghenn. 11Ha devedhys y'n chi i a welas an flogh gans Maria y vamm, hag i a goedhas dhe'n dor ha'y wordhya; hag owth igeri aga thresoryow, i a brofyas rohow dhodho, owr ha frankynkys ha myrr. 12Ha gwarnyes dre hunros na wrellens dehweles dhe Herod, i a omdennas dh'aga fow war fordh arall.

An Fo dhe Ejyp

13Wosa i dhe vos gyllys yn-kerdh, otta, el an Arloedh a omdhiskwedhas dhe Yosep dre hunros, ow leverel, ‘Sav yn-bann ha kemmer an flogh ha'y vamm ha fi dhe Ejyp ha bydh ena erna leverriv dhis; rag Herod a vynn hwilas an flogh rag y dhistrui.’ 14Ena ev a sevis yn-bann ha kemmeres an flogh ha'y vamm yn nos ha mos dhe Ejyp, 15hag yth esa ev ena bys vernans Herod, rag may fe kollenwys an dra kewsys gans an Arloedh der an profoes, ow leverel, ‘Yn-mes a Ejyp my re elwis ow mab.’

Ladhva an Fleghes Wiryon

16Ena Herod ow kweles ges dhe vos gwrys anodho gans an dus fur o meur serrys hag a dhannvonas ha ladha oll an fleghes esa yn Bethlehem hag yn oll an pow a-dro, a dhew vloedh ha le ages henna, herwydh an termyn a dhys'sa gans an dus fur. 17Y'n eur na y feu kollenwys an dra kewsys gans Yeremia an profoes, ow leverel,

18‘Lev a veu klewys yn Rama,

oelva ha galarow tynn,

Raghel owth oela rag hy fleghes

ha ny vynna bos konfortys, rag gyllys yns i.’2:18 rag gyllys yns i: Greka rag nyns esons i. Henn yw divres yns i, cf. Yer. 31:15.

An Dehwelyans yn-mes a Ejyp

19Wosa Herod dhe verwel, awotta, el a'n Arloedh a omdhiskwedhas dhe Yosep dre hunros yn Ejyp, 20ow leverel, ‘Sav yn-bann, ha kemmer an flogh ha'y vamm ha ke dhe bow Ysrael; rag marow yw an re a hwila bewnans an flogh.’ 21Hag ev a sevis ha kemmeres an flogh ha'y vamm hag a dheuth dhe bow Ysrael. 22Mes pan glewas bos Arghelaus ow reynya yn Yudi yn le y das Herod own a'n jevo a vones dhi, ha wosa bos gwarnys dre hunros ev a omdennas dhe'n rannvro Galile, 23hag ev eth dhe driga yn sita gelwys Nazareth may fe kollenwys an dra kewsys gans an profoes, ‘Ev a vydh henwys Nazaren.’