An Wonisysi y'n Winlann

1‘Haval yw gwlaskor nev dhe berghennek tir neb eth yn-mes a-varr myttin rag arveth oberwesyon rag y winlann. 2Ha wosa ev dhe vos unnverhes gans an oberwesyon rag unn diner20:2 diner: Greka denarion. orth an jydh, ev a's dannvonas yn y winlann. 3Hag ow mos yn-mes a-dro dhe'n tressa eur, ev a welas re erell esa ow sevel diweyth y'n marghasla, 4hag yn-medh ev dhedha, “Ewgh hwi ynwedh y'n winlann ha pypynag oll a vo ewn my a'n re dhywgh hwi.” 5Hag yth ethons. Arta ev eth yn-mes a-dro dhe'n hweghves ha'n nawves eur, hag a wrug y'n keth vaner na. 6Ha pan eth yn-mes a-dro dhe'n unnegves eur, ev a gavas re erell ow sevel diweyth20:6 War-lergh re a'n dornskrifow nyns usi omma an ger diweyth. hag ev a leveris dhedha, “Prag y hwrussowgh sevel omma oll an jydh diweyth?” 7Yn-medhons dhodho, “Drefenn na wrug denvyth agan arveth.” Yn-medh ev dhedha, “Ewgh hwi ynwedh y'n winlann.” 8Ha devedhys an gorthugher, arloedh an winlann a leveris dh'y vayli, “Galw an oberwesyon ha ro dhedha aga gober, ow talleth gans an re dhiwettha hag ena mos dhe'n re gynsa.” 9Pan dheuth an re a dhallathsa dhe'n unnegves eur, i a gavas pubonan unn diner. 10Ha'n re gynsa pan dheuthons a dybis y kaffens moy, hag i ynwedh a gavas pubonan unn diner. 11Ha wosa i dh'y gemmeres, i a grodhvolas war an perghennek 12ow leverel, “An re dhiwettha ma a wonedhas unn our ha ty a's gwrug kehaval dhyn ni neb re borthas begh an jydh ha'n toemmder.” 13Mes ev a worthybis dhe onan anedha ha leverel, “Koweth, ny wrav kamm dhis. A ny veusta unnverhes genev rag unn diner? 14Kemmer an pyth eus dhis, ha ke. My a vynn ri dhe'n diwettha ma avel dhiso jy. 15A ny'm beus kummyas dhe wul kepar dell vynnav gans ow fyth ow honan? Po yw dha lagas jy drog drefenn my dhe vos hel?” 16Yndellna an re dhiwettha a vydh kynsa, ha'n re gynsa diwettha.’

An Tressa Gweyth Yesu a Dhargan y Vernans ha'y Dhasserghyans

Mark 10:32-34; Luk 18:31-34

17Ha pan esa Yesu ow mos yn-bann dhe Yerusalem, ev a gemmeras an dewdhek a'n eyl tu, ha war an fordh ev a leveris dhedha, 18‘Otta, ni a yn-bann dhe Yerusalem, ha Mab an den a vydh daskorrys dhe'n bennoferysi ha dhe'n skribys, hag i a wra y dhampnya dhe'n mernans, 19ha'y dhaskorr dhe'n Jentilys dhe vos skornys ha skorjys ha krowsys, hag y'n tressa dydh ev a wra dasserghi.’

Govenek Jamys ha Yowann

Mark 10:35-45

20Ena y teuth dhodho mamm mebyon Zebede gans hy mebyon ha plegya dhe'n dor a-ragdho, ow hwilas neppyth dhiworto. 21Yn-medh ev dhedhi, ‘Pandr'a vynnydh?’ Yn-medh hi dhodho, ‘Gront mayth esettho ow dew vab evy, an eyl a'th parth dhyghow ha'y gila a'th parth kledh y'th wlaskor.’ 22Yesu a worthybis ha leverel, ‘Ny wodhowgh pandr'a wovynnowgh. A yllowgh hwi eva a'n hanaf a wrav vy eva anodho?’20:22 a wrav vy eva anodho? War-lergh re a'n dornskrifow a wrav vy eva anodho, ha bos besydhys gans an besydhyans mayth ov vy besydhys ganso. Yn-medhons dhodho, ‘Gyllyn.’ 23Yn-medh ev dhedha, ‘Hwi a wra eva a'm hanaf, mes esedha a'm parth dhyghow ha'm parth kledh, nyns eus dhymmo y ri, mes yma dhe seul a vo darbarys dhedha gans ow Thas.’ 24Henna pan glewsons an deg, serrys ens i orth an dhew vroder. 25Mes Yesu a's gelwis hag yn-medh ev, ‘Hwi a woer bos rewloryon an kenedhlow ow lordya warnedha, ha'n re vras ow kul maystri warnedha. 26Yndella ny vydh20:26 ny vydh: War-lergh re a'n dornskrifow nyns yw. hi yn agas mysk hwi; mes piwpynag a vynno bos meur yn agas mysk, ev bedhes agas servont, 27ha piwpynag a vynno bos kynsa, ev a vydh20:27 ev a vydh: War-lergh re a'n dornskrifow ev bedhes. agas kethwas, 28kepar dell na dheuth Mab an den dhe vos servys mes dhe servya, ha dhe ri y vewnans avel daspren rag lies.’

Dew Dhen Dhall

Mark 10:46-52; Luk 18:35-43

29Ha pan esens ow mos yn-mes a Yeriko, routh veur a'n siwyas. 30Hag awotta, dew dhen dhall a'ga esedh ryb an fordh; pan glewsons bos Yesu ow tremena, a armas, ow leverel, ‘Arloedh, kemmer truedh ahanan, ty Vab Davydh.’ 31Ha'n routh a's koskas may hwrellens tewel, mes i a armas dhe voy ow leverel, ‘Arloedh, kemmer truedh ahanan, ty Vab Davydh.’ 32Ena Yesu a sevis hag a elwis dhedha ha leverel, ‘Pandr'a vynnowgh orthiv dhe wul dhywgh?’ 33Yn-medhons dhodho, ‘Arloedh, agan dewlagas dhe vos igerys.’ 34Yesu a gemmeras truedh hag a dochyas aga dewlagas, ha desempis i a dhaskavas aga gweles hag a'n holyas.