Devedhyans Yesu dhe Yerusalem yn Trygh

Mark 11:1-11; Luk 19:28-38; Yow 12:12-19

1Ha pan dheuthons ogas dhe Yerusalem ha dos dhe Bethfage dhe'n menydh Oliv, ena Yesu a dhannvonas dew dhyskybel 2ow leverel dhedha, ‘Ewgh y'n dre a-dal dhywgh ha desempis hwi a gyv asen kelmys hag ebel gensi; gwrewgh aga digelmi ha'ga dri dhymmo. 3Ha mar lever nebonan neppyth dhywgh hwi, hwi a lever, “Yma edhomm dhe'n Arloedh anedha”; hag ev a's dannvon dison.’21:3 Yma edhomm dhe'n Arloedh anedha: Po Yma edhomm dhe'n Arloedh anedha, hag ev a's dastannvon dison. 4Hemma a hwarva may fe kollenwys an dra kewsys gans an profoes ow leverel,

5‘Lavar dhe vyrgh Sion,

Awotta dha vyghtern a dheu dhiso

klor hag esedhys war asen

ha war ebel, mab asen.’21:5 mab asen: Po mab skrubelenn.

6An dhyskyblon eth ha gul kepar dell worhemmynnsa Yesu dhedha, 7ha dri an asen ha'n ebel ha gorra warnedha aga mantelli hag ev a esedhas warnedha. 8Ha routh pur veur a lesas aga mantelli war an fordh, ha re erell a droghas skorrennow dhiworth an gwydh ha'ga lesa war an fordh. 9Ha'n routhow esa ow mos a-ragdho, ha'n re a'n siwya a armas ow leverel,

‘Hosanna dhe Vab Davydh,

Benniges yw neb a dheu yn hanow an Arloedh,

Hosanna y'n ughelder!’

10Hag ev ow tos a-bervedh yn Yerusalem, oll an sita a veu movyes hag a wovynnas, ‘Piw yw hemma?’ 11Ha'n routhow a worthybis, ‘Hemm yw an profoes Yesu, a Nazareth yn Galile.’

Glanhe an Tempel

Mark 11:15-19; Luk 19:45-48; Yow 2:13-22

12Ha Yesu a entras y'n tempel21:12 y'n tempel: War-lergh re a'n dornskrifow yn tempel Duw. hag a dewlis yn-mes oll an re esa ow kwertha hag ow prena y'n tempel hag ev a dhomhwelis moesow an arghansoryon hag esedhow an re esa ow kwertha kelemmi, 13hag yn-medh ev dhedha, ‘Skrifys yw, “Ow chi vy a vydh gelwys chi pysadow”, mes hwi a'n gwra fow ladron.’ 14Hag y teuth dhodho tus dhall hag evredhek y'n tempel hag ev a's yaghhas. 15Ha'n bennoferysi ha'n skribys pan welsons an marthusyon a wruga ha'n fleghes ow karma y'n tempel ow leverel, ‘Hosanna dhe vab Davydh’, yth ens i serrys, 16hag yn-medhons dhodho, ‘A glewydh pandr'a lever an re ma?’ Mes Yesu a leveris dhedha, ‘Klewav. A ny wrussowgh bythkweth redya hemma, “Yn-mes a anow fleghesigow ha'n re ow tena ty re ordenas gormola”?’

17Hag ev a's gasas ha mos yn-mes a'n sita dhe Bethani, hag ena ev a ostyas dres nos.

Molleth an Figbrenn

Mark 11:12-14, 20-24

18Hag a-varr myttin pan esa ow tehweles dhe'n sita, yth esa nown dhodho. 19Hag ow kweles unn figbrenn ryb an fordh, ev a dheuth dhodho, mes ny gavas travyth warnodho saw unnsel delyow, hag yn-medh ev dhodho, ‘Na dhes frut dhiworthis na fella bys vykken!’ Ha dihwans an figbrenn a wedhras. 20Ha marth o gans an dhyskyblon pan welsons henna hag yn-medhons, ‘Fatell yw, an figbrenn dhe wedhra mar uskis?’ 21Ha Yesu a worthybis ha leverel dhedha, ‘Yn hwir y lavarav dhywgh, mar pydh genowgh fydh heb hokya, ny wrewgh yn unnsel an dra gwrys dhe'n figbrenn, mes ynwedh mar leverewgh dhe'n menydh ma, “Ty bydh drehevys ha tewlys y'n mor”, henna a hwyrvydh; 22ha pypynag oll a wovynnowgh yn pysadow gans fydh, hwi a'n kyv.’

Govynn a-dro dhe Awtorita Yesu

Mark 11:27-33; Luk 20:1-8

23Ha pan o devedhys y'n tempel, an bennoferysi ha henavogyon an bobel a dheuth dhodho, hag ev ow tyski, hag yn-medhons, ‘Py awtorita dredho y hwre'ta an taklow ma? Ha piw a ros dhis an awtorita ma?’ 24Yesu a worthybis ow leverel dhedha, ‘Ha my ynwedh a vynn govynn orthowgh hwi unn dra, ha mar kwrewgh gorthybi dhymm, my a lever dhywgh py awtorita dredho y hwrav an taklow ma. 25Besydh Yowann, a-ble feu? A nev po a dus?’ Ena yth esens ow resna yntredha aga honan ow leverel, ‘Mar leveryn, “A nev”, ena ev a lever dhyn, “Prag ytho na gryssowgh dhodho?” 26Ha mar leveryn, “A dus”, own a'gan beus a'n routh, rag pubonan a syns Yowann dhe vos profoes.’ 27Ytho i a worthybis dhe Yesu ow leverel, ‘Ny wodhon.’ Hag yn-medh ev y honan dhedha, ‘Na byth moy ny wrav vy leverel dhywgh py awtorita dredho y hwrav an taklow ma.’

Parabolenn an Winlann ha'n Diogyon

Mark 12:1-12; Luk 20:9-19

28‘Lemmyn pyth yw agas breus? Yth esa dhe dhen dew vab. Hag ev a dheuth dhe'n kynsa, ha leverel, “Ow mab, ke dhe wonis hedhyw y'n winlann”.21:28 y'n winlann: War-lergh re a'n dornskrifow yn ow gwinlann. 29Mes ev a worthybis ha leverel, “Ny vynnav”; mes a-wosa edrek a'n jeva hag ev eth. 30Ena ev a dheuth dhe'n nessa ha kewsel y'n keth vaner. Mes ev a leveris, “Yth av, syrra”, mes nyns eth. 31Pyneyl a'n dhew a wrug bodh y das?’ Yn-medhons, ‘An kynsa.’ Yesu a leveris dhedha, ‘Yn hwir y lavarav dhywgh, bos an dolloryon ha'n horys ow mones a-bervedh yn gwlaskor Duw kyns es dell wrewgh hwi. 32Rag Yowann a dheuth dhywgh yn fordh ewnder ha ny wrussowgh krysi dhodho, mes an dolloryon ha'n horys a grysis dhodho; mes hwi hwath ow kweles henna ny'gas teva edrek a-wosa, na krysi dhodho.

Parabolenn an Winlann ha'n Diogyon

Mark 12:1-12; Luk 20:9-19

33‘Klewewgh parabolenn arall. Yth esa unn den, perghennek tir, neb a blansas gwinlann ha gorra ke a-dro dhedhi ha palas gwinwask ynni, ha drehevel tour, ha'y settya dhe diogyon, hag ena vyajya yn-kerdh. 34Ha pan esa prys an drevas ow nesa, ev a dhannvonas y gethwesyon dhe'n diogyon rag kavoes y drevas. 35Mes an diogyon a dhalghennas y gethwesyon ha kronkya onan, ha ladha onan, ha labydha onan arall. 36Arta ev a dhannvonas kethwesyon erell, moy aga niver ages an re gynsa, hag i a's dyghtyas y'n keth vaner na. 37Wor'tiwedh ev a dhannvonas dhedha y vab y honan, ow leverel, “Y hwrons vri a'm mab.” 38Mes an diogyon, pan welsons an mab a leveris an eyl dh'y gila, “Hemm yw an her; dewgh, gwren ni y ladha ha kavoes y ertach!” 39Ha wosa settya dalghenn ynno, i a'n tewlis yn-mes a'n winlann ha'y ladha. 40Ytho pan dheu arloedh an winlann, pandr'a wra dhe'n diogyon na?’ 41Yn-medhons dhodho, ‘Ev a dhistru an debeles na yn hager, ha settya an winlann dhe diogyon erell, neb a vynn ri dhodho an drevas yn hy frys.’ 42Yn-medh Yesu dhedha, ‘A ny redsowgh bythkweth y'n skryptors,

“An men hag a veu skonys gans an weythoryon,

henn yw gwrys pennmen an korn;

gans an Arloedh y feu hemma gwrys,

ha marthys yw yn agan dewlagas?”

43Rakhenna, my a lever dhywgh, gwlaskor Duw a vydh kemmerys a-dhiworthowgh ha res dhe genedhel a dheg hy threvas. 44Ha neb a goedh war an men ma a vydh terrys dhe demmyn, mes neb may koettho an men warnodho, ev a vydh skwattys dhe dhoust.’21:44 Nyns usi an wers ma yn re a'n dornskrifow.

45Ha'n bennoferysi ha'n Fariseow, pan glewsons y barabolennow, a wodhva ev dhe gewsel a-dro dhedha i; 46hag i a hwilas y dhalghenna, mes yth esa own dhedha a'n routhow, rag i a'n synsis avel profoes.