1Ha Yesu a worthybis, ow kewsel dhedha arta dre barabolennow, ow leverel, 2‘Gwlaskor nev yw hevelebys dhe unn myghtern a wrug goel demmedhyans dh'y vab. 3Hag ev a dhannvonas y gethwesyon dhe dhri an dus gelwys dhe dhos dhe'n demmedhyans, mes i ny vynnens dos. 4Arta ev a dhannvonas kethwesyon erell, ow leverel, “Derivewgh dhe'n dus a veu gelwys, Awotta, my re bareusis ow hevewi, ledhys yw ow oghen ha'm lodhnow peskys; pup-tra oll yw parys; dewgh dhe'n demmedhyans.” 5Mes i a skonyas a wul henna ha mones yn-kerdh y hwrussons, onan dh'y vargen-tir, hag arall dh'y negys. 6Ha'n re erell a dhalghennas y gethwesyon hag a's tebeldhyghtyas ha'ga ladha. 7Ha'n myghtern a sorras hag a dhannvonas y luyow dhe dhiswul an dhenledhysi na hag a loskas aga sita. 8Ena yn-medh ev dh'y gethwesyon, “An demmedhyans yw parys, mes nyns o gwiw an dus a via gelwys. 9Kewgh ytho dhe'n fordhow-meur ha myns a dhyerbynnowgh, gelwewgh i dhe'n demmedhyans.” 10Hag yth eth an gethwesyon na yn-mes dhe'n fordhow ha kuntell oll an dus a wrussons aga dyerbynna, an re dhrog ha da kekeffrys; ha hel an demmedhyans a veu lenwys a westoryon.

11‘Ha'n myghtern pan dheuth a-ji dhe vires orth an westoryon, a welas unn den ena nag esa warnodho gwisk demmedhyans, 12hag yn-medh ev dhodho, “Koweth, fatell dheuthys omma heb gwisk demmedhyans?” Ha tewel a wrug an den. 13Ena yn-medh an myghtern dhe'n servysi, “Kelmewgh y dhewdroes ha'y dhiwla ha tewlewgh ev y'n tewolgow pella. Ena y fydh oelva ha skrinva dyns” 14Rag lies yw gelwys, mes tanow yw an re yw dewisys.’

Ri Trubyt dhe Sesar

Mark 12:13-17; Luk 20:20-26

15Ena an Fariseow a omdennas ha kemmeres kusul fatell wrellens y vaglenna yn y lavarow. 16Hag i a dhannvonas dhodho aga dyskyblon gans an Herodyanys, ow leverel, ‘Mester, ni a woer dha vos gwir, hag ow tyski fordh Duw yn gwiryonedh, ha ny'th teur mann a dhenvyth rag ny virydh orth fas tus. 17Lavar dhyn ytho pyth yw dha vreus: yw lafyl ri trubyt dhe Sesar, po nag yw?’ 18Mes Yesu, ow kodhvos aga droktra a leveris, ‘Prag y'm prevowgh vy, hwi falswesyon? 19Diskwedhewgh dhymm mona an trubyt.’ Hag i a dhros dhodho dinerenn. 20Hag ev a leveris dhedha, ‘Piw a bew an imaj ma ha'n pennskrifa?’ 21Yn-medhons dhodho, ‘Sesar.’ Ena yn-medh ev dhedha, ‘Attelewgh ytho dhe Sesar an taklow yw dhe Sesar, ha dhe Dhuw an taklow yw dhe Dhuw.’ 22Henna pan y'n klewsons marth a's teva, hag i a'n gasas ha mos dhe-ves. 23Y'n keth jydh na y teuth dhodho Sadukeow neb a lever nag eus dasserghyans, hag i a wovynnas orto 24ow leverel, ‘Mester, Moyses a leveris, Mar merow neb den heb bos dhodho fleghes, y koedh dh'y vroder demmedhi y wreg ev ha maga askorr dh'y vroder. 25Yth esa yn agan mysk seyth broder; ha'n kynsa, wosa demmedhi, a verwis heb gasa askorr, hag a asas y wreg dh'y vroder. 26Y'n keth vaner an nessa, ha'n tressa bys y'n seythves. 27Yn tiwettha oll an venyn a verwis. 28Y'n dasserghyans ytho piw a'n seyth a vydh hi an wreg dhodho, rag i oll a's teva hi?’ 29Yesu a worthybis ha leverel dhedha, ‘Kammdybi a wrewgh, drefenn na wodhowgh naneyl an skryptors na galloes Duw. 30Rag y'n dasserghyans ny dhemmedhons, ha nyns yns i res yn demmedhyans, mes yth yns i avel eledh Duw22:30 War-lergh re a'n dornskrifow nyns usi omma an ger Duw. yn nev. 31Hag a-dro dhe dhasserghyans an re varow, a ny redsowgh an dra derivys dhywgh gans Duw, ow leverel, 32“My yw Duw Abraham ha Duw Ysak ha Duw Yakob”? Nyns yw ev Duw an re varow saw a'n re vew.’ 33Ha pan glewas an routhow henna, marth a's teva a'y dhyskas.

An Gorhemmynn Meur

Mark 12:28-34; Luk 10:25-28

34Ha'n Fariseow wosa klewes ev dhe wul dhe'n Sadukeow tewel, a omguntellas war-barth, 35hag onan anedha, laghyas, a wovynnas orto, orth y brevi, 36‘Mester, pandra yw an brassa gorhemmynn y'n lagha?’ 37Yn-medh ev dhodho, ‘ “Ty a wra kara an Arloedh dha Dhuw gans oll dha golonn ha gans oll dha enev ha gans oll dha vrys.” 38Hemm yw an brassa ha'n kynsa gorhemmynn. 39Ha'n nessa yw haval dhodho, “Ty a wra kara dha gentrevek kepar dell omgerydh dha honan.” 40War a'n dhew worhemmynn ma yma oll an lagha ha'n brofoesi ow kregi.’

Govynn a-dro dhe Vab Davydh

Mark 12:35-37; Luk 20:41-44

41Ha pan veu an Fariseow omguntellys war-barth, Yesu a wovynnas orta 42ow leverel, ‘Pandr'a dybowgh hwi a-dro dhe'n Krist? Piw dhodho yw ev mab?’ Yn-medhons dhodho, ‘Dhe Davydh.’ 43Yn-medh ev dhedha, ‘Fatell ytho y hwra Davydh y'n Spyrys y elwel Arloedh, ow leverel,

44“An Arloedh a leveris dhe'm Arloedh,

‘Ty esedh a'n barth dhyghow dhymm

erna worriv dha eskerens yn-dann dha dreys’ ”?22:44 erna worriv dha eskerens yn-dann dha dreys: War-lergh re a'n dornskrifow erna wrylliv dha eskerens dha skavell-droes.

45Ytho Davydh mara'n gelow “Arloedh”, fatell yw ev y vab?’ 46Ha ny ylli denvyth leverel ger dhodho yn gorthyp, na ny vedhas denvyth a-dhia'n jydh na govynn orto namoy.