Kuhudhans an Skribys ha'n Fariseow

Mark 12:38-40; Luk 11:37-52, 20:45-47

1Ena Yesu a gewsis dhe'n routhow ha dh'y dhyskyblon 2ow leverel, ‘An skribys ha'n Fariseow re esedhas war esedh Moyses. 3Rakhenna gwrewgh ha gwithewgh oll an taklow a leverons dhywgh,23:3 a leverons dhywgh: War-lergh re a'n dornskrifow a leverons dhywgh dhe witha. saw herwydh aga gweythresow na wrewgh: rag i a gews mes ny wrons. 4I a gelm beghyow poes ha kales dhe berthi23:4 War-lergh re a'n dornskrifow nyns usi omma an geryow ha kales dhe berthi. ha'ga gorra war dhiwskoedh tus, mes i aga honan ny vynnons aga remova gans aga bys. 5Oll aga oberow i a wra rag bos gwelys gans tus; rag i a ledanha aga fylakteriow ha hirhe pilennow aga gwisk.23:5 ha hirhe pilennow aga gwisk: War-lergh re a'n dornskrifow ha hirhe an pilennow. 6I a gar an penn-esedhow yn kevewiow ha'n penn-esedhow y'n synagys, 7ha salusyansow y'n marghasow, ha bos gelwys Rabbi23:7 Rabbi: War-lergh re a'n dornskrifow Rabbi, Rabbi. gans tus. 8Mes hwi, na bedhewgh gelwys Rabbi; rag onan yw agas dyskador23:8 agas dyskador: War-lergh re a'n dornskrifow agas dyskador, an Krist. hag oll hwi yw breder. 9Ha hwi na wrewgh gelwel denvyth y'n nor agas tas, rag onan yw agas Tas a nev. 10Ha na vedhewgh gelwys dyskadoryon, rag onan yw agas dyskador, an Krist. 11An moyha ahanowgh yw agas servont. 12Neb a omughelha a vydh dres isel, ha neb a omuvelha a vydh ughelhes.

13‘Go-hwi, skribys ha Fariseow, falswesyon, rag hwi a dhege gwlaskor nev erbynn tus; rag nyns ewgh agas honan a-bervedh ynno na ny esowgh dhe vones a-bervedh an re a vynn entra.

14‘Go-hwi, skribys ha Fariseow, falswesyon, rag hwi a lenk chiow gwedhwesow, hag yn fayntys hwi a wrewgh pysadow hir; rakhenna y kevowgh breus dhe voy tynn.23:14 Nyns usi an wers ma yn re a'n dornskrifow. 15Go-hwi, skribys ha Fariseow, falswesyon, rag hwi a dremen dres mor ha tir dhe gavoes unn dyskybel nowydh ha pan y'n kevir, hwi a'n gwra mab ifarn23:15 ifarn: Greka Gehenna. dewblek gweth agesowgh hwi agas honan.

16‘Go-hwi, kevarwoedhoryon dhall neb a lever, “Seul a wrello ti re'n tempel, ny amont mann, mes seul a wrello ti re owr an tempel, ev yw kelmys.” 17Fellyon dhall, pyneyl ytho yw an moyha, an owr po an tempel a wra dhe'n owr bos sakrys? 18Ha, “Seul a wrello ti re'n alter, ny amont mann, mes seul a wrello ti re'n offrynn eus warnedhi, ev yw kelmys.” 19Tus dhall, pyneyl ytho yw an moyha, an offrynn po an alter a wra dhe'n offrynn bos sakrys? 20Rag neb a wra ti re'n alter, a de re'n alter ha re bup-tra eus warnedhi; 21ha neb a de re'n tempel a de re'n tempel ha re neb a drig ynno, 22ha neb a de re'n nev a de re dron Duw ha re neb yw esedhys warnodho.

23‘Go-hwi, skribys ha Fariseow, falswesyon, rag hwi a wra degevi menta ha fenogel ha kumin ha gasa dhe goll taklow poessa an lagha, ewnder ha tregeredh ha lenduri; an re ma y koedhsa dhywgh aga gul heb dispresya an re na. 24Kevarwoedhoryon dhall, usi ow kroedra gwibesenn ha lenki kowrvargh!

25‘Go-hwi, skribys ha Fariseow, falswesyon, rag hwi a lanha tu a-ves an hanaf ha'n skudell, mes an tu a-bervedh yw leun a arowder ha fowt omrewl. 26Ty Farise dall, kyns oll glanha tu a-bervedh an hanaf may fo glan an tu a-ves anodho.

27‘Go-hwi, skribys ha Fariseow, falswesyon, rag hwi yw haval dhe vedhow yw gwynnhes gans lim, teg aga semlans war-ves, mes war-ji yth yns leun a eskern tus varow hag a bub plosedhes. 28Yndellma ynwedh hwi yw gwiryon agas semlans war-ves a-wel dhe dus, mes war-ji yth owgh leun a falsuri ha fara dilagha.

29‘Go-hwi, skribys ha Fariseow, falswesyon, rag hwi a dhrehav bedhow an brofoesi ha tekhe meyn kov an re wiryon, 30ha leverel, “A kwrellen ni bewa yn dydhyow agan tasow, ny vien kevrennek gansa ow skoellya goes an brofoesi.” 31Yndella yth owgh hwi dustunioryon er agas pynn agas honan, hwi dhe vos mebyon an re a ladhas an brofoesi. 32Lenwewgh ytho musur kammweyth agas tasow. 33Hwi serf! Hwi askorr nadres! Fatell yllowgh diank dhiworth breus ifarn?23:33 ifarn: Greka Gehenna. 34Rakhenna, otta, my a dhannvon dhywgh profoesi ha tus fur ha skribys: re anedha hwi a's ladh ha'ga krowsya, ha skorjya re a wrewgh yn agas synagys ha'ga helghya a sita dhe sita; 35may teffo warnowgh an goes gwiryon oll a veu skoellys war an bys, a-dhiworth goes Abel gwiryon bys yn goes Zakaria mab Baraghia, neb a ledhsowgh ynter an tempel ha'n alter. 36Yn hwir y lavarav dhywgh, oll an taklow ma a dheu war an henedh ma.

Kynvann war Yerusalem

Luk 13:34-35

37‘Yerusalem, Yerusalem neb a ladh an brofoesi ha labydha an re yw dannvenys dhis!23:37 dhis: Greka dhedhi. Peskweyth y yeunis vy kuntell dha fleghes war-barth, kepar dell guntell yar hy yerigow yn-dann hy eskelli, mes hwi ny vynnsowgh. 38Awotta, agas chi yw gesys dhywgh hwi, ynyal. 39Rag my a lever dhywgh, na'm gwelowgh alemma rag, bys pan leverowgh, “Benniges yw neb a dheu yn hanow an Arloedh.” ’