Diswrians an Tempel Dargenys

Mark 13:1-2; Luk 21:5-6

1Ena Yesu eth yn-mes a'n tempel, hag yth esa ow mos yn-rag, pan dheuth y dhyskyblon dhe dhiskwedhes dhodho drehevyansow an tempel. 2Hag ev a worthybis ha leverel dhedha, ‘A ny welowgh hwi oll hemma? Yn hwir y lavarav dhywgh, ny vydh gesys omma men war ven na vydh terrys dhe'n dor.’

Dalleth Galarow

Mark 13:3-13; Luk 21:7-19

3Ha pan ova esedhys war an menydh Oliv, y dhyskyblon a dheuth dhodho yn priva ha leverel, ‘Lavar dhyn, p'eur hwyrvydh oll an taklow ma ha py tokyn vydh a'th devedhyans ha diwedh an oes?’ 4Ha Yesu a worthybis ha leverel dhedha, ‘Bedhewgh war na wrello denvyth agas toella; 5rag lies a dheu y'm hanow vy ha leverel, “My yw an Krist”, hag i a wra toella lies. 6Hwi a glewvydh a vreselyow ha son a vreselyow; gwaytyewgh na gemmerrowgh own, rag res yw henna dhe hwarvos, mes ny vydh hwath an diwedh. 7Rag kenedhel a sev erbynn kenedhel ha gwlaskor erbynn gwlaskor hag y hwyrvydh divoetter ha dorgrysyow24:7 divoetter ha dorgrysyow: War-lergh re a'n dornskrifow divoetter ha plaow ha dorgrysyow. yn divers tylleryow. 8Mes dalleth gloesow yw henna oll.

9‘Ena i a'gas daskorr dhe dorment ha'gas ladha ha hwi a vydh kesys gans oll an kenedhlow, a-barth ow hanow vy. 10Hag ena lies huni a wra koedha dhe-ves ha trayta ha kasa an eyl y gila. 11Ha lies profoes fals a sev, ha toella lies; 12ha rag bos tebelwrians ow moghhe, kerensa lies huni a vydh yeynhes. 13Mes neb a dhur bys yn diwedh, ev a vydh selwys. 14Ha'n aweyl ma a'n wlaskor a vydh pregewthys yn oll an bys yn dustuni dhe oll an kenedhlow, hag ena y teu an diwedh.

An Anken Meur

Mark 13:14-23; Luk 21:20-24

15‘Pan welowgh ytho pyth kasadow an difeythter menegys gans Daniel an profoes ow sevel y'n tyller sans (gwres an redyer konvedhes), 16ena fies dhe'n menydhyow an re a drig yn Yudi; 17neb usi war do an chi na wres diyskynna rag kyrghes neppyth yn-mes a'y ji, 18ha neb eus y'n gwel na wres dehweles arta rag kyrghes y vantell. 19Ha go-i an re gans flogh y'n dorr, ha neb a re an vronn y'n dydhyow na. 20Pysewgh na vo agas fo yn gwav po y'n sabot. 21Rag y'n prys na y fydh anken tynn, a'n par na hwarva a-dhia dhalleth an norvys bys y'n jydh hedhyw, na nevra ny vydh. 22Ha mar ny ve an dydhyow na gwrys kott, ny via kig vyth selwys; mes rag an re dhewisys an dydhyow na a vydh gwrys kott. 23Ena mar lever nebonan dhywgh, “Ottomma an Krist”, py “Ottena ev”, na'n krysewgh. 24Rag fals Kristow ha fals profoesi a sev ow kul toknys bras ha marthusyon, rag toella, mara kyllir, an re dhewisys. 25Otta, my re'gas gwarnyas a-rag dorn. 26Mar leverons dhywgh ytho, “Ottava y'n gwylvos”, nag ewgh dhe-ves; po “Ottava y'n chambouryow a-bervedh”, na grysewgh henna. 27Rag kepar dell dheu an lughesenn yn-mes a'n howldrevel ha golowi bys y'n howlsedhes, yndella y fydh devedhyans Mab an den. 28Pyle pynag a vo an korf marow, ena yth omguntell an eryon.

Devedhyans Mab an Den

Mark 13:24-27; Luk 21:25-28

29‘A-dhihwans war-lergh galar an dydhyow na

an howl a vydh tewlhes,

ha'n loer ny re hy golow,

an ster a goedh war-nans a'n nev,

ha nerthow an nevow a vydh kryghyllys.

30Hag ena yth omdhiskwa tokyn Mab an den yn nev, hag ena pub loeth a'n bys a wra kyni, hag i a wel “Mab an den ow tos war gommol an nev” gans galloes ha golewder meur; 31hag ev a dhannvon y eledh gans son bras a hirgorn, hag i a guntell war-barth y bobel dhewisys, yn-mes a'n peswar gwyns dhiworth a'n eyl penn a'n nevow dh'y gila.

Parabolenn an Figbrenn

Mark 13:28-31; Luk 21:29-33

32‘Dyskewgh parabolenn dhiworth an figbrenn; kettell vo y skorrenn medhel, ha gorra del yn-mes, hwi a woer bos yn ogas an hav; 33yndella hwi ynwedh, pan welowgh oll an taklow ma, hwi a woer ev dhe vos ogas, orth an darasow. 34Yn hwir y lavarav dhywgh, ny dremen an henedh ma erna vo oll an taklow ma gwrys. 35Nev ha nor a dremen dhe-ves, mes ow geryow vy, ny dremenons dhe-ves.

Ny Wodhor an Jydh na'n Eur

Mark 13:32-37; Luk 17:26-30, 34-36

36‘Mes a-dro dhe'n jydh na ha'n eur, ny woer denvyth, naneyl eledh an nevow, na'n Mab,24:36 War-lergh re a'n dornskrifow nyns usi omma an geryow na'n Mab. saw unnsel an Tas. 37Rag kepar dell vedha hi yn dydhyow Noy, yndella y fydh devedhyans Mab an den. 38Rag kepar dell esens, y'n dydhyow na kyns an liv, ow tybri hag owth eva, ow temmedhi hag ow ri yn demmedhyans, bys y'n jydh mayth eth Noy a-ji dhe'n gorhel, 39ha ny wodhyens travyth bys pan dheuth an liv hag a's skubas dhe-ves yn kettep penn: yn kettella y fydh devedhyans Mab an den. 40Ena y fydh dewdhen y'n gwel, an eyl a vydh kemmerys ha'y gila gesys; 41diw venyn ow melyas orth an velin, an eyl a vydh kemmerys ha gesys hy ben. 42Gwrewgh goelyas ytho rag ny wodhowgh py dydh y teu agas Arloedh. 43Mes godhvydhewgh hemma: mar kodhve mester an chi yn py goel y to an lader, y fia ow koelyas ha ny wrussa gasa y ji dhe vos terrys. 44Rakhenna, bedhewgh hwi ynwedh parys, rag y'n eur ma na dybowgh y teu Mab an den.

An Kethwas Lel po Dislel

Luk 12:41-48

45‘Piw ytho yw an kethwas lel ha fur may ros an mester dhodho charj a'y deylu rag ri dhedha aga boes yn prys ewn? 46Gwynn y vys an kethwas na, a wra y arloedh y gavoes ow kul yndella pan dheffo. 47Yn hwir y lavarav dhywgh, ev a re dhodho an charj a oll y byth. 48Mes mars yw an kethwas na drog, hag a lever yn y golonn, “Delatya a wra ow mester y dhevedhyans”, 49hag ena dalleth gweskel y geswesyon, ha dybri hag eva gans an bennow-medhow, 50dos a wra mester an kethwas na yn dydh na wayt, hag yn eur na woer. 51Ev a wra y gessydhya yn tynn24:51 y gessydhya yn tynn: Greka y dreghi yntra dew. hag ordena dhodho le gans an falswesyon. Ena y fydh oelva ha skrinva dyns.