Parabolenn an Deg Gwyrghes

1‘Ena y fydh gwlaskor nev hevelebys dhe dheg gwyrghes neb a gemmeras aga lugern ha mos mes dhe dhyerbynna an gour pries. 2Pymp anedha o foll ha pymp o fur. 3An re foll a gemmeras aga lugern heb kemmeres oyl gansa; 4mes an re fur a gemmeras oyl yn lestri gans aga lugern. 5Ha pan veu an gour pries delatys, i oll a hunas ha koska. 6Mes yn hanter nos yth esa garm, “Ottomma an gour pries, ewgh dhe-ves dh'y dhyerbynna.” 7Ena oll an gwyrghesow na a dhifunas ha takla aga lugern. 8Ha'n re foll a leveris dhe'n re fur, “Rewgh dhyn rann a'gas oyl, rag agan lugern yw difeudhys.” 9Mes an re fur a worthybis ha leverel, “Na ren, rag own na vydh oyl lowr dhyn ni ha dhywgh hwi; yn le henna, ewgh dhe'n werthoryon ha prenewgh ragowgh hwi agas honan.” 10Pan ethons ytho dhe brena, an gour pries a dheuth, ha'n gwyrghesow o parys eth ganso dhe'n demmedhyans ha'n daras a veu deges. 11Wosa henna, an gwyrghesow erell a dheuth ha leverel, “Arloedh, arloedh, igor dhyn ni.” 12Mes ev a worthybis ha leverel, “Yn hwir y lavarav dhywgh, ny wrav vy agas aswonn.” 13Goelyewgh ytho, rag ny wodhowgh naneyl an jydh na'n eur may teu Mab an den.25:13 War-lergh re a'n dornskrifow nyns usi omma an geryow may teu Mab an den.

Parabolenn an Talentys

Luk 19:11-27

14‘Rag yth yw avel den ow vyajya yn-kerdh, neb a elwis y gethwesyon ha ri dhedha an charj a'y bythow, 15hag a ros dhe onan pymp talent,25:15 talent: Greka talanton. ha dhe onan arall dew, ha dhe arall unn talent, dhe bubonan herwydh y alloes, ha dison yth eth yn-kerdh. 16Hag ev neb a dhegemmeras an pymp talent eth ha kenwertha gansa hag a wrug prow a bymp moy. 17Yn kettella y hwrug gwas an dhew dalent prow a dhew moy. 18Mes ev neb a gavas an unn talent eth ha palas toll y'n dor ha kudha mona y vester. 19Wosa hirneth, mester an gethwesyon na a dheuth dhe rekna gansa. 20Hag ev neb a gavsa an pymp talent a dheuth yn-rag, hag a dhros pymp talent moy, ow leverel, “Mester, pymp talent ty a res dhymmo; ottomma pymp moy a wrugavy yn prow dhedha.” 21Yn-medh y vester dhodho, “Yn ta re wruss'ta, ty gethwas da ha lel, war nebes ty re beu lel, my a re dhis charj a lies tra. Ke dhejy a-bervedh yn lowena dha vester.” 22Hag ev neb a gavsa an dhew dalent a dheuth yn-rag, hag yn-medh ev, “Mester, ty a ros dhymm dew dalent; ottomma dew dalent moy a wrugavy yn prow dhedha.” 23Yn-medh y vester dhodho, “Yn ta y hwruss'ta, ty gethwas da ha lel, ty re beu lel war nebes, my a re dhis charj a lies tra. Ke dhejy a-bervedh yn lowena dha vester.” 24Mes pan dheuth yn-rag ev neb a gavsa an unn talent, yn-medh ev, “Mester, my a wodhya ty dhe vos den kales, ow mysi le na wruss'ta gonis has ha kuntell le na wruss'ta tewlel has, 25hag own a'm kemmeras ha mones a wrugavy dhe gudha dha dalent y'n gweres. Ottomma an pyth eus dhiso.” 26Y vester a worthybis ow leverel dhodho, “Ty gethwas drog ha diek, a wodhesta my dhe vysi le na wrussen gonis has, ha dhe guntell le na wrussen tewlel has? 27Y koedhvia dhis ytho gorra ow mona gans an arghansoryon hag yndella pan dhehwellen y kavsen ow fyth arta, gans oker. 28Rakhenna kemmerewgh a-dhiworto an talent ha'y ri dhe neb a'n jeves an deg talent. 29Rag dhe beub a bewvo, y fydh res, hag ev a'n jevydh lanwes; mes neb na bewvo mann, dhiworto ev y fydh kemmerys ynwedh an pyth a bew. 30Ha tewlewgh an kethwas euver y'n tewlder pella; ena y fydh oelva ha skrinva dyns.”

Breus an Kenedhlow

31‘Ha Mab an den pan dheu yn y wolewder, hag oll an eledh ganso, ena yth esedh war dron y wolewder. 32Hag oll an kenedhlow a vydh kuntellys a-dheragdho, hag ev a's rann an eyl dhiworth hy ben kepar dell rann an bugel an deves dhiworth an gever; 33hag ev a worr an deves a'y barth dhyghow ha'n gever a'n barth kledh. 34Ena y hwra an Myghtern leverel dhe'n re a'y barth dhyghow, “Dewgh, hwi vennigys gans ow Thas, eritewgh an wlaskor yw pareusys dhywgh dhiworth gwrians an bys. 35Rag nown a'm beu ha hwi a ros dhymm dhe dhybri, syghes a'm beu ha hwi a ros dhymm dhe eva, estren en vy, ha hwi a'm wolkommas, 36noeth ha hwi a'm dillesas, klav ha hwi a dheuth dhe'm gweles, yn prison hag y teuthewgh dhymm.” 37Ena y hwra an re wiryon gorthybi dhodho ow leverel, “Arloedh, p'eur y'th welsyn nownek ha ri boes dhis, po ow kodhevel syghes ha ri dhis dhe eva? 38Ha p'eur y'th welsyn estren ha'th wolkomma, po noeth ha'th tillasa? 39P'eur y'th welsyn klav po yn prison ha ni a dheuth dhis?” 40Hag y hwra an Myghtern gorthybi ow leverel dhedha, “Yn hwir y lavarav dhywgh, par dell y'n gwrussowgh dhe onan a'n lyha a'm breder ma, dhymmo vy y'n gwrussowgh.”

41‘Ena y hwra ev leverel ynwedh dhe'n re a'n barth kledh, “Kewgh a-dhiworthiv, hwi dus villiges, dhe'n tan heb diwedh yw darbarys dhe'n jowl ha'y eledh. 42Rag nown a'm beu ha ny resowgh dhymm dhe dhybri, syghes a'm beu ha ny resowgh dhymm dhe eva, 43estren en vy ha ny wrussowgh ow wolkomma, noeth ha ny wrussowgh ow dillasa, klav hag yn prison ha ny dheuthewgh dhe'm gweles.” 44Ena y hwra i ynwedh gorthybi ow leverel, “Arloedh, p'eur y'th welsyn ow kodhevel nown po syghes; po estren po noeth po klav po prisonys ha ni heb dha servya?” 45Ena ev a wra aga gorthybi ow leverel, “Yn hwir y lavarav dhywgh, par dell na'n gwrussowgh dhe onan a'n re lyha ma, dhymmo vy ny'n gwrussowgh.” 46Hag yth a an re ma yn-kerdh dhe gessydhyans bys vykken, mes an re wiryon dhe vewnans heb diwedh.’