Yesu Dres a-rag Pilat

Mark 15:1; Luk 23:1-2; Yow 18:28-32

1Ha ternos vyttin, oll an bennoferysi ha henavogyon an bobel a wrug omgusulyans erbynn Yesu rag y worra dhe'n mernans; 2ha wosa i dh'y gelmi, i a'n dug yn-kerdh ha'y dhaskorr dhe Pilat an governour.

Mernans Yudas

Obe 1:18-19

3Ena Yudas neb a'n traytas pan welas ev dhe vos dampnys a goedhas yn edrek hag a dhros an deg bath warn ugens a arghans arta dhe'n bennoferysi ha'n henavogyon, 4ow leverel, ‘My re beghas a-ban draytis goes gwiryon.’ Yn-medhons i, ‘Pandr'yw henna dhyn ni? Ty dha honan preder anodho.’ 5Ha wosa tewlel an mona y'n tempel, ev a omdennas ha mones dh'y omgregi. 6An bennoferysi a gemmeras an mona ha leverel, ‘Nyns yw lafyl y worra y'n arghow, rag y vos pris goes.’ 7Ha wosa omgusulya i a brenas ganso gwel an weythoryon pri avel ynkleudhva rag estrenyon. 8Rakhenna an gwel na yw henwys Gwel an Goes bys y'n jydh hedhyw. 9Ena y feu kollenwys an dra kewsys dre Yeremia an profoes, ow leverel, Hag i a gemmeras an deg bath warn ugens a arghans, pris an den talvesys, neb a veu talvesys gans mebyon Ysrael,27:9 gans mebyon Ysrael: Po gans re a vebyon Ysrael. 10hag i a's ros rag gwel an gweythor pri, dell ordenas an Arloedh dhymm.

Yesu Apposys gans Pilat

Mark 15:2-5; Luk 23:3-5; Yow 18:33-38

11Ha Yesu a sevis a-rag an governour; ha'n governour a wovynnas orto, ow leverel, ‘Ty yw myghtern an Yedhewon?’ Yn-medh Yesu, ‘Ty a'n lever.’ 12Ha pan ova kuhudhys gans an bennoferysi ha'n henavogyon, ny worthybis travyth. 13Ena yn-medh Pilat dhodho, ‘A ny glewydh py lies tra y tustunions er dha bynn?’ 14Hag ev ny worthybis dhodho unn ger vytholl, mayth o marth meur dhe'n governour.

Yesu Dampnys dhe'n Mernans

Mark 15:6-15; Luk 23:13-25; Yow 18:39–19:16

15Hag yth o dhe'n governour us y'n goel dhe dhelivra unn prisner dhe'n routh, piwpynag a vynnens. 16Hag y'n eur na yth esa dhedha prisner drog-gerys gelwys Barabbas.27:16 Barabbas: War-lergh niver byghan a dhornskrifow Yesu Barabbas. Ynwedh yn 27:17. 17Ytho pan ens i kuntellys war-barth, Pilat a leveris dhedha, ‘Pyneyl a vynnowgh may hwrylliv y dhelivra dhywgh, Barabbas, po Yesu yw henwys Krist?’ 18Rag ev a wodhya i dh'y dhaskorr dre atti. 19Ha pan ova esedhys yn barr an vreus, y wreg a dhannvonas dhodho, ow leverel, ‘Ty na wra mellya gans an den gwiryon na, rag my a wodhevis lower hedhyw yn hunros a'y wovis ev.’ 20Mes an bennoferysi ha'n henavogyon a dhynyas an routhow dhe wovynn Barabbas dhe vos delivrys, ha distrui Yesu. 21Ena y hworthybis an governour ha leverel dhedha, ‘Pyneyl a'n dhew y fynnowgh orthiv delivra dhywgh?’ Yn-medhons, ‘Barabbas.’ 22Yn-medh Pilat dhedha, ‘Pandr'a wrav vy orth Yesu yw gelwys Krist?’ I oll a leveris, ‘Bedhes krowsys!’ 23Yn-medh ev, ‘Pana dhrog ytho a wruga?’ Mes i a armas dhe voy ow leverel, ‘Bedhes krowsys!’

24Ha Pilat, pan welas na ylli gwaynya travyth, mes yth esa freudh ow talleth, a gemmeras dowr ha golghi y dhiwla a-rag an routh ow leverel, ‘Glan yth o'ma a woes an den gwiryon27:24 War-lergh re a'n dornskrifow nyns usi omma an ger gwiryon ma. Hwi omgemmerewgh.’ 25Ha'n bobel oll a worthybis ow leverel, ‘Re bo y woes warnan ni ha war agan fleghes.’ 26Ena ev a dhelivras Barabbas dhedha, mes Yesu ev a skorjyas ha'y ri dhe vos krowsys.

An Soudoryon a Skorn Yesu

Mark 15:16-20; Yow 19:2-3

27Ena soudoryon an governour a worras Yesu dhe'n pretorium27:27 dhe'n pretorium: Po dhe lys an governour. hag a guntellas oll an bagas a soudoryon27:27 oll an bagas a soudoryon: Po oll an kohort. a-dro dhodho. 28Ha wosa y dhestryppya, i a worras mantell gogh a-dro dhodho, 29hag a blethas kurun a spern ha'y gorra war y benn ha korsenn yn y leuv dhyghow, hag ow koedha war benn-dewlin a-dheragdho, i a wrug ges anodho ow leverel, ‘Hayl, Myghtern an Yedhewon!’ 30Hag i a drewas warnodho ha kemmeres an gorsenn hag yth esens orth y weskel war y benn. 31Ha wosa gul ges anodho, i a dhi'skas an vantell ha'y wiska gans y dhillas y honan ha'y dhoen yn-kerdh dhe vos krowsys.

Krowsyans Yesu

Mark 15:21-32; Luk 23:26-43; Yow 19:17-27

32Hag ow mos yn-mes, i a gavas den a Kyrene, henwys Simon; i a wrug y gonstryna dhe dhoen y grows. 33Ha pan ens devedhys dhe tyller henwys Golgotha (henn yw Tyller Krogen), 34i a ros dhodho dhe eva gwin kemmyskys gans bystel; mes wosa ev dh'y dastya, ny vynnas y eva. 35Ha pan y'n krowssons i a rannas y dhillas ow tewlel prenn.27:35 Yn niver byghan a dhornskrifow yma omma may fe kollenwys an dra kewsys gans an profoes, I a rannas ow dillas yntredha, ha war ow gwisk i a dewlis prenn. 36Ena i a esedhas, ha'y witha ena. 37Hag a-ugh y benn i a worras skrif an kuhudhans er y bynn, ‘Hemm yw Yesu, Myghtern an Yedhewon.’

38Ena y feu krowsys ganso dew lader, an eyl a'y barth dhyghow, ha'y gila a'y barth kledh. 39Ha'n dremenysi a'n kablas, ow shakya aga fenn, 40ha leverel, ‘A ty, neb a dhistru an tempel ha'y dhrehevel kyns penn trydydh, omsaw dha honan mars os Mab Duw, ha diyskynn a'n grows.’ 41Yn keth vaner an bennoferysi gans an skribys ha'n henavogyon ow kul ges a leveris, 42‘Tus erell ev a's sawyas, ev y honan ny yll omsawya; Myghtern Ysrael ywa, diyskynnes lemmyn a'n grows ha ni a grys dhodho; 43ev a fydhyas yn Duw, re'n deliffro lemmyn mara'n mynn; rag ev a leveris, “My yw Mab Duw.” ’ 44Yn kepar maner ynwedh yth esa an ladron neb o krowsys ganso orth y dhespitya.

Mernans Yesu

Mark 15:33-41; Luk 23:44-49; Yow 19:28-30

45Ha dhiworth an hweghves eur yth esa tewolgow war oll an nor bys y'n nawves eur. 46Hag a-dro dhe'n nawves eur, Yesu a armas gans lev ughel ow leverel, ‘Eli, Eli, lema sabaghthani?’ henn yw: ‘Ow Duw, Ow Duw, prag y'm forsaksys?’ 47Re an dus a sevi ena, pan y'n klewsons a leveris, ‘Yma an den ma ow karma war Elias.’ 48Ha dihwans onan anedha a boenyas dhe gavoes spong hag a'n lenwis a aysel ha'y worra war welenn ha'y ri dhodho dhe eva. 49Mes an re erell a leveris, ‘Gesewgh ni dhe weles mar teu Elias rag y sawya.’ 50Ena Yesu a armas arta gans lev ughel hag a dhaskorras an enev. 51Hag otta, vayl an tempel a veu skwardys yntra diw rann, a'n penn a-wartha bys y'n goeles, hag y feu dorgrys ha'n karregi a veu folsys, 52ha'n bedhow a veu igerys ha meur a gorfow a'n syns koedhys yn kosk a veu drehevys; 53hag i a dheuth yn-mes a'n bedhow wosa y dhasserghyans, ha mos y'n sita sans hag omdhiskwedhes dhe lies huni. 54Ha'n penn-kangour ha'n re esa ganso ow kwitha Yesu, pan welsons an dorgrys hag oll a hwarva, a borthas own meur, ow leverel, ‘Yn tevri hemma o Mab Duw.’ 55Hag yth esa ena lies benyn ow mires a-bell, neb a holyas Yesu dhiworth Galile, orth y servya. 56Yn aga mysk yth esa Maria Magdalena, ha Maria mamm Jamys ha Yoses,27:56 Yoses: War-lergh re a'n dornskrifow Yosep. ha mamm mebyon Zebede.

Ynkleudhyans Yesu

Mark 15:42-47; Luk 23:50-56; Yow 19:38-42

57Ha devedhys an gorthugher, den rych a Arimathea, henwys Yosep, a dheuth, neb y honan ynwedh o dyskybel dhe Yesu. 58Ev eth dhe Pilat ha govynn orto korf Yesu. Ena Pilat a erghis may fe res dhodho. 59Ha wosa ev dhe gemmeres an korf, Yosep a'n maylyas yn lien glan 60hag a'n gorras yn y vedh nowydh a wrussa y dreghi y'n garrek, ha wosa ev dhe rolya men bras a-dreus dhe dharas an bedh, yth eth yn-kerdh. 61Hag yth esa ena Maria Magdalena ha'n Varia arall, esedhys a-dal an bedh.

An Withysi orth an Bedh

62Ha ternos, an jydh wosa Darbar an Goel, an bennoferysi ha'n Fariseow a omguntellas war-barth ha mos dhe Pilat, 63ow leverel, ‘Arloedh, yma kov dhyn an toeller na, pan o hwath yn few, dhe gewsel, “Wosa trydydh y hwrav dasserghi.” 64Argh, ytho, may fo an bedh gwithys gans rach bys y'n tressa dydh rag na dheffo y dhyskyblon yn nos27:64 War-lergh re a'n dornskrifow nyns usi omma an geryow yn nos. ha'y ladra ha leverel dhe'n bobel, “Drehevys veu dhiworth an re varow”, hag yndella an toell diwettha a vydh gweth ages an kynsa.’ 65Yn-medh Pilat dhedha, ‘Yma gwithysi genowgh, kewgh, ha'y witha dell wodhowgh.’ 66Hag yth ethons ha gwitha an bedh, ow selya an men ha gorra gwithysi warnodho.