Pregoth Yowann Besydhyer

Mark 1:1-8; Luk 3:1-9, 15-17; Yow 1:19-28

1Y'n dydhyow na Yowann Besydhyer a dheuth ow pregoth yn gwylvos Yudi 2ha leverel, ‘Koedhewgh yn edrek; rag gwlaskor nev re dheuth nes.’ 3Rag an den ma yw neb a veu menegys der Ysay an profoes, ow leverel,

‘Lev onan ow kria y'n gwylvos:

Pareusewgh fordh an Arloedh,

gwrewgh kompes y hynsyow ev.’

4Ha dhe Yowann yth esa gwisk gwrys a vlew kowrvargh gans grogys a groghen a-dro dh'y dhiwglun, ha'y voes o lokustes ha mel gwyls. 5Y'n prys na, yth esa ow mos yn-mes dhodho Yerusalem hag oll Yudi ha'n pow a-dro dhe'n Yordan, 6hag yth esens i ow pos besydhys ganso y'n Yordan, ow yes aga feghosow. 7Hag ev, ow kweles meur a Fariseow ha Sadukeow ow tos dh'y vesydh, a leveris dhedha, ‘Hwi askorr nadres! Piw re'gas gwarnyas dhe fia dhiworth an sorr a dheu? 8Degewgh ytho frut gwiw rag edrega, 9ha na dybewgh leverel dh'agas honan, “Yma dhyn Abraham yn tas.” Rag my a lever dhywgh y hyll Duw drehevel fleghes dhe Abraham yn-mes a'n veyn ma. 10Ha lemmyn yma an voel gorrys war wreydhenn an gwydh; pub gwydhenn ytho na dheg frut da a vydh treghys dhe'n dor ha tewlys yn tan. 11My a'gas besydh gans dowr dhe edrega, mes ev neb a dheu war ow lergh yw moy galloesek agesov vy ha'y eskisyow nyns o'ma gwiw dh'aga doen. Ev a'gas besydh gans an Spyrys Sans ha tan. 12Yn y leuv yma an gwynsell, hag ev a lanha yn tien y leur-drushya ha kuntell y waneth dhe'n skiber, mes an us ev a'n lesk gans tan na yllir y dhifeudhi.’

Besydh Yesu

Mark 1:9-11; Luk 3:21-22

13Ena Yesu a dheuth a Alile dhe Yowann troha'n Yordan rag bos besydhys ganso. 14Mes Yowann a'n lettyas, ow leverel, ‘Y koedhvia dhymm bos besydhys genes jy: ha ty, osta jy devedhys dhymmo vy?’ 15Mes Yesu a worthybis ow leverel dhodho, ‘Gas henna dhe vos lemmyn, rag yndellma y tegoedh dhyn kollenwel pub ewnder.’ Ena ev a assentyas. 16Ha Yesu pan o besydhys a sevis yn-bann yn-mes a'n dowr dihwans; hag otta, an nevow a veu igerys dhodho, hag ev a welas Spyrys Duw ow tiyskynna avel kolomm hag ow tos warnodho; 17hag awotta lev yn-mes a'n nevow ow leverel, ‘Hemm yw ow Mab karadow, mayth usi ynno ow delit.’