Temptyans Yesu

Mark 1:12-13; Luk 4:1-13

1Ena Yesu a veu hembrenkys yn-bann dhe'n gwylvos gans an Spyrys dhe vos temptys gans an jowl. 2Ha pan wrussa penys dew-ugens dydh ha dew-ugens nos, a-wosa ev a borthas nown. 3Ha'n tempter a dheuth dhodho ha leverel, ‘Mars osta Mab Duw, lavar dhe'n veyn ma bos gwrys bara.’ 4Mes ev a worthybis ow leverel, ‘Skrifys yw,

“Mab-den ny wra bewa unnsel orth bara,

saw orth pub ger a dheu yn-mes a anow Duw.” ’

5Ena an jowl a'n kemmeras dhe'n sita sans hag a'n settyas war bynakyl an tempel, 6hag yn-medh ev dhodho, ‘Mars osta Mab Duw, omdowl dha honan yn-nans, rag skrifys yw,

“Ev a worhemmynn dh'y eledh a-dro dhis,

hag yn aga diwla i a'th teg yn-bann

ma na weski dha droes erbynn men.” ’

7Yesu a leveris dhodho, ‘Arta skrifys yw, “Ny wredh temptya an Arloedh dha Dhuw.” ’

8Arta an jowl a'n kemmeras dhe venydh pur ughel ha diskwedhes dhodho oll gwlaskordhow an bys ha'ga splannder, 9ha leverel dhodho, ‘Oll an re ma my a vynn ri dhis mar koedhydh dhe'n dor ha'm gordhya.’ 10Ena yn-medh Yesu dhodho, ‘Voyd alemma, Satnas; rag skrifys yw,

“Ty a wra gordhya an Arloedh dha Dhuw

hag ev yn unnsel ty a wra servya.” ’

11Ena an jowl a'n gasas hag otta, eledh a dheuth dh'y servya.

Dalleth an Pregoth yn Galile

Mark 1:14-15; Luk 4:14-15

12Ha pan glewas bos Yowann dalghennys, ev a omdennas dhe Alile. 13Ha wosa gasa Nazareth ev eth dhe driga yn Kapernaum ryb an mor yn oryon Zebulun ha Naftali, 14may fe kollenwys an dra kewsys dre Ysay an profoes, ow leverel,

15‘Pow Zebulun ha pow Naftali,

fordh an mor a'n tu arall dhe'n Yordan,

Galile an Jentilys:

16an bobel esedhys yn tewolgow

re welas golow bras,

ha war an re esedhys yn tir ha skeus ankow

yma golow drehevys yn-bann.’

17Alena rag, Yesu a dhallathas pregoth ha leverel, ‘Koedhewgh yn edrek, rag gwlaskor nev re dheuth nes.’

Galow Peswar Pyskador

Mark 1:16-20; Luk 5:1-11

18Hag ev ow kerdhes ryb mor Galile a welas dew vroder, Simon, gelwys Peder hag Androw y vroder, ow tewlel roes y'n mor; rag pyskadoryon ens i. 19Hag ev a leveris dhedha, ‘Dewgh war ow lergh, ha my a'gas gwra pyskadoryon a dus.’ 20A-dhesempis i a asas an roesow hag a'n siwyas 21Hag ev ow mones yn-rag alena a welas dew vroder arall, Jamys mab Zebede ha Yowann y vroder, yn gorhel gans Zebede aga thas owth ewnhe aga roesow; hag ev a's gelwis. 22Ha desempis i a asas an gorhel ha'ga thas hag a'n siwyas.

Menystra dhe Routh Veur

Luk 6:17-19

23Hag yth esa ow mos a-dro dres oll Galile ow tyski yn aga synagys ha pregoth aweyl an wlaskor ha sawya pub kleves ha pub dises yn mysk an bobel, 24ha'n son anodho a omlesas dres oll Syria, hag i a dhros dhodho oll an dus plagys gans lies eghenn a glevesow ha tormentys, ha'n re dalghennys gans dywolow, ha'n loerogyon ha'n balsyon, hag ev a's sawyas. 25Ha routhow bras a'n siwyas, dhiworth Galile ha Dekapolis ha Yerusalem ha Yudi, ha dhiworth an tu arall dhe'n Yordan.