An Pregoth war an Menydh

1Ha pan welas an routhow, ev a yskynnas dhe'n menydh, ha wosa ev dhe esedha y dhyskyblon a dheuth dhodho; 2hag ev a igoras y anow ha'ga dyski, ow leverel,

An Gwynnvysow

Luk 6:20-23

3‘Gwynn aga bys an re yw boghosek yn spyrys, rag dhedha i yw gwlaskor nev.

4‘Gwynn aga bys an re usi ow kalari, rag i a vydh konfortys.

5‘Gwynn aga bys an re yw klor, rag i a erit an norvys.

6‘Gwynn aga bys an re a berth nown ha syghes ow yeuni war-lergh ewnder, rag i a vydh lenwys.

7‘Gwynn aga bys an re yw tregeredhus, rag i a gyv tregeredh.

8‘Gwynn aga bys an re pur aga holonn, rag i a wel Duw.

9‘Gwynn aga bys gwrioryon kres, rag i a vydh gelwys fleghes Duw.

10‘Gwynn aga bys an re helghys drefenn ewnder, rag dhedha i yw gwlaskor nev.

11‘Gwynn agas bys pan y'gas despityons ha'gas helghya ha leverel pub eghenn a dhrog gans gow er agas pynn a-barth dhymmo vy. 12Lowenhewgh ha bedhewgh pur heudhik, rag meur yw agas gober y'n nevow, rag yndella y hwrussons helghya an brofoesi neb a veu kyns agas prys hwi.

Hoelan ha Golow

Mark 4:21, 9:50; Luk 8:16-17, 11:33-36, 14:34-35

13‘Hwi yw hoelan an bys; mes mar kollas an hoelan y vlas, py ganso y fydh ev sellys? Nyns yw 'vas na fella dhe dravyth marnas dhe vos tewlys dhe-ves ha trettys gans tus.

14‘Hwi yw golow an bys. Ny yll bos kudhys sita a vo settys war venydh; 15na ny wra tus enowi lugarn ha'y gorra yn-dann vushel, mes war an kantolbrenn, ha hi a re golow dhe gemmys a vo y'n chi. 16Yndella re derlentro agas golow a-rag tus may hwellons agas oberow da ha gordhya agas Tas eus y'n nevow.

Dyskas a-dro dhe'n Lagha

17‘Na dybewgh my dhe vos devedhys rag diswul an lagha na'n brofoesi; ny dheuth vy dhe dhiswul saw dhe gollenwel. 18Rag yn hwir my a lever dhywgh, bys pan dremenno nev ha nor, ny dremen unn jet na banna dhiworth an lagha erna vo kowlwrys pup-tra oll. 19Rakhenna piwpynag a dorro onan a'n gorhemmynnow lyha ma ha dyski dhe dus gul yndella, ev a vydh gelwys an lyha yn gwlaskor nev, mes piwpynag a's gwrello ha'ga dyski, an keth den na a vydh gelwys meur yn gwlaskor nev. 20Rag my a lever dhywgh, marnas agas ewnder a vo moy ages henna a'n skribys ha'n Fariseow, ny wrewgh mos a-bervedh yn gwlaskor nev.

Dyskas a-dro dhe Sorr; Breus hag Akord

21‘Hwi re glewas bos leverys dhe dus an termyn koth, Na ladh; ha piwpynag a lattho yma yn peryll a vreusyans. 22Mes my a lever dhywgh, Piwpynag a sorro orth y vroder heb ken5:22 War-lergh re a'n dornskrifow nyns usi omma an geryow heb ken. dhe vos yn peryll a vreusyans, ha piwpynag a lavarro dh'y vroder, “Raka”,5:22 Raka: Po Penn-koeg (Aramaek). dhe vos yn peryll a'n Sanhedrin; mes piwpynag a lavarro, “Ty foll” dhe vos yn peryll a dan ifarn.5:22 a dan ifarn: Greka a'n Gehenna a dan. 23Ytho mars esos ow profya dha ro dhe'n alter hag ena ty a berth kov bos gans dha vroder neppyth er dha bynn, 24gas ena dha ro a-dherag an alter, ha ke yn-kerdh; kyns oll, bydh unnverhes gans dha vroder hag ena deus dhe offrynna dha ro. 25Bydh unnverhes gans dha eskar toeth da ha ty ow kerdhes war an fordh war-barth ganso, rag own dha eskar dhe'th taskorr dhe'n breusydh ha'n breusydh dha dhaskorr dhe'n gwithyas ha ty dhe vos tewlys yn prison. 26Yn hwir y lavarav dhis, ny wre'ta dos yn-mes alena bys may tylli an ferdhynn5:26 ferdhynn: Greka kodrantes. diwettha.

Dyskas a-dro dhe Avoutri

27‘Hwi re glewas bos leverys, “Na wra avoutri.” 28Mes my a lever dhywgh, Neb a vir orth benyn gans drokhwans re wrug avoutri seulabrys gensi yn y golonn. 29Ha dha lagas dyghow mar kwra dha sklandra, tenn e mes ha towl e dhiworthis; rag y fydh dhe les dhis onan a'th eseli dhe vos dhe goll, ha na vo tewlys oll dha gorf yn ifarn;5:29-30 ifarn: Greka Gehenna. 30ha mar kwra dha leuv dhyghow dha sklandra, trogh hi dhe-ves ha towl hi dhiworthis, rag y fydh dhe les dhiso onan a'th eseli dhe vos dhe goll, ha na vo tewlys oll dha gorf yn ifarn.5:30 ha na vo tewlys oll dha gorf yn ifarn: War-lergh re a'n dornskrifow ha nag ello dha gorf dhe ifarn.

Dyskas a-dro dhe Dhidhemmedhyans

Mat 19:9; Mark 10:11-12; Luk 16:18

31‘Ynwedh y feu leverys, “Neb a worro dhe-ves y wreg, gwres ev ri dhedhi skrifedh didhemmedhyans.” 32Mes my a lever dhywgh, Piwpynag a worro dhe-ves y wreg marnas dijastita, ev a's gwra avoutres; ha neb a dhemmettho benyn dhidhemmedhys, ev a wra avoutri.

Dyskas a-dro dhe Liow

33‘Arta, hwi re glewas bos leverys dhe dus an termyn koth, “Na dorr dha di, mes ty a dal kewera tiow gwrys dhe'n Arloedh.” 34Mes my a lever dhywgh, Na wrewgh tiow mann: naneyl re'n nev, rag esedh Duw ywa, 35na re'n dor, rag skavell y dreys yw ev, na re Yerusalem, rag sita an Myghtern meur yw hi, 36naneyl na wra ti re'th penn, rag ny yll'ta gul dhe unn vlewenn bos naneyl gwynn na du. 37Mes bedhes agas lavar, Yw, yw, Nag yw, nag yw; ha pup-tra oll eus pella es henna, a'n tebel el5:37 a'n tebel el: Po a'n drog. ywa.

Dyskas a-dro dhe Dhial

Luk 6:29-30

38‘Hwi re glewas bos leverys, “Lagas rag lagas ha dans rag dans.” 39Mes my a lever dhywgh, Na sevewgh erbynn neb yw drog, saw piwpynag a'th wesko war dha vogh dhyghow, treyl dhodho hy ben ynwedh; 40ha mar mynn nebonan dha siwya dre lagha ha doen dha bows dhiworthis, ro dhodho dha vantell ynwedh; 41ha neb a'th konstrynno dhe lavurya unn mildir, ke ganso dew. 42Ro dhe neb a wovynno orthis, ha na wra omdenna dhiworth an den a vynnsa chevisya ahanas.

Kerensa dhe Eskerens

Luk 6:27-28, 32-36

43‘Hwi re glewas bos leverys, “Ty gwra kara dha gentrevek ha kasa dha eskar.” 44Mes my a lever dhywgh, Kerewgh agas eskerens ha pysewgh rag an re a wra agas helghya, 45may hallowgh hwi bos mebyon agas Tas eus y'n nevow, rag ev a wra dh'y howl drehevel keffrys war an re dhrog ha'n re dha, hag a dhannvon an glaw war an re ewnhynsek ha'n re gammhynsek. 46Rag mar kerewgh an re usi orth agas kara hwi, pana wober a'gas bydh? A ny wra ynwedh an dolloryon an keth tra? 47Ha mar ny salusewgh marnas agas breder, pandra moy a wrewgh hwi es dell wra tus erell? A ny wra ynwedh an Jentilys5:47 an Jentilys: War-lergh re a'n dornskrifow an dolloryon. an keth tra? 48Rakhenna, bedhewgh hwi perfydh kepar dell yw agas Tas a nev perfydh.