Dyskas a-dro dhe Alusen

1‘Gwaytyewgh na wryllowgh agas oberow da a-rag tus rag bos gwelys gansa; poken ny'gas bydh gober vyth dhiworth agas Tas eus y'n nevow.

2‘Rakhenna ty pan rylli alusen, na hwyth korn a-dheragos kepar dell wra an falswesyon a-bervedh y'n synagys hag y'n stretys, may hallons kavoes gordhyans dhiworth tus. Yn hwir y lavarav dhywgh, i re's teva aga gober. 3Mes ty pan rylli dha alusen, na as dha leuv gledh dhe wodhvos pandr'a wra dha leuv dhyghow, 4rag may fo dha alusen yn-dann gel; ha'th Tas neb a wel yn-dann gel a attal dhis.6:4 a attal dhis: War-lergh re a'n dornskrifow a attal dhis yn apert.

Dyskas a-dro dhe Bysadow

Luk 11:2-4

5‘Ha ty pan byssi, na vydh6:5 Ha ty pan byssi, na vydh: War-lergh re a'n dornskrifow Ha hwi pan byssowgh, na vedhewgh. avel an falswesyon, rag i a gar pysi ow sevel a-bervedh y'n synagys ha war gernow an stretys, may hallons bos gwelys gans tus; yn hwir y lavarav dhywgh, i re's teva aga gober. 6Mes ty pan byssi, ke a-ji dhe'th chambour ha wosa degea dha dharas, gwra pysi dhe'th Tas usi yn-dann gel, ha'th Tas a wel yn-dann gel a attal dhis.6:6 a attal dhis: War-lergh re a'n dornskrifow a attal dhis yn apert.

7‘Ha hwi pan byssowgh, na glappyewgh gans geryow euver avel an baganys, rag i a dyb i dhe vos klewys der aga geryow pals. 8Na vedhewgh ytho avella i, rag agas Tas a woer pandr'a fyll dhywgh kyns es hwi dhe wovynn orto.

9‘Yn kettellma ytho, gwrewgh pysi:

Agan Tas ni eus y'n nevow,

sanshes re bo dha hanow;

10re dheffo dha wlaskor;

dha vodh re bo gwrys,

yn nor kepar hag yn nev.

11Ro dhyn ni hedhyw agan bara pub-dydhyek;

12ha gav dhyn agan kendonow

kepar dell evyn ni ynwedh dh'agan kendonoryon.

13Ha na wra agan dri yn temptasyon,

mes delirv ni dhiworth drog.6:13 drog: Po an tebel el. War-lergh re a'n dornskrifow yma omma an geryow Rag dhiso jy yw an wlaskor, ha'n galloes, ha'n gordhyans, bys vykken ha bynnari. Amen.

14Rag mara kwrewgh gava dhe dus aga hammwriansow, agas Tas a nev a wra gava dhy'hwi ynwedh; 15mes mar ny wrewgh gava dhe dus aga hammwriansow,6:15 War-lergh re a'n dornskrifow nyns usi omma an geryow aga hammwriansow. na byth moy ny wra agas Tas gava dhywgh agas kammwriansow hwi.

Dyskas a-dro dhe Benys

16‘Ha pan wryllowgh penys heb dybri, na vedhewgh avel an falswesyon, trist aga semlans, rag i a dhifas aga bejeth may hallons bos gwelys gans tus, i dhe wul penys; yn hwir y lavarav dhywgh, i re's teva aga gober. 17Mes ty pan wrylli penys, gwra ura dha benn ha golgh dha fas, 18ma na vo apert dhe dus ty dhe wul penys, saw dhe'th Tas, usi yn-dann gel; ha'th Tas neb a wel yn-dann gel a attal dhis.6:18 a attal dhis: War-lergh re a'n dornskrifow a attal dhis yn apert.

Tresor yn Nev

Luk 12:33-34

19‘Na guntellewgh dhywgh agas honan tresoryow war an nor, le may ma goedhan ha gossen ow tiswul ha may hwra ladron terri a-bervedh ha ladra. 20Mes kuntellewgh dhywgh tresoryow yn nev, le na wra goedhan na gossen diswul, na ladron terri a-bervedh ha ladra; 21rag le may ma agas tresor,6:21 agas tresor: War-lergh re a'n dornskrifow dha dresor. ena y fydh agas kolonn6:21 agas kolonn: War-lergh re a'n dornskrifow dha golonn. ynwedh.

Golow an Korf

Luk 11:34-36

22‘Lugarn an korf yw an lagas. Rakhenna mars yw yagh dha lagas, oll dha gorf a vydh leun a wolow; 23mes dha lagas mars yw anyagh, oll dha gorf a vydh leun a dewlder. Rakhenna mars yw an golow usi ynnos tewolgow, ass yw meur an tewolgow na!

Duw ha Mammon

Luk 16:13

24‘Ny yll denvyth servya dew vester; rag poken ev a gas an eyl ha kara y gila, po lel yw dhe'n eyl hag ev a dhispres y gila. Ny yllowgh servya ha Duw ha mammon.

Fienasow ha Preder

Luk 12:22-34

25‘Rakhenna my a lever dhywgh, na wrewgh mos yn prederow a-dro dh'agas bewnans pandr'a dhebrowgh na pandr'a evowgh, na byth moy a-dro dh'agas korf pandr'a wiskowgh. A nyns yw bewnans moy ages boes, ha'n korf ages dillas? 26Mirewgh orth ydhyn an ayr: ny wrons i gonis has na mysi na kuntell travyth yn skiberyow, hwath agas Tas a nev a's mag. A nyns owgh hwi moy agas pris agessa i? 27Ha piw ahanowgh hag ev ow prederi a yll keworra pols vyth dhe dhydhyow y vewnans?6:27 a yll keworra pols vyth dhe dhydhyow y vewnans? Po a yll moghhe y hys a unn kevelin? 28Ha prag yth owgh hwi prederus a-dro dhe dhillas? Merkewgh lili an gwel, fatell wrons i tevi; ny lavuryons ha ny nedhons; 29mes yn-medhav dhywgh, nyns o Solomon yn oll y splannder gwiskys kepar hag onan a'n re ma. 30Ytho mar kweth Duw yndella gwels an gwelyow, yw bew hedhyw ha tewlys yn forn a-vorow, a ny wra ev meur dhe voy agas kwetha hwi, A hwi a voghes fydh? 31Ytho na vedhewgh gyllys yn prederow, ow leverel, “Pandr'a dhybryn”, po “Pandr'a evyn”, po “Py ganso y fydhyn gwiskys?” 32Rag oll an taklow ma, an kenedhlow a's hwila; ha'gas Tas a nev a woer bos edhomm dhywgh a oll an taklow ma. 33Mes kyns oll hwilewgh gwlaskor Duw ha'y ewnder, hag oll an taklow ma a vydh res dhywgh maga ta. 34Na vedhewgh ytho prederus a'n vorow, rag an vorow a breder anedhi hy honan; lowr dhe'n jydh yw y dhrog ev y honan.