Breusi Tus Erell

Luk 6:37-38, 41-42

1‘Na wrewgh breusi ma na vewgh hwi breusys; 2rag gans an vreus may hwrewgh hwi breusi dredhi, hwi a vydh breusys, ha gans an musur may fusurowgh hwi ganso, y fydh musurys dhy'hwi. 3Ha prag y hwre'ta mires orth an motta usi yn lagas dha vroder, mes ny verkydh an geber usi yn dha lagas dha honan? 4Po fatell yll'ta jy leverel dhe'th vroder, “Gas vy dhe denna an motta yn-mes a'th lagas”, hag awotta'n geber y'th lagas dha honan? 5Ty falswas! Kyns oll towl an geber yn-mes dhiworth dha lagas tejy hag ena y hwelydh diblans rag tewlel an motta yn-mes a lagas dha vroder. 6Na rewgh dhe'n keun an pyth yw sans, ha na dewlewgh agas perlys a-rag mogh, rag own i dh'aga threttya yn-dann dreys ha treylya dh'agas skwardya hwi.

Govynn, Hwila, Knouk

Luk 11:9-13

7‘Govynnewgh hag y fydh res dhywgh, hwilewgh ha hwi a gyv, knoukyewgh hag y fydh igerys dhywgh; 8rag peub neb a wovynn a dhegemmer, ha neb a hwila a gyv, ha dhe neb a gnouk y fydh igerys. 9Po py den eus ahanowgh, orto mar kovynn y vab bara, a re dhodho men? 10Po mar kovynn ev pysk, a re dhodho sarf? 11Hwi, ytho, ow pos drog, mar kodhowgh ri rohow da dh'agas fleghes, pygemmys moy y re agas Tas y'n nevow dhe'n re a wovynn orto! 12Kekemmys ytho a vynnowgh orth tus gul ragowgh hwi, henna gwrewgh ragdha i; rag hemm yw an lagha ha'n brofoesi.

An Porth Kul

Luk 13:24

13‘Ewgh a-bervedh der an porth kul; rag ledan yw an porth hag efan yw an fordh a led dhe dhiswrians ha lies yw an re a wra entra dredhi; 14mes kul yw an porth hag ynn yw an fordh a led dhe vewnans, ha tanow yw an re a's kyv.

Gwydhenn Godhvedhys dre hy Frut

Luk 6:43-44

15‘Bedhewgh war a fals profoesi, neb a dheu dhywgh yn gwisk deves, mes war-ji yth yns i bleydhi ow ravna. 16Hwi a wra aga aswonn der aga frut. A guntellir grappys dhiworth spern po figys dhiworth askall? 17Yn kettella pub gwydhenn dha a dheg frut da, mes gwydhenn bodrek a dheg drog frut. 18Ny yll gwydhenn dha doen drog frut, na byth moy ny yll gwydhenn bodrek doen frut da. 19Pub gwydhenn na dheg frut da a vydh treghys dhe'n dor ha tewlys y'n tan. 20Herwydh aga frut ytho hwi a's aswonn.

Bythkweth ny'gas Aswonnis

Luk 13:25-27

21‘Nyns a a-bervedh yn gwlaskor nev pubonan a lever dhymm, “Arloedh, Arloedh”, mes ev neb a wra bodh ow Thas eus yn nevow. 22Lies huni a lever dhymm y'n jydh na, “Arloedh, Arloedh, a ny wrussyn profoesa yn dha hanow jy, hag yn dha hanow tewlel yn-mes dywolow, hag yn dha hanow gul meur a oberow galloesek?” 23Hag ena my a dheklar dhedha, “Bythkweth ny'gas aswonnis; diberthewgh dhiworthiv, hwi dhrogoberoryon!”

An Re a Woslow ha'n Re a Ober

Luk 6:47-49

24‘Pubonan ytho a woslow ow geryow ma hag a's gwra, a vydh hevelebys dhe wour fur neb a dhrehevis y ji war an garrek; 25ha'n glaw a goedhas ha'n livow a dheuth ha'n gwynsow a hwythas ha deghesi war an chi na mes ev ny goedhas, rag y vos selys war garrek. 26Ha pubonan a woslow ow geryow ma mes heb aga gul a vydh hevelebys dhe wour foll neb a dhrehevis y ji war dir tewesek; 27ha'n glaw a goedhas hag y teuth an livow, ha'n gwynsow a hwythas ha deghesi war an chi na, hag ev a goedhas, ha meur o an terroes anodho.’

28Ha pan worfennas Yesu an lavarow ma, an bobel a's tevo marth a'y dhyskas; 29rag yth esa ev orth aga dyski kepar hag onan a'n jevo galloes ha na kammenn vyth avel aga skribys.