Glanhe Den Klavorek

Mark 1:40-45; Luk 5:12-16

1Ha wosa ev dhe dhiyskynna a'n menydh, routhow bras a'n siwyas. 2Hag awotta den klavorek ow tos nes a blegyas dhe'n leur a-dheragdho ha leverel, ‘Arloedh, mar mynnydh, ty a yll ow glanhe.’ 3Ha Yesu8:3 Ha Yesu: War-lergh re a'n dornskrifow Hag ev. owth ystynn i leuv a'n tochyas ha leverel, ‘Mynnav, bydh glan’; ha dihwans y lovryjyon a veu glanhes. 4Hag yn-medh Yesu dhodho, ‘Gorwith na leverri ger dhe dhenvyth, mes ke hag omdhiskwa dha honan dhe'n oferyas ha doro dha ro a ordenas Moyses, avel dustuni dhedha.’

Yaghheans Kethwas Penn-kangour

Luk 7:1-10; Yow 4:43-54

5Ha pan eth ev a-bervedh yn Kapernaum, y teuth dhodho penn-kangour, orth y bysi, 6ha leverel, ‘Arloedh, yma ow gwas vy a'y wrowedh palsyes y'n chi, ow kodhevel yn tynn.’ 7Hag yn-medh ev dhodho, ‘Yth av dh'y yaghhe.’ 8Ha'n penn-kangour a worthybis ow leverel, ‘Arloedh, nyns ov vy gwiw ty dhe dhos yn-dann ow tho, lemmyn ty na wra saw unnsel leverel an ger ha'm gwas a vydh gwrys yagh. 9Rag my ynwedh yw den yn-dann awtorita, hag a'm beus soudoryon yn-dannov, ha my a lever dhe onan, “Ke”, ha mos a wra, ha dhe arall, “Deus”, ha dos a wra, ha dhe'm kethwas, “Gwra hemma”, hag ev a'n gwra.’ 10Yesu pan glewas henna, marth a'n jeva, hag yn-medh ev dhe'n re a'n siwya, ‘Yn hwir y lavarav dhywgh, ny gevis vy kemmys fydh, na hwath yn Ysrael. 11Ha my a lever y teu meur a dus dhiworth an howldrevel ha'n howlsedhes hag esedha orth moes gans Abraham hag Ysak ha Yakob yn gwlaskor nev, 12mes mebyon an wlaskor a vydh tewlys yn-mes dhe'n tewlder pella; ena y fydh oelva ha skrinva dyns.’ 13Hag yn-medh Yesu dhe'n penn-kangour, ‘Ke; ha kepar dell gryssys bedhes gwrys dhis.’ Ha'y was a veu gwrys yagh y'n keth eur na.

Yaghheans Lies Den

Mark 1:29-34; Luk 4:38-41

14Ha Yesu ow tos dhe ji Peder, a welas y hweger ev a'y growedh grevys gans fevyr; 15hag ev a dochyas hy leuv, ha'n fevyr a's gasas; ena hi a sevis yn-bann ha'y servya ev. 16Pan o devedhys an gorthugher i a dhug dhodho lies sagh dyowl; hag ev a dewlis yn-mes an spyrysyon gans ger ha sawya oll an glevyon, 17may fe kollenwys an dra kewsys der Ysay an profoes ow leverel, ‘Ev y honan a gemmeras agan gwannegredh hag a borthas agan klevesow.’

Holyoryon Yesu

Luk 9:57-62

18Ha pan welas Yesu routh8:18 routh: War-lergh re a'n dornskrifow routhow bras. a-dro dhodho, ev a ros gorhemmynn dhe omdenna dhe'n lann arall. 19Hag unn skriba a dheuth ha leverel dhodho, ‘Mester, my a wra dha holya pyle pynag yth ylli.’ 20Hag yn-medh Yesu dhodho, ‘Dhe'n lewern yma tell, ha neythow dhe ydhyn an ayr, mes dhe Vab an den nyns eus le may hyll powes y benn ynno.’ 21Onan arall a'y dhyskyblon a leveris dhodho, ‘Arloedh, gas vy kyns oll dhe vos dhe ynkleudhyas ow thas.’ 22Mes Yesu a leveris dhodho, ‘Ty gwra ow holya, ha gas dhe'n re varow ynkleudhyas aga thus varow aga honan.’

Yesu a Goselha Annawel

Mark 4:35-41; Luk 8:22-25

23Ena ev a yskynnas yn gorhel ha'y dhyskyblon a'n siwyas. 24Hag awotta, annawel veur a sevis, may feu kudhys an gorhel gans tonnow, mes yth esa ev ow koska. 25Ha'y dhyskyblon8:25 Ha'y dhyskyblon: War-lergh re a'n dornskrifow Hag i. a dheuth, hag a wrug dhodho difuna, ow leverel, ‘Arloedh, salw ni, kellys on!’ 26Yn-medh ev dhedha, ‘Prag yth owgh hwi mar ownek, hwi a voghes fydh?’ Ena ev a sevis ha keredhi an gwynsow ha'n mor, hag y feu kalmynsi meur. 27Marth a gemmeras an dus, hag yn-medhons, ‘Py par den yw hemma, mayth yw gostydh dhodho keffrys an mor ha'n gwynsow?’

Yaghheans an Gadarenys Tormentys gans Dywolow

Mark 5:1-20; Luk 8:26-39

28Pan ova devedhys dhe'n lann arall, dhe Bow an Gadarenys,8:28 Gadarenys: War-lergh re a'n dornskrifow Gergasenys po Gerasenys. y teuth er y bynn dew sagh dyowl, ow tos yn-mes a'n bedhow, gwyls dres eghenn, ma na ylli nebonan tremena war an fordh na. 29Hag i a armas ow leverel, ‘Pandr'a vynnydh tejy genen ni, A Vab Duw? Osta devedhys omma rag agan tormentya kyns an termyn?’ 30Mes neb pellder dhiworta yth esa flokk veur a vogh ow peuri. 31Ha'n dhywolow a'n pysis ow leverel, ‘Mara kwredh agan tewlel yn-mes, dannvon ni a-bervedh yn flokk an mogh.’ 32Hag yn-medh ev dhedha, ‘Ewgh ytho.’ Hag ow tos yn-mes, yth ethons a-bervedh y'n mogh; hag oll an flokk a boenyas gwyls yn-nans dres an lann serth bys y'n mor, ha merwel y'n dowrow. 33Ha'n vugeledh a fias dhe'n fo ha mos dhe'n sita ha derivas pup-tra, keffrys ha'n pyth o hwarvedhys dhe'n dus dalghennys gans dywolow. 34Hag otta, oll an sita a dheuth yn-mes rag dyerbynna Yesu; ha pan y'n gwelsons, i a'n pysis a omdenna yn-mes a'ga oryon.