1Hemm yw ger an Arloedh a dheuth dhe Mika a Moresheth yn dydhyow Yotham, Ahaz ha Hezekia, myghternedh Yuda, an pyth a welas a-dro dhe Samaria ha Yerusalem.

Breus erbynn Samaria ha Yerusalem

2Klewewgh, hwi boblow oll!

Goslow, A norvys, ha pup-tra eus ynno!

Bedhes an Arloedh Duw test er agas pynn,

an Arloedh a'y dempel sans.

3Rag otta, yma an Arloedh ow tos yn-mes a'y le,

ha diyskynna ha stankya war tylleryow ughel an norvys.

4Ha'n menydhyow a wra teudhi yn-danno

ha'n nansow a vydh folsys,

avel koer a-rag an tan,

avel dowrow diverys war leder serth.

5Yth yw hemma oll drefenn treuspassow Yakob

ha drefenn peghadow chi Ysrael.

Pyth yw treuspass Yakob?

A nyns ywa Samaria?

Ha pyth yw tylleryow ughel Yuda?

A nyns yns i Yerusalem?1:5 War-lergh an Septuagint Ha pyth yw treuspass chi Yuda? Ha nyns ywa Yerusalem?

6Rakhenna y hwrav a Samaria karnedh y'n gwel,

tyller rag plansa gwinbrennyer;

ha my a dhinwa hy meyn y'n nans,

ha diskudha hy selyow.

7Oll hy imajys gravys a vydh terrys dhe demmyn,

oll hy gobrow a vydh leskys dre dan,

hag oll hy imajys a dhiswrav;

rag hi a's kuntellas dhiworth gober hora,

ha dhe wober hora y tehwelons.

8Rag hemma y hwrav vy galari ha kyni;

mos a wrav dieskis ha lomm,

my a wra kynvann avel an owrgeun,

ha drem avel an strusyow.

9Rag ny yll hy goli bos yaghhes,

ha re dheuth dhe Yuda,

ha drehedhes dhe yet ow fobel,

bys yn Yerusalem.

An Eskar ow Tos Nes

10Na dherivewgh e yn Gath,

na oelewgh kammenn vyth;

yn Beth-le-afra

omrolyewgh y'n doust!

11Tremen, annedhyades Shafir,

yn noeth, methek!

Ny dheuth yn-mes

annedhyades Sanan;

kynvann Beth-esel

a gemmer dhiworthowgh y savla.

12Rag annedhyades Maroth

a worta dader yn prederus,

drefenn droktra re dheuth war-nans a'n Arloedh bys yn yet Yerusalem.

13Herness an margh skav dhe'n charett,

annedhyades Lakish;

dalleth peghes re beus

dhe vyrgh Sion,

rag ynnos y feu kevys

treuspassow Ysrael.

14Rakhenna ty a re rohow-dibarth

dhe Moresheth-gath;

chiow Akzib a vydh toell

dhe vyghternedh Ysrael.

15Hwath y trov warnas an trygher,

annedhyades Maresha;

bys yn Adullam

y teu golewder Ysrael.

16Omvoelha, ha trogh dha wols

rag an vebyon a'th telit;

omwra maga foel avel er,

rag i res eth a-dhiworthis bys yn divroedh.