Rewloryon Dhrog ha Fals Profoesi

1Hag y leveris vy:

Klewyewgh, hwi bennow a Yakob,

ha rewloryon chi Ysrael!

A nyns yw ragowgh hwi dhe aswonn gwirvreus? –

2hwi neb a gas dader ha kara drogedh,

neb a skward an groghen dhiworta,

ha'ga hig dhiworth aga eskern;

3neb a dheber kig ow fobel,

ha pilya aga kroghen dhiworta,

ha terri aga eskern yn temmigow

ha'ga nadha avel kig yn chek,

avel kig yn kalter.

4Ena, i a gri dhe'n Arloedh

mes ny wra ev gorthybi dhedha;

ev a gudh y fas a-dhiworta an prys na,

drefenn i dhe wul aga drog weythresow.

5Yndella yn-medh an Arloedh a-dro dhe'n brofoesi

neb a hembronk ow fobel yn sowdhan,

neb a gri ‘Kres’

pan y's teves neppyth dhe dhybri,

mes i a wra gwerrya

orth seul na worr travyth yn aga ganow.

6Rakhenna, y fydh nos dhywgh, heb gwelesigeth,

ha tewlder dhywgh, heb dewinieth.

An howl a wra sedhi war an brofoesi,

ha'n jydh a vydh du a-ughta;

7an dhargenysi a vydh diskrassyes,

ha'n goelyogyon shamys;

i oll a wra kudha aga diwweus,

rag nyns eus gorthyp a Dhuw.

8Saw my, lenwys a alloes ov vy,

a spyrys an Arloedh,

a wirvreus ha nerth,

rag disklerya dhe Yakob y gammweythres

ha dhe Ysrael y beghadow.

9Klewyewgh hemma, hwi bennow a ji Yakob

ha rewloryon chi Ysrael,

neb a gas gwirvreus

ha kamma pup-tra yw ewn,

10neb a dhrehav Sion gans goes

ha Yerusalem gans kammhynseth.

11Hy fennow a re breus rag falswober,

hy oferysi a dhysk rag arveth,

hy frofoesi a dhargan rag arghans;

hag i ow poesa war an Arloedh, ow leverel,

‘A nyns usi an Arloedh yn agan mysk?

Ny wra drog vyth dos warnan.’

12Rakhenna, a-barth dhywgh hwi,

Sion a vydh erys par ha gwel;

Yerusalem a dheu ha bos bern a vagoryow, Arloedh ha menydh an chi3:12 menydh an chi: Henn yw menydh an tempel. a vydh drumm gwydhyel.