An Arloedh ow Reynya yn Kres

1Y'n dydhyow diwettha,

menydh chi an Arloedh

a vydh fastys avel penn an menydhyow,

hag y fydh drehevys yn-bann dres an breow,

ha poblow a dheu dhodho yn fros.

2Kenedhlow pals a dheu, ha leverel,

‘Dewgh, ha deun ni yn-bann dhe venydh an Arloedh,

ha dhe ji Duw Yakob;

hag ev a dhysk dhyn y fordhow,

ha ni a gerdh yn y hynsyow.’

Rag yn-mes a Sion y teu lagha,

ha ger an Arloedh dhiworth Yerusalem.

3Hag ev a vydh breusydh yntra meur a boblow,

ha mayn yntra kenedhlow krev a-bell.

I a wysk aga kledhedhyow yn soghyow,

ha'ga guwow yn higow-skethra.

Ny dhrehav kenedhel kledha erbynn kenedhel,

ha ny dhyskons gwerrya na moy.

4Pub den a esedh yn-dann y winbrenn

hag yn-dann y figbrenn y honan,

ha denvyth ny wra dhodho perthi own;

rag ganow Arloedh an luyow re gewsis.

5Rag an poblow oll a gerdh,

pubonan yn hanow y dhuw;

mes ni a gerdh yn hanow an Arloedh agan Duw ni,

bys vykken ha bynnari.

Dehwelyans Ysrael wosa an Divroedh

6Y'n jydh na, yn-medh an Arloedh,

my a guntell an evredhyon

ha dri war-barth an re a veu fesyes,

ha'n re a wrugavy aga grevya;

7hag a'n evredhyon y hwrav vy remenant;

ha'n re a veu tewlys dhe skoell, kenedhel grev;

ha'n Arloedh a reyn dresta yn menydh Sion

alemma rag ha bynitha.

8Ha ty, A dour an para,

an bre a vyrgh Sion,

dhiso jy y teu:

y teu dhis an henvestrynses,

ruvaneth myrgh Yerusalem.

Kesstrif Arall gans an Fals Profoesi

9Ytho, prag y kriydh jy yn ughel?

A nyns eus genes myghtern?

A verwis dha gusulyador,

ma'th synsis gloesow avel benyn ow tineythi?

10Gwynnel gwra yn payn ha skrija, A vyrgh Sion,

avel benyn ow tineythi;

rag lemmyn y hwre'ta mos yn-mes a'n sita

ha triga y'n gwel;

yth edh dhe Babylon.

Ena y fydhydh sawys,

ena an Arloedh a'th taspren

a leuv dha eskerens.

11Ha lemmyn kenedhlow pals

re omguntellas er dha bynn,

ow leverel, ‘Bedhes hi disakrys,

re wrello agan dewlagas mires war derroes Sion.’

12Mes ny wodhons i

tybyansow an Arloedh,

ny gonvedhsons y dowl,

ev dh'aga huntell avel manalow dhe'n leur-drushya.

13Sav ha drushya,

A vyrgh Sion,

rag my a vynn gwruthyl dha gorn a horn

ha'th karnow a vrons;

ty a wra brewi lies pobel,

ha sakra aga freydh dhe'n Arloedh,

aga rychys dhe Arloedh an norvys oll.