Kammweythres an Bobel

1Go-vy! Rag deuvev ha bos

avel diwettha kuntell frut an hav,

po kuntell gesigow trevas an grappys,

pan nag eus grappys gesys dhe dhybri,

na figys a-varr a'm beus hwans anedha.

2Gallas an den duwek a'n bys,

ha nyns eus onan ewnhynsek yn mysk tus;

i oll a skolk yn kontrewaytyans rag skoellya goes

ha peub a helgh y vroder gans roes.

3Aga diwla yw sleygh dhe wul drog;

an penntern ha'n breusyas a wovynn falswober,

an den galloesek a lever y vynnas,

hag yndella brasa a wrons dh'y gowlwul.

4An gwella anedha yw haval dhe spedhasenn,

an moyha ewnhynsek haval dhe ge dren.

Dydh dha woelyoryon ha'th kessydhyans yw devedhys:

yma aga deray ow tegynsiwa.

5Na drest yn koweth,

na fydh yn kothman;

gwith porthow dha anow

a'n venyn a bowes war dha askra;

6rag an mab a dhyght y das gans bismer,

an vyrgh a omsav erbynn hy mamm,

an wohydh erbynn hy hweger;

eskerens gour yw tus y ji y honan.

7Byttegyns, my a vynn mires dhe'n Arloedh,

my a worta Duw ow selwyans;

ow Duw a'm klewvydh.

Edrega, ha Fydhyans yn Duw

8Na lowenhewgh a-dro dhymm, ow eskares;

pan goedhav, y savav;

pan esedhav yn tewlder,

an Arloedh a vydh golow dhymm.

9My a berth sorrvann an Arloedh,

drefenn re beghis er y bynn,

bys pan bled ow hen

ha gul breus ragov.

Ev a'm hembronk y'n golow;

y hwelav y ewnder.

10Ena y'n gwel ow eskares,

ha meth a's kudh;

yn-medh hi dhymm,

‘Ple'ma an Arloedh, dha Dhuw?’

Ow dewlagas a lowenha orth hy gweles.

Lemmyn hi a vydh trettys dhe'n dor

haval dhe leys an stretow.

Dargan a Restorita

11Dydh rag drehevel dha fosow!

An jydh na, yth ystynnir an or.

12An jydh na y tons i dhis,

a Assyria ha sitys Ejyp,

hag a Ejyp dhe'n Avon,

a vor dhe vor hag a venydh dhe venydh.

13Mes an tir a vydh ynyal

drefenn y drigoryon,

rag frut aga gwriansow.

14Bugel dha bobel gans dha vagel,

para dha eretons,

hag a drig y honan yn koeswik

y'n kres a dir feyth;

peurens yn Bashan ha Gilead

kepar hag y'n dydhyow koth.

15Avel y'n dydhyow pan dheuthys yn-mes a brow Ejyp,

my a dhiskwedh dhis taklow marthys.

16An kenedhlow a wel ha bos toellys

a'ga galloes oll;

i a worr aga diwla war aga ganow;

aga diwskovarn a vydh bodhar;

17i a lap an doust kepar ha sarf,

kepar ha pedrevanes an dor:

i a dheu ow kwynnel a'ga skovvaow,

a dheu a-rag a'n Arloedh gans krena,

hag own a's tevydh ahanas.

18Py Duw yw haval dhis, ow kava droktra

hag owth ankevi kammwrians

an remenant a'y eretons?

Ny with ev y sorr bynnari,

drefenn bos mall ganso a dregeredh.

19Ev a gemmer truedh ahanan arta,

ha trettya agan drogoberow yn-dann y dreys.

Ty a dewl agan peghosow oll

yn downder an mor.

20Ty a dhiskwa lenduri dhe Yakob

ha tregeredh dhe Abraham,

dell desys dh'agan tasow

a-dhia'n dydhyow koth.