1Dargan Nineve. Lyver gwelesigeth Nahum an Elkoshyas.

Sorr Duw erbynn Nineve

2An Arloedh yw Duw neb a berth avi, hag a gemmer dial;

dialor yw an Arloedh ha meur y sorr;

an Arloedh a gemmer dial war y eskerens,

hag ev a with y sorr erbynn y envi.

3An Arloedh yw lent ow serri, ha meur y nerth,

ha'n Arloedh ny gas mann an debeles heb kessydhyans.

Yma y fordh y'n korwyns hag y'n annawel,

ha'n kommol yw doust y dreys.

4Ev a geredh an mor ha'y sygha,

ha desygha an avonyow oll.

Bashan ha Karmel a wedher

ha bleujenn Lebanon a wedher.

5An menydhyow a dhegren a-ragdho,

ha'n bronnow a deudh:

an dor yw difeythys a-ragdho,

an norvys ha myns eus trigys ynno.

6Piw a yll sevel a-dherag y sorr?

Piw a yll perthi y sorr fers?

Y sorr yw dinewys yn-mes avel tan,

ha terrys dhe demmyn a-ragdho yw an karregi.

7Da yw an Arloedh,

dinas yn dydh anken;

hag ev a aswonn an re a drest ynno ev.

8Mes gans liv ow fenna ev a gowldhistru hy thyller,1:8 hy thyller: Tyller Nineve.

hag ev a helgh y envi bys yn tewlder.

Profoesans erbynn Myghtern Assyria

9Pandr'a dhevisyowgh erbynn an Arloedh?

Ev a gowldhistru;

ny sev ahwer diwweyth.1:9 Po amendyans ny sev y eskerens gweyth arall.

10Rag kepar ha spern kesplethennys,

ha kepar ha diwes pennow medhow,

devorys vydhons, kepar ha sowl fest sygh.

11Yma den gyllys yn-mes ahanas,1:11 yn-mes ahanas: Yn-mes a Nineve.

neb a dewl droktra erbynn an Arloedh,

kusulyador a sherewynsi.1:11 kusulyador a sherewynsi: Ebrow kusulyador a Belial.

Profoesans rag Yuda

12Yndellma y lever an Arloedh:

Kyn fons i krev hag ynwedh lies aga niver,

hwath i a vydh treghys yn-nans,1:12 treghys yn-nans: Ebrow knyvys. ha tremena dhe-ves.

Kyn re'th grevis,

ny wrav dha revya namoy.

13Ha lemmyn my a dregh dhe-ves y yew1:13 y yew: Henn yw, yew Assyria. dhiworthis,

ha terri dhe-ves dha rawyow.

Profoesans erbynn Nineve

14Ha'n Arloedh re ros gorhemmynn y'th kever:

‘Ny vydh has dhiworth dha hanow namoy;

dhiworth chi dha dhuwow y troghav dhe-ves

an imaj gravys ha'n imaj teudh;

my a bareus dha vedh; rag ty yw distyr.’1:14 rag ty yw distyr: Po amendyans rag teylek vydh.

15Awotta, war an menydhyow

treys kannas nowodhow da,

ow terivas kres!

Gwith dha dhy'goelyow, A Yuda,

kollanw dha ambosow,

rag ny dremen an tebelwas1:15 an tebelwas: Ebrow Belial. dredhos nevra namoy;

ev yw treghys dhe-ves yn tien.1:15 An wers ma yw niverys 2:1 y'n tekst ebrow ha'n Septuagint.