Pysadow Nehemia rag Yerusalem

1Geryow Nehemia mab Hakalia. Y'n mis Kislev, y'n ugensves blydhen, pan esen vy yn Shushan an bennsita, 2y teuth Hanani, onan a'm breder, gans sertan tus dhiworth Yuda; ha my a wovynnas orta a-dro dhe'n Yedhewon hag a dhianksa, an re a skapyas an gethneth, hag a-dro dhe Yerusalem. 3Yn-medhons dhymm, ‘An remenant yw gesys a'n gethneth ena y'n rannvro yw yn galar bras ha mewl; ynwedh fos Yerusalem yw terrys dhe'n dor, ha'y yetow leskys gans tan.’

4Pan glewis vy an geryow ma, my a esedhas hag oela, ha kyni dres lies dydh, ha penys ha pysi a-rag Duw nev. 5Yn-medhav, ‘My a'th pys, A Arloedh Duw nev, an Duw bras hag euthyk neb a with kevambos ha tregeredh rag an re a'n kar ha gwitha y worhemmynnow; 6bedhes dha skovarn hewoel ha dha dhewlagas igor rag may klewvi pysadow dha was a bysav a-ragos y'n eur ma dydh ha nos rag fleghes Ysrael dha wesyon, ow konfessya peghosow fleghes Ysrael re beghsyn ni er dha bynn. Ha my ha chi ow thas re beghas. 7Ni re omdhug pur dhrog er dha bynn, ha ny withsyn an gorhemmynnow, na'n ordenansow, na'n breusow a erghsys dhe'th was Moyses. 8Porth kov, my a'th pys, a'n ger a erghsys dhe'th was Moyses, ow leverel, “Mar pydhowgh dislel, my a'gas skatter a-les yn mysk an kenedhlow; 9mes mar tehwelowgh dhymm ha gwitha ow gorhemmynnow ha'ga gul, kyn fens dha dhifresow fesys dhe'n pella rann a'n nev, my a vynn aga huntell alena ha'ga dri bys y'n tyller may tewisis dhe worra ow hanow.” 10Lemmyn an re ma yw dha servysi ha'th pobel, a dhasprensys dre dha nerth bras ha gans dha leuv grev. 11A Arloedh, my a'th pys, bedhes dha skovarn hewoel dhe bysadow dha was, ha dhe bysadow dha wesyon neb yw hwansek dhe berthi own a'th hanow. Ro sewena, my a'th pys, dhe'th was an jydh ma, ha gront dhodho truedh yn golok an gour ma!’

Yth en vy hanafor an myghtern.