Estrenyon Diberthys Dhiworth Ysrael

1Y'n jydh na, i a lennas yn-mes a lyver Moyses yn klewans an bobel; hag ynno y feu kevys skrifys na dal entra nevra naneyl Ammonyas na Moabyas a-ji dhe guntelles Duw, 2drefenn na vetsons fleghes Ysrael gans bara ha dowr, mes i a arvethas Balaam er aga fynn rag aga mollethi. Byttegyns, agan Duw a dreylyas an volleth dhe vennath. 3Pan glewsons an lagha ma, oll an re a linyeth kemmyskys a veu diberthys dhiworth Ysrael.

Dasfurvyans Nehemia

4Mes kyns hemma, Elyashib an oferyas a'n jevo charj a jambouryow chi agan Duw, neb o kar-ogas a Tobia 5a dharbarsa dhodho chambour bras may hwithsens ynno kyns-lemmyn an offrynnow greun, an frankynkys, ha'n lestri, ha'n degedhow a ys, gwin nowydh hag oyl, ragsettys rag an Levysi, an ganoryon ha'n borthoryon, ha'n kevrohow rag an oferysi. 6Dres oll an termyn ma ny veuv yn Yerusalem, rag y'n dewdhegves blydhen warn ugens a Artakserkses myghtern Babylon, my eth dhe'n myghtern. Wosa dydhyow pals my a wovynnas kummyas a'n myghtern 7ha my a dheuth dhe Yerusalem hag yn eur na my a gonvedhas an drog re wrussa Elyashib, ow tarbari dhe Tobia roum yn klosyow chi Duw. 8Pur serrys veuv, ha my a wrug dhe oll daffar-chi Tobia bos tewlys yn-mes a'n chambour. 9My a erghis hag i a lanhas an chambouryow, ha my a wrug dhe dhaffar chi Duw, gans an offrynn greun ha'n frankynkys, bos dres ena arta.

10My a dhyskas ynwedh na via res rannow an Levysi dhedha, ha'n Levysi ha'n ganoryon a asas an ober yn chi Duw ha slynkya dhe-ves rag gonedha aga gwelyow aga honan. 11Ytho my a geredhis an soedhogyon ha leverel, ‘Prag yth yw forsakys chi Duw?’ Ha my a's kuntellas war-barth, ha'ga gorra yn aga thylleryow. 12Ena oll Yuda a dhros an dega a ys, gwin nowydh, hag oyl dhe'n gwithvaow. 13Ha my a apoyntyas avel tresoryoryon yn charj a'n gwithvaow Shelemia an oferyas, Sadok an skriba, ha Pedaya a'n Levysi, hag avel aga gwereser Hanan mab Zakkur mab Mattania, rag i dhe vos akontys lel. Aga dever o lesranna proviansow dh'aga breder. 14Porth kov ahanav, ow Duw, rag oll hemma, ha na dhefend ow oberow da a wrug vy rag chi ow Duw, hag yn y servis.

Dasfurvyans an Sabot Dallethys

15Y'n dydhyow na my a welas tus yn Yuda ow trettya gwinwaskow y'n sabot, hag ow tri a-ji bernyow ys hag orth aga beghya war asenes; hag ynwedh gwin, gwinreun, figys, ha pub eghenn arall a veghyow. I a's dhros yn Yerusalem yn dydh sabot; ytho my a's gwarnyas erbynn kwertha boes y'n jydh na. 16Yth esa tus a Tyr trigys ena ynwedh, ow tri pysk ha marchondis a bub eghenn ha'ga gwertha y'n sabot dhe dus Yuda yn Yerusalem 17Ytho my a geredhis ugheloryon Yuda ha leverel dhedha, ‘Pyth yw an droktra ma esowgh hwi ow kul, ow tisakra dydh sabot? 18A ny wrug agas tasow gul yndella, hag a ny dhros agan Duw oll an drog ma warnan, ha war an sita ma? Hwath hwi a dhre moy sorr war Ysrael pan dhisakrowgh an sabot.’

19Pan dhallathas tewlhe orth yetow Yerusalem kyns an sabot, yth erghis vy may fe deges an yetow ha ri gorhemmynnow ma na vens igerys bys wosa an sabot. Ha my a settyas re a'm servysi orth an yetow ma na fe beghyow dres a-ji yn dydh sabot. 20Ytho an varchons ha'n werthoryon a varchondis a bub eghenn a wodrigas dres nos a-ves dhe Yerusalem unnweyth po diwweyth. 21Mes my a's gwarnyas ha leverel dhedha, ‘Prag yth esowgh ow spena an nos ryb an fos? Mar kwrewgh hemma arta, my a sett dalghenn ynnowgh.’ Wosa an termyn na ny dheuthons y'n sabot. 22Ena my a erghis dhe'n Levysi may omlanhahens ha mos ha gwitha an yetow rag sanshe dydh an sabot. Porth kov a hemma ynwedh y'm favour, ow Duw, ha kemmer truedh ahanav herwydh braster dha dregeredh.

Demmedhyansow Kemmyskys Dampnys

23Y'n dydhyow na ynwedh my a welas Yedhewon re dhemmedhsa benynes dhiworth Ashdod, Ammon, ha Moab; 24ha hanter aga fleghes esa ow kewsel taves Ashdod po taves onan a'n poblow erell, ha ny wodhvons kewsel taves Yuda. 25Ha my a's keredhis ha'ga mollethi ha gweskel re anedha ha tenna yn-mes aga blew; ha my a wrug dhedha ti re Dhuw, ow leverel, ‘Na rewgh agas myrghes dh'aga mebyon, na kemmeres aga myrghes rag agas mebyon na ragowgh hwi agas honan. 26A ny wrug Solomon myghtern Ysrael pegha drefenn benynes a'n par na? Yn mysk lies kenedhel nyns esa myghtern kepar hag ev, hag ev o gerys gans y Dhuw, ha Duw a'n gwrug myghtern dres oll Ysrael; mes ev ynwedh a veu gwrys dhe begha gans benynes estren. 27A woslewyn orthowgh ytho, ha gul oll an drog bras ma, ha bos dislel dh'agan Duw ow temmedhi benynes estren?’

28Onan a vebyon Yoyada mab Elyashib an arghoferyas, o deuv dhe Sanballat an Horonyas; rakhenna my a'n pellhas yn-mes a'm lok. 29Porth kov anedha, ow Duw, drefenn i dhe dhefola an oferyaseth, ha kevambos an oferyaseth ha'n Levysi.

30Yndella my a's lanhas dhiworth pup-tra estren, ha my a settyas deverow rag an oferysi ha'n Levysi, pubonan anedha dh'y oberenn y honan, 31Ha my a brovias keunys rag an offrynn yn termynyow apoyntys, ha'n kynsa frut. Porth kov ahanav, ow Duw, rag da.