1Oll an bobel a omguntellas gans unn akord y'n plen a-dherag Yet an Dowr; hag i a leveris dhe Ezra an skriba dhe dhri lyver lagha Moyses a wrussa an Arloedh erghi dhe Ysrael. 2Hag Ezra an oferyas a dhros an lagha a-dherag an kuntelles, keffrys gwer ha benynes, ha peub a allas klewes gans konvedhes, yn kynsa dydh an seythves mis. 3Hag ev a lennas an lagha y'n plen a-dherag Yet an Dowr dhiworth myttin a-varr bys hanter-dydh, a-dherag gwer ha benynes, ha tus a allas konvedhes; hag oll an bobel a woslowas gans rach orth lyver an lagha. 4Hag Ezra an skriba a sevis war arethva a brenn re wrussons rag an porpos; ha rybdho y sevis Mattithia, Shema, Anaya, Uria, Hilkia, ha Maaseya, a dhyghow dhodho; hag a-gledh dhodho, Pedaya, Mishael, Malkia, Hashum, Hashbaddana, Zekaria ha Meshullam 5Ena Ezra a igoras an lyver yn golok oll an bobel, drefenn y vos ow sevel a-ughta; ha pan y'n igoras, oll an bobel a sevis yn-bann. 6Hag Ezra a vennigas an Arloedh, an Duw meur. Hag oll an bobel a worthybis, ‘Amen, Amen’, ow trehevel aga diwleuv: hag i a blegyas aga fenn, ha gordhya an Arloedh gans aga fas dhe'n dor. 7Ynwedh Yeshua, Bani, Sherebia, Yamin, Akkub, Shabbethay, Hodia, Maaseya, Kelita, Azaria, Yozabad, Hanan, ha Pelaya, an Levysi, a weresas an bobel dhe gonvedhes an lagha, ha'n bobel ow kortos yn aga thyller. 8Ytho i a lennas a lyver lagha Duw diblans, ha ri an styr, may hallo an bobel konvedhes an pyth a veu lennys.

9Ena Nehemia, an governour, hag Ezra an oferyas ha'n skriba, ha'n Levysi a dhyski an bobel, a leveris dhe oll an bobel, ‘Sans yw an jydh ma dhe'n Arloedh agas Duw; na gynewgh, na nag oelewgh.’ Rag oll an bobel a oelas, pan glewsons geryow an lagha. 10Yn eur na ev a leveris dhedha, ‘Kewgh, dybrewgh an blonek, hag evewgh an gwin hweg ha dannvenewgh rannow dhodho ev na'n jeves travyth parys ragdho. Sans yw an jydh ma dh'agan Arloedh: na bedhewgh grevys, rag lowena an Arloedh yw agas nerth.’ 11Ytho an Levysi a goselhas oll an bobel, ow leverel, ‘Taw taves, rag sans yw an jydh; na vedhewgh grevys.’ 12Hag oll an bobel eth yn-kerdh dhe dhybri ha dhe eva, ha dhe dhannvon rannow ha dhe wul lowender bras, drefenn i dhe gonvedhes an geryow a veu disklerys dhedha.

Goel Skovvaow

13Y'n nessa dydh pennow teyluyow oll an bobel gans an oferysi ha'n Levysi a dheuth war-barth dhe Ezra rag konvedhes geryow an lagha. 14Hag i a gavas skrifys y'n lagha a wrug an Arloedh hy erghi dre Moyses, may trikka mebyon Ysrael yn skovvaow yn goel an seythves mis, 15ha may teklarryens ha dyllo yn oll aga threvow hag yn Yerusalem, ow leverel, ‘Kewgh yn-mes war an menydhyow ha kyrghewgh skorrennow a oliv, oliv gwyls, myrtwydh, palm ha gwydh delyek arall rag gul skovvaow, dell yw skrifys.’ 16Ytho an bobel eth yn-mes ha'ga hyrghes, ha gul dhedha aga honan skovvaow, pubonan war do y ji, hag yn aga klosyow, ha klosyow chi Duw, hag yn stret Yet an Dowr, hag yn stret Yet Efraym. 17Hag oll an kuntelles, an re hag a dhehwelsa dhiworth an gethneth, a wrug skovvaow ha triga ynna; rag a-dhia dhydhyow Yeshua mab Nun bys y'n jydh na ny wrussa fleghes Ysrael yndella. Ha'n lowena o pur vras. 18Ha pub-dydh, a-dhia'n kynsa dydh dhe'n jydh diwettha, ev a lennas yn-mes a lyver lagha Duw. Hag i a withas an goel seyth dydh; ha'n ethves dydh yth esa kuntelles solem, war-lergh an ordenans.