An Bobel a Gonfess aga Feghosow

1Lemmyn y'n peswora dydh warn ugens a'n mis ma mebyon Ysrael a veu kuntellys war-barth gans penys, hag yn yskar ha gans pri war aga fenn. 2Ha has Ysrael a dhibarthas dhiworth estrenyon oll, ha sevel ha konfessya aga feghosow, ha kammweythresow aga thasow. 3I a sevis yn-bann yn aga savla ha lenna mes a lyver lagha an Arloedh aga Duw rag kwarter an jydh, ha rag kwarter arall i a gonfessyas, ha gordhya an Arloedh aga Duw. 4Ena Yeshua ha Bani, Kadmiel, Shebania, Bunni, Sherebia, Bani arall ha Kenani a sevis war risyow an Levysi, hag i a grias ughel aga lev dhe'n Arloedh aga Duw. 5Yn eur na an Levysi, Yeshua ha Kadmiel, Bani, Hashabneya, Sherebia, Hodia, Shebania ha Pethahia, a leveris, ‘Sevewgh yn-bann ha bennigewgh an Arloedh agas Duw bys vykken ha bynnari; ha benniges re bo dha hanow gloryus, yw ughelhes dres pub bennath ha gormola.

6‘Ty dha honan yw an Arloedh. Ty a wrug nev, an nev a nevow, gans oll aga lu, an nor ha pup-tra eus warnodho, an moryow ha pup-tra eus ynna, ha ty a re bewnans dhedha i oll ha'n lu a nev a'th wordh. 7Ty yw an Arloedh, an Duw neb a dhewisas Abram ha'y dhri yn-mes a Ur an Kaldeanys ha chanjya y hanow dhe Abraham; 8ha ty a gavas y golonn lel a-dheragos ha gul an kevambos ganso dhe ri dh'y has tir an Kananysi, an Hittysi, an Amorysi, an Perizzysi, an Yebusysi ha'n Girgashysi. Ty re geweras dha eryow, rag gwiryon os.

9‘Ha ty a welas galar agan tasow yn Ejyp ha klewes aga kri ryb an Mor Rudh, 10ha ri toknys hag anethow erbynn Faro hag erbynn oll y servysi, hag oll pobel y wlaskor; rag ty a wodhya i dhe dhyghtya agan tasow yn tont. Ytho ty a waynyas an ger-da a'th eus, par dell yw y'n jydh hedhyw. 11Ha ty a folsas an mor a-ragdha mayth ethons dre gres an mor kepar ha pan ve war dhor sygh, ha'ga helghysi ty a dewlis y'n downderyow kepar ha men y'n dowrow bras. 12Gans koloven a gommol ty a's hembronkas y'n jydh ha gans koloven a dan y'n nos, dhe wolowi ragdha an fordh mayth ellens. 13Ty a dheuth yn-nans war venydh Sinay ha kewsel gansa dhiworth nev ha ri dhedha rewlys ewn ha gwir laghys, ordenansow ha gorhemmynnow da, 14ha ty a dhyskas dhedha a-dro dhe'th sabot sans, ha ri dhedha gorhemmynnow, ordenansow ha lagha dre leuv Moyses dha was. 15Ty a ros dhedha bara dhiworth nev rag aga nown, ha dri dowr ragdha yn-mes a'n garrek rag aga syghes, ha ty a leveris dhedha mayth ellens a-ji dhe erita an pow re doses gans leuv drehevys y ri dhedha.

16‘Mes i ha'gan tasow, a dheuth ha bos goethus ha kales aga hilbenn ha ny woslowsons orth dha worhemmynnow. 17I a skonyas a woslowes, ha ny borthsons kov a'n marthusyon a wrussys yn aga mysk; mes i a dheuth ha bos kales aga hilbenn, hag y feu bodh aga brys dhe dhehweles dh'aga hethneth yn Ejyp. Mes ty yw Duw neb yw parys dhe ava, grassyes ha truedhek, lent ow serri, hag ow palshe yn tregeredh, ha ny wrussys aga forsakya. 18Kyn hwrussens ragdha aga honan imaj teudh a leugh ha leverel, “Hemm yw dha dhuw neb a'th tros yn-bann yn-mes Ejyp”, hag y hwrussens blasfemiow bras, 19ty, yn dha dregeredh vras, ny's forsaksys y'n gwylvos; ny dhibarthas an goloven a gommol dhiworta y'n jydh rag aga hembronk y'n fordh, na'n goloven a dan y'n nos rag ri golow dhedha war a'n fordh mayth ellens. 20Ty a ros dha spyrys da dh'aga dhyski ha ny skonsys dha vanna a'ga ganow hag a ros dhedha dowr rag aga syghes. 21Rag dew-ugens blydhen ty a's sostena y'n gwylvos ma na fyllis dhedha travyth; ny gothhas aga dillas warnedha ha ny hwythfis aga threys.

22‘Gans henna ty a ros dhedha gwlaskordhow ha poblow, ow kevrenna dhedha pub kornell; ytho i a eritas tir Sihon, ha tir myghtern Heshbon ha tir Og myghtern Bashan. 23Ty a gressyas aga mebyon avel ster an nev, ha'ga dri a-ji dhe'n tir a leversys dh'aga thasow dh'y entra ha dh'y erita. 24Aga mebyon a entras hag erita an tir, ha ty a fethas a-dheragdha annedhysi an tir, an Kananysi, ha'ga ri yn aga leuv, gans aga myghternedh, ha poblow an tir, may hwrellens gansa herwydh aga flesour. 25I a gemmeras sitys kerys ha tir feyth hag i a eritas chiow leun a bup-tra da, puthow pelys, gwinlannow, hag olewbrennyer, ha gwydh froeth pals. Ytho i a dhybris, hag a veu lenwys, hag a dheuth ha bos tew hag i a lowenhas y'th tader bras.

26‘Byttegyns diwostydh ens, hag i a rebellyas er dha bynn ha tewlel dha lagha a-dryv aga heyn ha ladha dha brofoesi, a wrussons aga gwarnya, dh'aga threylya dhis arta; hag i a wrug blasfemiow bras. 27Ytho ty a's ros yn leuv aga eskerens, hag i a's arwaskas. Mes yn termyn aga ahwer, i a grias dhis, ha ty a's klewas dhiworth nev, ha herwydh dha druedh bras ty a ros dhedha selwadoryon neb a's sawyas dhiworth leuv aga eskerens. 28Mes wosa i dhe gavoes powes, i a wrug drog arta a-dheragos; ytho ty a's gasas yn leuv aga eskerens, hag i a rewlyas warnedha. Pan grisons dhis arta, ty a's klewas dhiworth nev, ha lieskweyth ty a's delivras herwydh dha versi. 29Ha ty a's gwarnyas rag aga threylya arta dhe'th lagha. Hwath i a faryas gans bedhekter ha ny obaysons dha worhemmynnow, mes i a beghas erbynn dha vreusow, a re bewnans dhe'n re a's gwith. Mes i a gildennas an skoedh, ha kaleshe aga hilbenn ha ny obaysons. 30Ty a's perthi lies blydhen, ha ty a's gwarnyas gans dha spyrys dre dha brofoesi; hwath ny woslowsons. Ytho ty a's ros yn leuv poblow tiryow erell. 31Byttegyns, y'th truedh bras ny wrussys aga leun dhistrui na'ga forsakya, rag ty yw Duw grassyes ha truedhek.

32‘Lemmyn ytho, agan Duw, an Duw bras ha galloesek hag euthyk, neb a with kevambos ha tregeredh, na dhyght avel distyr oll an anken ma re dheuth warnan, war agan myghternedh, agan pennsevigyon, agan oferysi, agan profoesi, ha'gan tasow ha war oll dha bobel, a-dhia dermyn myghternedh Assyria bys y'n jydh hedhyw. 33Hwath ty re beu gwiryon yn pup-tra re dheuth warnan, rag ty dhe dhyghtya yn lel genen ha ni re beghas. 34Ny withas agan tasow, agan myghternedh, agan hembrenkysi ha'gan oferysi dha lagha, na woslowsons orth dha worhemmynnow ha'th warnyansow a resys dhedha. 35Hwath yn aga gwlaskor aga honan, hag y'th tader bras a resys dhedha y'n tir efan ha feyth, ny'th servsons na ny dreylsons dhiworth aga drog weythresow. 36Otta, hedhyw kethyon on ni! Y'n tir a resys dh'agan tasow dhe dhybri y froeth ha'y daklow da, otta, kethyon on ni ynno! 37Drefenn ni dhe begha, y drevas rych a dhe'n myghternedh re worrsys warnan; ynwedh i a's teves galloes war agan korf, ha'gan bestes, herwydh aga bodh, ha ni yw yn ahwer bras.’

An Bobel a Wrug an Akord

38Drefenn hemma oll, ni a wra kevambos fyrv, ha'y skrifa; ha war an skrifenn selys yma henwyn agan pennsevigyon, agan Levysi, ha'gan oferysi.9:38 9:38 yw niverys 10:1 y'n Septuagint.