An Kynsa Niveryans

1An Arloedh a gewsis orth Moyses yn gwylvos Sinay, yn tylda an kuntelles, yn kynsa dydh an nessa mis, y'n nessa blydhen wosa i dhe dhos yn-mes a Ejyp, ow leverel, 2Gwra niveryans a'n kuntelles oll a vebyon Ysrael, herwydh aga theyluyow, herwydh chiow aga thasow, herwydh an niver a henwyn, pub gorreydh penn ha penn; 3a-dhia ugens bloedh ha moy, peub yn Ysrael a yll mos yn-rag dhe vresel, ty hag Aron a wra aga nivera, lu ha lu. 4Hag y fydh genowgh gour a bub loeth, pubonan ow pos penn y deylu. 5Ha'n re ma yw henwyn an wer a wra sevel genowgh. A Rewben: Elisur mab Shedeur; 6a Simeon: Shelumiel mab Surishadday; 7a Yuda: Nahshon mab Amminadab; 8a Yssakar: Nethaneel mab Suar; 9a Zebulun: Eliab mab Helon; 10a vebyon Yosep: a Efraym, Elishama mab Ammihud; hag a Manasse, Gamaliel mab Pedahsur; 11a Benyamin: Abidan mab Gideoni; 12a Dan: Ahiezer mab Ammishadday; 13a Asher: Pagiel mab Okran; 14a Gad: Eliasaf mab Deuel; 15a Naftali: Ahira mab Enan. 16An re ma o an re apoyntys yn-mes a'n kuntelles, hembrenkysi loethow aga thasow, pennow kordhow Ysrael.

17Moyses hag Aron a gemmeras an wer ma re bia merkys aga henwyn, 18hag yn kynsa dydh an nessa mis, i a geskorras war-barth an kuntelles oll, hag a omgovskrifas herwydh aga theyluyow, herwydh chiow aga thasow, herwydh an niver a henwyn, a-dhia ugens bloedh ha moy, penn ha penn, 19dell worhemmynnis an Arloedh dhe Moyses. Yndella ev a's niveras yn gwylvos Sinay.

20Mebyon Rewben, kynsa-genys Ysrael, aga linyeth, herwydh aga theyluyow, herwydh chiow aga thasow, herwydh niver an henwyn, penn ha penn, pub gorreydh a-dhia ugens bloedh ha moy, peub a ylli mos war-rag dhe vresel: 21an re niverys a loeth Rewben o hwegh mil ha dew-ugens ha pymp kans.

22A vebyon Simeon, aga henedh, herwydh aga theyluyow, herwydh chiow aga thasow, an re anedha a veu niverys, herwydh niver an henwyn, penn ha penn, pub gorreydh a-dhia ugens bloedh ha moy, peub a ylli mos yn-rag dhe vresel: 23an re niverys a loeth Simeon o nownsek mil ha dew-ugens ha trihans.

24A vebyon Gad, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel: 25an re niverys a loeth Gad o pymp mil ha dew-ugens, hwegh kans ha deg ha dew-ugens.

26A vebyon Yuda, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel: 27an re niverys a loeth Yuda o peswardhek mil ha tri-ugens ha hwegh kans.

28A vebyon Yssakar, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel: 29an re niverys a loeth Yssakar o peswardhek mil ha dew-ugens ha peswar kans.

30A vebyon Zebulun, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel: 31an re niverys a loeth Zebulun o seytek mil ha dew-ugens ha peswar kans.

32A vebyon Yosep: mebyon Efraym, aga linyeth herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel: 33an re niverys a loeth Efraym o dew-ugens mil ha pymp kans.

34A vebyon Manasse, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel: 35an re niverys a loeth Manasse o dewdhek mil warn ugens ha dew kans.

36A vebyon Benyamin, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel: 37an re niverys a loeth Benyamin o pymthek mil warn ugens ha peswar kans.

38A vebyon Dan, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel: 39an re niverys a loeth Dan o dew vil ha tri-ugens ha seyth kans.

40A vebyon Asher, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel: 41an re niverys a loeth Asher o unn mil ha dew-ugens ha pymp kans.

42Mebyon Naftali, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel: 43an re niverys a loeth Naftali o trydhek mil ha dew-ugens ha peswar kans.

44An re ma o an re niverys, neb a wrug Moyses hag Aron aga nivera gans gweres an hembrenkysi a Ysrael, dewdhek gour, pubonan rag chi y das. 45Ytho niver kowal mebyon Ysrael, herwydh chiow aga thasow, a-dhia ugens bloedh ha moy, peub a ylli mos yn-rag dhe vresel: 46aga niver kowal o hwegh kans ha tri mil ha pymp kans ha hanter-kans.

47Mes ny veu niverys an Levysi gans loeth aga thasow yn aga mysk. 48Rag an Arloedh a leveris dhe Moyses, 49‘Unnsel loeth an Levysi ny wredh nivera, na ny's niverydh yn mysk mebyon Ysrael erell; 50mes sett an Levysi war dabernakel an dustuni, ha war oll y dhaffar, ha war bup-tra eus dhodho; i a dheg an tabernakel hag oll y dhaffar, hag i a'n serv, ha kampya a-dro dhe'n tabernakel. 51Pan wra an tabernakel mos yn-rag, an Levysi a wra y dhisevel; ha pan dheu an tylda dhe vos settys yn-bann, an Levysi a wra y sevel. Ha mar teffo estren1:51 estren: Henn yw gour nag yw diyskynnyas a Levi. yn ogas, ev a vydh gorrys dhe'n mernans. 52Mebyon Ysrael a wra settya aga thyldow, pub gour ryb y gamp y honan ha pub gour ryb y vaner y honan, herwydh aga luyow; 53mes an Levysi a wra kampya a-dro dhe dylda an dustuni, ma na vo sorr war guntelles mebyon Ysrael; ha'n Levysi a with charj tabernakel an dustuni.’ 54Ytho mebyon Ysrael a wrug war-lergh pup-tra a worhemmynnis an Arloedh dhe Moyses; yndella y hwrussons.