An Hirgern Arghansek

1An Arloedh a leveris dhe Moyses: 2Gwra dew hirgorn yn arghans; yn ober mortholys ty a's gwra; ha ty a wra devnydh anedha rag gelwel an kuntelles, ha rag terri kamp. 3Ha pan vydh an dhew hwythys, oll an kuntelles a wra omguntell dhis dhe dharas tylda an kuntelles. 4Mes mar hwythons marnas onan, ena an hembrenkysi, pennow kordhow Ysrael, a wra omguntell dhis. 5Pan hwythydh gwarnyans, an kampow usi dhe denewen an howldrevel a wra mos yn-kerdh. 6Ha pan hwythydh gwarnyans dhe'n eyl prys, an kampow dhe'n tenewen dyghow a wra mos yn-kerdh. Gwarnyans a vydh hwythys pup-prys pan vydhons ow mos yn-kerdh. 7Mes pan vydh an gemmynieth dhe vos kuntellys war-barth, hwi a hwyth, mes ny hwythyowgh an gwarnyans. 8Ha mebyon Aron, an oferysi, a wra hwytha an hirgern. An hirgern a vydh dhywgh rag ordenans bys vykken der aga henedhow. 9Ha pan ewgh dhe vresel war agas tir erbynn an eskar a wra agas beghya, hwi a wra hwytha gwarnyans gans an hirgern, may fowgh kovhes a-rag an Arloedh agas Duw, hag yndellma hwi a vydh sawys a'gas eskerens. 10Yn dydh agas lowena ynwedh, hag yn agas goelyow ordenys, hag yn dalleth agas misyow, hwi a wra hwytha an hirgern war agas offrynnow dre dan ha war sakrifisow agas offrynnow kres; i a vydh dhywgh avel kovadh a-rag agas Duw: my yw an Arloedh agas Duw.

An Kerdh dhiworth Sinay

11Y'n nessa blydhen, y'n nessa mis, yn ugensves dydh an mis, an gommolenn a veu kemmerys yn-bann a-ugh tabernakel an dustuni. 12Ha mebyon Ysrael eth yn yn-rag yn kerdhow berr yn-mes a wylvos Sinay; ha'n gommolenn a sevis stag yn gwylvos Paran. 13I eth yn-kerdh an kynsa prys orth gorhemmynna an Arloedh dre leuv Moyses. 14Baner kamp mebyon Yuda eth yn-kerdh yn kynsa herwydh aga luyow; ha war aga lu yth esa Nahshon mab Amminadab. 15Ha war lu an loeth a vebyon Yssakar yth esa Nethaneel mab Suar. 16Ha war lu an loeth a vebyon Zebulun yth esa Eliab mab Helon.

17Ha pan veu disevys an tabernakel, mebyon Gershon ha mebyon Merari, neb a dhegi an tabernakel, eth yn-kerdh. 18Ha baner kamp Rewben eth yn-kerdh herwydh aga luyow; ha war aga lu yth esa Elisur mab Shedeur. 19Ha war lu an loeth a vebyon Simeon yth esa Shelumiel mab Surishadday. 20Ha war lu an loeth a vebyon Gad yth esa Eliasaf mab Deuel.

21Ena an Kohathysi eth yn-kerdh, ow toen an sentri, ha'n tabernakel a veu sevys kyns aga dos. 22Ha baner kamp mebyon Efraym eth yn-kerdh herwydh aga luyow; ha war aga lu yth esa Elishama mab Ammihud. 23Ha war lu an loeth a vebyon Manasse yth esa Gamaliel mab Pedahsur. 24Ha war lu an loeth a vebyon Benyamin yth esa Abidan mab Gideoni.

25Ena baner kamp mebyon Dan, avel gwithysi-dhelergh an kampow oll, eth yn-kerdh herwydh aga luyow; ha war aga lu yth esa Ahiezer mab Ammishadday. 26Ha war lu an loeth a vebyon Asher yth esa Pagiel mab Okran. 27Ha war lu an loeth a vebyon Naftali yth esa Ahira mab Enan. 28Hemm o ordyr kerdh mebyon Ysrael herwydh aga luyow pan ethons yn-kerdh.

29Ha Moyses a leveris dhe Hobab mab Reuel an Midyanyas, hwegron Moyses, ‘Yth eson ni ow mos yn-kerdh dhe dyller may leveris an Arloedh anodho, “My a wra y ri dhis”; deus genen, ha ni a wra dader dhis; rag an Arloedh re ambosas dader dhe Ysrael.’ 30Mes ev a leveris dhodho, ‘Ny vynnav mos; mes my a wra diberth dhe'm tir ow honan ha dhe'm neshevin.’ 31Hag ev a leveris, ‘Na'gan gas, my a'th pys, rag ty a woer fatell wren kampya y'n gwylvos, ha ty a wra servya avel lagasow ragon. 32Ha mars edh genen, py dader pynag a wrello an Arloedh gul dhyn, an keth dader a wren dhis.’

33Ytho i eth yn-kerdh a venydh an Arloedh vyaj tri dydh; hag argh kevambos an Arloedh eth a-ragdha vyaj tri dydh, dhe hwilas powesva ragdha. 34Hag yth esa kommolenn an Arloedh warnedha dydhweyth, peskweyth mayth ethons a'n kamp.

35Ha peskweyth mayth e an argh yn-kerdh, Moyses a leveri,

‘Sav, A Arloedh, ha gas dha eskerens dhe vos skattrys;

ha gas i a'th kas dhe fia a-dheragos.’

36Ha pan bowesa hi, ev a leveri,

‘Dehwel, A Arloedh,

dhe'n deg milyow a vilyow Ysrael.’