Krodhvol an Bobel y'n Gwylvos

1Pan grodhvolas an bobel yn klewans an Arloedh a-dro dh'aga anfeus, an Arloedh a glewas; y sorr a veu enowys, ha tan an Arloedh a loskas yntredha, ha kowlleski nebes rannow pella a'n kamp. 2Ena an bobel a grias war Moyses; ha Moyses a bysis dhe'n Arloedh, ha'n tan a lehas. 3Ytho hanow an tyller ma a veu gelwys Tabera, drefenn tan an Arloedh dhe leski yntredha.

4Lemmyn an routh esa yn aga mysk a'n jevo ewl krev; ha mebyon Ysrael ynwedh a oelas arta, ow leverel, ‘Piw a re dhyn kig dhe dhybri? 5Yma kov dhyn a'n puskes a dhybryn yn Ejyp heb kost, an kukumbrow, an melonyow, an por, an onyon, ha'n kennin; 6mes lemmyn agan nerth yw desyghys ha nyns eus travyth marnas an manna ma dh'y weles.’

7Lemmyn an manna o avel has koriander, ha'y semlans avel bedellium. 8Ha'n bobel eth a-dro orth y guntell, ha'y velyas yn melinyow po y waska yn brewveyn ha'y vryjyon yn pottow, ha gul tesennow anodho; ha'n blas o haval dhe vlas tesennow pebys gans oyl. 9Pan goedha an gluth war an kamp dhe nos, an manna a goedha ganso.

10Moyses a glewas an bobel owth oela der aga theyluyow, pub gour orth daras y dylda; ha sorr an Arloedh a dhewi yn toemm, ha Moyses o drok-pes. 11Moyses a leveris dhe'n Arloedh, ‘Prag y tebeldhyghtsys dha was? Ha prag na gevis gras y'th wolok, may korrydh begh an bobel oll ma warnav? 12A wrug vy omdhoen ha dineythi oll an bobel ma? may leverri dhymm, “Gwra aga doen y'th askra, dell dheg mager flogh-dena, dhe'n tir a desys y ri dh'aga thasow”? 13A-ble kavav kig dhe ri dhe'n bobel oll ma? Rag i a oel a-ragov ow leverel, “Ro dhyn kig, may typpryn.” 14Ny'm beus doen oll an bobel ma ow honan, rag an begh yw re boes dhymm. 15Mar mynnydh dyghtya genev yndellma, ladh vy distowgh, mar kevis gras y'th wolok, ma na welliv ow anfeus.’

An Deg ha Tri-ugens Henavek

16Ha'n Arloedh a leveris dhe Moyses, ‘Kuntell dhymm deg gour ha tri-ugens a henavogyon Ysrael, hag a wodhes bos henavogyon an bobel ha soedhogyon a-ughta; ha doro i dhe dylda an kuntelles, ha'ga gasa dhe sevel ena genes. 17Ha my a dhiyskynn ha kewsel genes ena; ha my a gemmer nebes a'n spyrys eus warnas ha'y worra warnedha; hag i a dheg begh an bobel genes, ma na'n godheffi dha honan. 18Ha lavar dhe'n bobel, Omsakrewgh erbynn a-vorow, ha hwi a dheber kig; rag hwi re oelas yn klewans an Arloedh, ow leverel, “Piw a re dhyn kig dhe dhybri? Rag yth o da genen yn Ejyp.” Rakhenna an Arloedh a vynn ri dhywgh kig, ha hwi a wra dybri. 19Ny dhebrowgh unn jydh, po dew dhydh, po pymp dydh, po deg dydh, po ugens dydh, 20mes mis kowal, bys pan dheu yn-mes a'gas frigow hag a dheu ha bos kasadow dhywgh, rag hwi dhe nagha an Arloedh usi yn agas mysk, hag oela a-ragdho, ow leverel, “Prag y teuthen yn-mes a Ejyp?” ’ 21Mes Moyses a leveris, ‘An bobel le mayth esov yn aga mysk yw hwegh kans mil aga niver war droes; ha ty re leveris, “My a re dhedha kig may tepprons mis kowal.” 22A vydh flokkys ha greow ledhys, dhe vos lowr dhedha? Po a vydh oll puskes an mor bos kuntellys war-barth dhedha, dhe vos lowr dhedha?’ 23Ha'n Arloedh a leveris dhe Moyses, ‘Yw dorn an Arloedh re verr? Lemmyn ty a welvydh mar teu ow ger dhe wiryonedh ragos po na.’

24Ytho Moyses eth yn-mes ha leverel dhe'n bobel geryow an Arloedh; hag ev a guntellas deg gour ha tri-ugens a henavogyon an bobel, ha'ga gorra a-dro dhe'n tylda. 25Ena an Arloedh a dhiyskynnas y'n gommolenn ha kewsel orto, ha kemmeres neppyth a'n spyrys esa warnodho ha'y worra war an deg henavek ha tri-ugens; ha pan bowesas an spyrys warnedha, i a brofoesas. Mes ny wrussons yndellma namoy.

26Lemmyn dew wour a veu gesys y'n kamp; hanow an eyl o Eldad ha hanow y gila o Medad, ha'n spyrys a bowesas warnedha. Yth ens i yn mysk an re a via kovskrifys, mes nyns ethons yn-mes dhe'n tylda; ytho i a brofoesas y'n kamp. 27Ha maw a boenyas ha leverel dhe Moyses, ‘Yma Eldad ha Medad ow profoesa y'n kamp.’ 28Ha Yoshua mab Nun, menyster Moyses, onan a'y wer dhewisys, a leveris, ‘Ow arloedh Moyses, gwra aga difenn.’ 29Mes Moyses a leveris dhodho, ‘A berthydh avi a'm govis vy? A pe pobel oll an Arloedh profoesa, may hworro an Arloedh y spyrys warnedha!’ 30Ha Moyses a dhehwelis dhe'n kamp, ev ha'n henavogyon.

An Rynki

31Hag yth eth yn-rag gwyns a-dhiworth an Arloedh, hag y tros rynki a-dhiworth an mor, ha'ga gasa dhe goedha ryb an kamp, a-dro dhe vyaj unn jydh a'n tenewen ma ha vyaj unn jydh a'n tenewen arall,11:31 ha'ga gasa dhe goedha ryb an kamp, a-dro dhe vyaj unn jydh a'n tenewen ma ha vyaj unn jydh a'n tenewen arall: Po amendyans hag yth esens ow nija war an kamp a-dro dhe dhew gevelin a-ugh enep an dor, vyaj unn jydh a'n tenewen ma ha vyaj unn jydh a'n tenewen arall. hag a-dro dhe dhew gevelin a-ugh enep an dor. 32Ha'n bobel a sevis oll an jydh na, hag oll an nos, hag oll an jydh a-wosa, ha kuntell an rynki; neb re guntellas an lyha a guntellas deg homer; hag i a's lesas dh'aga honan oll a-dro dhe'n kamp. 33Ha'n kig hwath ynter aga dyns, kyns y vos dybrys, sorr an Arloedh a veu enowys, ha'n Arloedh a weskis an bobel gans pla meur. 34Yndellma hanow an tyller na a veu gelwys Kibroth-hattaava, drefenn i dhe ynkleudhyas ena an dus a's teva an ewl. 35A Kibroth-hattaava an bobel a vyajyas dhe Haseroth; hag i a wortas yn Haseroth.