Avi Miryam hag Aron orth Moyses

1Miryam hag Aron a gewsis erbynn Moyses drefenn an Gushyades re dhemmedhsa, rag ev dhe dhemmedhi Kushyades; 2hag i a leveris, ‘A ny gewsis an Arloedh yn hwir marnas dre Moyses? A ny gewsis dredhon ni ynwedh?’ Ha'n Arloedh a'n klewas. 3Lemmyn an gour Moyses o pur glor, moy ages pub den oll war enep an nor. 4Ha distowgh an Arloedh a leveris dhe Moyses ha dhe Aron ha dhe Miryam, ‘Dewgh yn-mes, agas tri dhe dylda an kuntelles.’ Ha'ga thri a dheuth yn-mes. 5Ha'n Arloedh a dhiyskynnas yn koloven kommol, ha sevel orth daras an tylda, ha gelwel Aron ha Miryam; hag i a dheuth yn-rag aga dew. 6Hag ev a leveris, ‘Klewewgh ow geryow:

Mars eus profoes yntredhowgh,

my an Arloedh a vydh aswonnys dhodho yn gwelesigeth,

my a gews orto yn hunros.

7Nansi gans ow gwas Moyses;

ev yw len yn oll ow chi.

8Ganso my a gews ganow orth ganow,

yn tiblans, a-der yn kowsow tewl;

hag ev a wel furv an Arloedh.

Prag ytho na vewgh ownek dhe gewsel erbynn ow gwas Moyses?’ 9Ha sorr an Arloedh a veu enowys er aga fynn, hag ev eth dhe-ves.

10Pan omdennas an gommolenn a-dhiwar an tylda, otta, Miryam o lovrek, mar wynn avel an ergh. Hag Aron a dreylyas tu ha Miryam, hag otta, hi o lovrek. 11Hag Aron a leveris dhe Moyses, ‘Ogh, ow arloedh, na wra agan kessydhya drefenn ni dhe wul yn foll ha pegha. 12Na as hi dhe vos avel neppyth genys marow, hag anodho an kig hanter dybrys pan dheu yn-mes a dorr y vamm.’ 13Ha Moyses a grias war an Arloedh, ‘Gwra hy sawya, a Dhuw, my a'th pys.’ 14Mes an Arloedh a leveris dhe Moyses, ‘Mar trewsa hy thas yn hy fas, a ny vedha meth dhedhi seyth dydh? Gas hi dhe vos eskes yn-mes a'n kamp seyth dydh, ha wosa henna hi a yll bos dres arta a-ji.’ 15Ytho Miryam a veu kes yn-mes a'n kamp seyth dydh; ha ny dhallathas an bobel war an kerdh bys pan veu Miryam dres arta a-ji. 16Wosa henna an bobel eth yn-kerdh a Haseroth, ha kampya yn gwylvos Paran.