Aspioryon Dannvenys yn Kanan

1An Arloedh a leveris dhe Moyses, 2‘Dannvon gwer dhe aspia pow Kanan, hag a rov dhe vebyon Ysrael; a bub loeth a'ga thasow ty a dhannvon gour, pubonan hembrenkyas yntredha.’ 3Ytho Moyses a's dannvonas a-dhiworth gwylvos Paran, war-lergh gorhemmynna an Arloedh, i oll gwer neb o pennow mebyon Ysrael. 4Ha'n re ma o aga henwyn: a-dhiworth loeth Rewben, Shammua mab Zakkur; 5a-dhiworth loeth Simeon, Shafat mab Hori; 6a-dhiworth loeth Yuda, Kaleb mab Yefunne; 7a-dhiworth loeth Yssakar, Ygal mab Yosep; 8a-dhiworth loeth Efraym, Hoshea mab Nun; 9a-dhiworth loeth Benyamin, Palti mab Rafu; 10a-dhiworth loeth Zebulun, Gaddiel mab Sodi; 11a-dhiworth loeth Yosep (henn yw a-dhiworth loeth Manasse), Gaddi mab Susi; 12a-dhiworth loeth Dan, Ammiel mab Gemalli; 13a-dhiworth loeth Asher, Sethur mab Mighal; 14a-dhiworth loeth Naftali, Nahbi mab Vofsi; 15a-dhiworth loeth Gad, Geuel mab Maki. 16An re ma o henwyn an wer a dhannvonas Moyses dhe aspia an tir. Ha Moyses a ros dhe Hoshea mab Nun an hanow Yoshua.

17Moyses a's dannvonas dhe aspia pow Kanan, ha leverel dhedha, ‘Kewgh yn-hons y'n Negeb, hag yskynna y'n vro venydhyek, 18ha mirewgh fatell yw an tir, ha mars yw an bobel trigys ena krev po gwann, mars yns boghes po lies, 19ha mars yw an tir mayth esons trigys da po drog, ha mars yw an sitys mayth esons trigys kampow po dinasow, 20ha mars yw an tir rych po difeyth, ha mars eus prenn ynno po mar nyns eus. Bedhewgh a golonn dha, ha drewgh neppyth a frut an tir.’ Nena an termyn o seson an kynsa gwinreun adhves.

21Ytho i a yskynnas hag aspia an tir a wylvos Sin13:21 wylvos Sin: Henn yw gwylvos a-dhyghow dhe'n Negeb, a-der an gwylvos Sin usi ogas dhe venydh Sinay. An lytherennans yn Ebrow yw dihaval. dhe Rehob, troha Lebo-hamath. 22I a yskynnas dhe'n Negeb, ha dos dhe Hebron; hag yth esa ena Ahiman, Sheshay, ha Talmay, diyskynnysi Anak. (Hebron a veu drehevys seyth blydhen kyns es Soan yn Ejyp.) 23Hag i a dheuth dhe nans Eshkol, ha treghi alena skorrenn gans unn bagas a rappys, hag i a's dug war welenn yntra dew anedha; i a dhros ynwedh greunavalow ha figys. 24An tyller na a veu gelwys nans Eshkol, drefenn an bagas a rappys a droghas mebyon Ysrael alena.

Derivas an Aspioryon

25Dhe benn dew-ugens dydh i a dhehwelis a aspia an tir. 26Hag i a dheuth dhe Moyses hag Aron ha dhe'n kuntelles oll a vebyon Ysrael bys yn gwylvos Paran, dhe Kadesh; i a dhros ger dhedha ha dhe'n kuntelles oll, ha diskwedhes dhedha frut an tir. 27Hag i a leveris dhodho, ‘Ni a dheuth dhe'n tir le ma'gan dannvensys; devri, ev a dhinwa leth ha mel, ha hemm yw y frut. 28Mes an bobel trigys y'n tir yw krev, ha'n sitys yw kerys ha pur vras; ha dres henna, ni a welas diyskynnysi Anak ena. 29Yma an Amalekysi trigys yn tir an Negeb; hag yma an Hittysi, an Yebusysi, ha'n Amorysi trigys y'n vro venydhyek; hag yma an Kananysi trigys ryb an mor, ha war lann an Yordan.’

30Mes Kaleb a goselhas an bobel a-rag Moyses, ha leverel, ‘Gwren mos yn-bann distowgh, ha'y gevannedhi; rag pur abel on dh'y fetha.’ 31Ena an wer re wrussa mos yn-bann ganso a leveris, ‘Ny yllyn mos yn-bann erbynn an bobel; rag kreffa yns ageson.’ 32Ytho i a dhros dhe vebyon Ysrael drog dherivas a'n tir re aspisens, ow leverel, ‘An tir, dredho mayth ethen dh'y aspia, yw tir a dhevor y drigoryon; hag oll an bobel a welsyn yw gwer meur aga ughelder. 33Hag ena ni a welas an Nefilim (mebyon Anak a dheuth dhiworth an Nefilim), hag yth en ni yn agan dewlagas agan honan kepar ha kulyeges-reden, hag yndellma o agan semlans dhedha i.’