Rebellyans an Bobel

1Ena oll an kuntelles a dhrehevis kri ughel; ha'n bobel a oelas an nos na. 2Ha mebyon Ysrael oll a grodhvolas war Moyses hag Aron; oll an kuntelles a leveris dhedha, ‘A marwen yn pow Ejyp! Po a marwen y'n gwylvos ma! 3Prag y hwra an Arloedh agan dri y'n tir ma, dhe goedha der an kledha? Agan gwragedh ha'gan re vyghan a vydh preydh; a ny via gwell dehweles dhe Ejyp?’

4Hag i a leveris an eyl dh'y gila. ‘Gwren dewis penn ha dehweles dhe Ejyp.’ 5Ena Moyses hag Aron a goedhas war aga fas a-rag an gemmynieth oll a guntelles mebyon Ysrael. 6Ha Yoshua mab Nun ha Kaleb mab Yefunne, esa yn mysk an re a aspias an tir, a skwardyas aga dillas, 7ha leverel dhe'n kuntelles oll a vebyon Ysrael, ‘An tir a dremensyn dredho dh'y aspia, yw tir da dres eghenn. 8Mars yw an Arloedh pes da ahanan, ev a'gan dre dhe'n tir ma ha'y ri dhyn, tir a dhinwa leth ha mel. 9Mes, na sevewgh erbynn an Arloedh; ha na berthewgh own a bobel an tir, rag bara yns i ragon; aga skoes yw kemmerys a-dhiworta, hag yma an Arloedh genen; na berthewgh own anedha.’

Breus an Arloedh

10Mes oll an kuntelles a vynnas aga labydha gans meyn. Ena golewder an Arloedh a omdhiskwedhas yn tylda an kuntelles a-rag mebyon Ysrael oll. 11Ha'n Arloedh a leveris dhe Moyses, ‘Pes termyn y hwra an bobel ma ow disenora? Ha pes termyn ny wrons krysi ynnov, yn spit dhe'n toknys oll a wrug yn aga mysk? 12My a's gwysk gans an pla ha'ga diserita, ha my a wra ahanowgh gwlaskor brassa ha galloesekka agessa.’

13Mes Moyses a leveris dhe'n Arloedh, ‘Ena an Ejyptianys a wra klewes anodho, rag gans dha nerth ty a dhros an bobel ma yn-bann yn-mes anedha, 14hag i a lever hemma dhe drigoryon an tir ma. I re glewas ty dhe vos, A Arloedh, yn mysk an bobel ma; rag ty, A Arloedh, yw gwelys fas orth fas, ha dha gommolenn a sev a-ughta ha ty a a-dheragdha, yn koloven kommol dydhweyth hag yn koloven tan nosweyth. 15Lemmyn mar ledhydh an bobel ma avel unn den, ena an kenedhlow re glewas hemma, a lever, 16“Drefenn na allas an Arloedh dri an bobel bys y'n tir a dos y ri dhedha, yndella ev re's ladhas y'n gwylvos.” 17Ytho lemmyn, my a'th pys, gas nerth an Arloedh dhe vos meur, par dell ambossys, ow leverel, 18“An Arloedh yw lent ow serri, lenwys a dregeredh, ow kava kammweyth ha peghadow, mes ny vynn war neb kor klerhe an re gablus, ow kessydhya kammhynseth tasow war fleghes, war an tressa ha'n peswora henedh.” 19Gav kammhynseth an bobel ma, my a'th pys, war-lergh dha dregeredh meur, kepar dell evsys an bobel ma, a-dhia asa Ejyp bys omma.’

20Ena an Arloedh a leveris, ‘My re avas, war-lergh dha er; 21mes yn hwir, dell vewav, ha dell vydh oll an nor lenwys gans golewder an Arloedh, 22nagonan re welas ow golewder ha'm toknys hag a wrug vy yn Ejyp hag y'n gwylvos, ha hwath a'm gorras dhe'n prov an deg treveth ma ha ny glewas ow lev, 23a wra gweles an tir hag a des y ri dh'aga thasow; ha nagonan a'n re a'm dispresyas a wra y weles. 24Mes ow gwas Kaleb, drefenn bos dhodho spyrys dihaval ha'm siwya yn leun, my a wra dri y'n tir mayth eth, ha'y dhiyskynnysi a'n pewvydh. 25Lemmyn, a-ban drig an Amalekysi ha'n Kananysi y'n nansow, treyl a-vorow ha mos yn-kerdh dhe'n gwylvos dre fordh an Mor Rudh.’

26Ha'n Arloedh a gewsis dhe Moyses ha dhe Aron, ow leverel: 27Pes termyn y hwra an tebel guntelles ma krodhvolas warnav? My re glewas krodhvolyow mebyon Ysrael, hag a grodhvolsons warnav. 28Lavar dhedha, ‘Dell vewav’, yn-medh an Arloedh, ‘an pyth re leversowgh y'm klewans my a'n gwra dhywgh: 29agas korfow marow a wra koedha y'n gwylvos ma; hag a'gas niver oll, niverys a-dhia ugens bloedh ha moy, re grodhvolas warnav, 30nagonan a wra dos y'n tir le may tes vy agas gorra dhe driga, marnas Kaleb mab Yefunne ha Yoshua mab Nun. 31Mes agas re vyghan, a leversowgh a wre ha dos preydh, my a's dre a-ji, hag i a wra aswonn an tir re dhispresowgh. 32Mes hwi, agas korfow marow a wra koedha y'n gwylvos ma. 33Ha'gas fleghes a vydh bugeledh y'n gwylvos dew-ugens blydhen, hag a wra godhevel rag agas dislender bys pan wra an diwettha a'gas korfow marow growedha y'n gwylvos. 34War-lergh niver an dydhyow mayth aspisowgh an tir, dew-ugens dydh, rag pub dydh unn vlydhen, hwi a dheg agas kammweyth, dew-ugens blydhen, ha hwi a wra aswonn ow displesour.’ 35My, an Arloedh, re gewsis; yn sur hemma a wrav dhe oll an tebel guntelles ma yw kuntellys er ow fynn: y'n gwylvos ma i a dheu dhe leun worfenn, hag ena i a verow.

36Ha'n wer hag a wrug Moyses aga dannvon dhe aspia an tir, hag a dhehwelis ha gul dhe'n kuntelles oll krodhvolas warnodho, ow tri tebel dherivas erbynn an tir, 37an wer neb a dhros tebel dherivas a'n tir, a verwis der an pla a-rag an Arloedh. 38Mes Yoshua mab Nun ha Kaleb mab Yefunne a besyas bos yn few, a'n wer neb eth dhe aspia an tir.

39Ha Moyses a leveris an geryow ma dhe vebyon Ysrael oll, ha'n bobel a gynis meur. 40Hag i a sevis myttin a-varr, ha mos dhe benn an vro venydhyek, ow leverel, ‘Ottani, ni a wra mos yn-bann dhe'n tyller re ambosas an Arloedh: rag ni re beghas.’ 41Mes Moyses a leveris, ‘Prag yth esowgh ow kammdremena erbynn arghadow an Arloedh? rag ny wra henna seweni. 42Na yskynnewgh, rag nyns usi an Arloedh yn agas mysk, ma na vowgh gweskys a-rag agas eskerens, 43Rag yma an Amalekysi ha'n Kananysi ena a-ragowgh, ha hwi a wra koedha der an kledha; drefenn hwi dhe dreylya a-dhiworth an Arloedh, ny vydh an Arloedh genowgh.’ 44Mes i a vedhas yskynna bys yn penn an vro venydhyek, kyn na dhibarthas na argh kevambos an Arloedh na Moyses yn-mes a'n kamp. 45Ena an Amalekysi ha'n Kananysi esa trigys y'n vro venydhyek na a dhiyskynnas, ha'ga fetha ha'ga skattra, bys yn Horma.