Offrynnow Divers

1Ha'n Arloedh a leveris dhe Moyses: 2Lavar dhe vebyon Ysrael, Pan dhewgh y'n tir may hwrewgh annedhi, hag a rov dhywgh, 3hag offrynna offrynn dre dan dhe'n Arloedh, offrynn leskys, po sakrifis dhe gollenwel ambos, po avel offrynn bolonjedhek a'n chatel po a'n flokk po orth agas goelyow apoyntys, rag gul sawer plegadow dhe'n Arloedh, 4ena neb a dhre offrynn a wra profya dhe'n Arloedh offrynn greun a unn degves rann a efa a vleus fin, kemmyskys gans kwarter hin a oyl; 5ha ty a bareus gwin rag an offrynn diwes, kwarter hin gans an offrynn leskys, po rag an sakrifis, rag pub oen. 6Po rag an hordh, ty a bareus offrynn greun a dhiw dhegves rann a efa a vleus fin, kemmyskys gans tressa rann a hin a oyl; 7ha rag an offrynn diwes ty a brof tressa rann a hin a win, sawer plegadow dhe'n Arloedh. 8Ha pan bareusydh tarow yowynk dhe'n offrynn leskys, po sakrifis rag kollenwel ambos, po rag offrynnow kres dhe'n Arloedh, 9ena y fydh profys gans an tarow yowynk offrynn greun a deyr degves rann a efa a vleus fin, kemmyskys gans hanter hin a oyl; 10ha ty a brof rag an offrynn diwes hanter hin a win, avel offrynn dre dan, sawer plegadow dhe'n Arloedh.

11Yndellma y fydh gwrys rag pub ojyon po rag pub hordh, po rag pub oen gorow po an mynnow. 12War-lergh an niver a bareusydh, yndella ty a wra gans peub war-lergh aga niver. 13Oll an re yw genesik a wra an taklow ma yndellma, owth offrynna offrynn dre dan, sawer plegadow dhe'n Arloedh. 14Ha mars eus alyon trigys genowgh, po nebonan eus yn agas mysk der agas henedhow, hag a vynn offrynna offrynn dre dan, sawer plegadow dhe'n Arloedh, kepar dell wrewgh, yndella y hwra ev. 15Rag an gemmynieth, y fydh unn ordenans ragowgh ha rag an alyon usi trigys genowgh, ordenans bys vykken der agas henedhow; par dell owgh, yndella y fydh an alyon a-rag an Arloedh. 16Unn lagha hag unn rewl a vydh ragowgh hwi ha rag an alyon a wodrik genowgh.

17An Arloedh a leveris dhe Moyses: 18Lavar dhe vebyon Ysrael: Pan dhewgh y'n tir may hwrav agas dri dhodho, 19ha pan dhebrowgh neppyth a voes an tir, hwi a wra dri offrynn drehevys a-rag an Arloedh. 20Hwi a dhrehav an frut a'gas toes, tesenn rond, avel offrynn drehevys; kepar hag offrynn drehevys a'n leur-drushya, yndella hwi a's drehav. 21A'n kynsa frut a'gas toes, torth rond, hwi a re dhe'n Arloedh, avel offrynn drehevys der agas henedhow.

22Mes mar kammwrewgh heb y wodhvos, ha mar ny wrewgh oll an gorhemmynnow ma re gewsis an Arloedh dhe Moyses, 23pup-tra a wrug an Arloedh y worhemmynna dhywgh dre leuv Moyses, a-dhia'n jydh may ros an Arloedh an gorhemmynna, ha war-rag der agas henedhow; 24ena mar peu gwrys heb y wodhvos ha heb godhvos an kuntelles, an kuntelles oll a wra offrynna unn tarow yowynk rag offrynn leskys, sawer plegadow dhe'n Arloedh, gans y offrynn greun ha'y offrynn diwes, war-lergh an devosow usadow, hag unn bogh rag offrynn pegh. 25Ha'n oferyas a wra prenedh dhe'n kuntelles oll a vebyon Ysrael hag y fydh gevys dhedha; drefenn y vos kammwrians gwrys heb y wodhvos, hag i re dhros aga offrynn, offrynn dre dan dhe'n Arloedh, ha'ga offrynn pegh a-rag an Arloedh, rag aga hammweyth. 26Hag y fydh gevys dhe'n kuntelles oll a vebyon Ysrael, ha dhe'n alyon usi trigys yn aga mysk, drefenn bos an bobel oll omvyskys y'n kammwrians gwrys heb y wodhvos.

27Mar pegh nebonan heb y wodhvos, ev a brof mynn benow unn bloedh rag offrynn pegh. 28Ha'n oferyas a wra prenedh a-rag an Arloedh rag an den a wra kammwrians heb y wodhvos, pan begh heb y wodhvos, rag prenedh ragdho; hag y fydh gevys dhodho. 29Ty a' fydh unn lagha rag neb a gammwra heb y wodhvos rag an den yw genesik yn mysk mebyon Ysrael, ha rag an alyon usi trigys yn aga mysk yntredha. 30Mes an den neb a wra neppyth, ughel y dhorn, kyn fo genesik po alyon, a villik an Arloedh; ha'n den na a vydh treghys dhe-ves dhiworth y bobel. 31Drefenn ev dhe dhispresya ger an Arloedh, ha treghi y worhemmynn, an den na a vydh treghys dhe-ves yn tien; y gammweyth a vydh warnodho.

Kessydhyans rag Defola an Sabot

32Ha pan esa mebyon Ysrael y'n gwylvos, i a gavas gour ow kuntell prennyer y'n sabot. 33Ha'n re a'n kavas ow kuntell prenn a'n dros dhe Moyses ha dhe Aron, ha dhe'n kuntelles oll. 34I a'n gorras yn-dann with, drefenn na veu ervirys an pyth a dela bos gwrys dhodho. 35Ha'n Arloedh a leveris dhe Moyses, ‘An gour a vydh gorrys dhe'n mernans; an kuntelles oll a wra y labydha gans meyn yn-mes a'n kamp.’ 36Ha'n kuntelles oll a'n dros yn-mes a'n kamp, ha'y labydha dhe'n mernans gans meyn, dell worhemmynnis an Arloedh dhe Moyses.

Kribellow war an Dillas

37An Arloedh a leveris dhe Moyses: 38Kows orth mebyon Ysrael, ha'ga erghi gul kribellow dhe gornellow aga dillas der aga henedhow, ha gorra kordenn las war an gribell a bub kornell; 39hag y fydh kribell ragowgh dhe vires warnedhi ha dhe berthi kov a worhemmynnow an Arloedh, dh'aga gul, ha na holyewgh war-lergh agas kolonn agas honan na'gas dewlagas dha honan, owth horya war aga lergh. 40Hemm yw, may perthowgh kov ha gul oll ow gorhemmynnow, ha bos sans dh'agas Duw. 41My yw an Arloedh agas Duw, a's dros yn-mes a bow Ejyp, dhe vos dha Dhuw: my yw an Arloedh agas Duw.