Rebellyans Koragh, Dathan hag Abiram

1Lemmyn Koragh mab Yshar mab Kohath mab Levi, ha Dathan hag Abiram mebyon Eliab, hag On mab Peleth, mebyon Rewben, a gemmeras gwer; 2hag i a sevis a-rag Moyses gans niver a vebyon Ysrael, dew kans ha hanter-kans hembrenkyas a'n gemmynieth, dewisys a'n kuntelles, gerys-da; 3hag i a omguntellas war-barth erbynn Moyses hag erbynn Aron, ha leverel dhedha, ‘Hwi res eth re bell! Rag oll an kuntelles yw sans, peub anedha, hag yma an Arloedh yn aga mysk; ytho prag yth omughelhowgh a-ugh kemmynieth an Arloedh?’ 4Pan y'n klewas Moyses, ev a goedhas war y fas; 5hag ev a leveris dhe Koragh ha'y gowetha oll, ‘Y'n myttin an Arloedh a wra diskwedhes piw yw dhodho, ha piw yw sans, hag a wra dhodho dos nes dhodho; ev neb a dhewis ev a'n gwra dhe dhos nes dhodho. 6Gwrewgh hemma; kemmerewgh an ynkyslestri, Koragh ha'y gowetha oll; 7gorrewgh tan ynna ha gorra ynkys ynna a-rag an Arloedh a-vorow, ha'n gour dewisys gans an Arloedh a vydh sans. Hwi res eth re bell, hwi vebyon Levi!’ 8Ha Moyses a leveris dhe Koragh, ‘Klewewgh lemmyn, hwi vebyon Levi: 9Yw hi tra re vyghan ragowgh, Duw Ysrael dh'agas diberth dhiworth kuntelles Ysrael, dh'agas dri ogas dhodho y honan, dhe wul servis yn tabernakel an Arloedh, ha dhe sevel a-rag an kuntelles dhe venystra dhedha? 10Ev a'th tros ogas dhodho hag oll dha vreder, mebyon Levi, genes. A hwilowgh an oferyaseth ynwedh? 11Ytho yth yw erbynn an Arloedh ty ha'th kowetha oll dhe omguntell war-barth; pyth yw Aron may krodhvolydh warnodho?’

12Ha Moyses a dhannvonas dhe elwel Dathan hag Abiram mebyon Eliab; hag i a leveris, ‘Ny vynnyn dos yn-bann. 13Yw hi tra vyghan ty dh'agan dri yn-bann yn-mes a dir a dhinwa leth ha mel, dh'agan ladha y'n gwylvos, mayth yw res dhis ynwedh omwul bos penntern a-ughon? 14Moy es henna ny wrussys agan dri yn tir a dhinwa leth ha mel, na ri dhyn eretons a barkow na gwinlannow. A vynnydh genna yn-mes lagasow an wer ma? Ny vynnyn dos yn-bann.’

15Ha Moyses o pur serrys, ha leverel dhe'n Arloedh, ‘Na wra vri a'ga offrynn. Ny gemmeris nag unn asen a-dhiworta, na ny bystigis nagonan anedha.’ 16Ha Moyses a leveris dhe Koragh, ‘Ty ha'th kowetha oll, bedhewgh omma a-rag an Arloedh: ty, hag i, hag Aron, a-vorow; 17ha kemmeres peub ahanowgh y ynkyslester ha gorra ynkys warnodho, ha peub ahanowgh drewgh a-rag an Arloedh y ynkyslester, dew kans ynkyslester ha hanter-kans, hag Aron, peub y ynkyslester.’ 18Ytho peub a gemmeras y ynkyslester ha gorra tan ynna ha gorra ynkys warnedha, hag i a sevis orth daras tylda an kuntelles gans Moyses hag Aron. 19Ena Koragh a guntellas oll an kuntelles er aga fynn dhe dharas tylda an kuntelles. Ha golewder an Arloedh a omdhiskwedhas dhe'n kuntelles oll.

20Ha'n Arloedh a leveris dhe Moyses hag Aron: 21Diberthewgh dhiworth an kuntelles ma, ma'n kowlloskav yn unn lamm. 22Hag i a goedhas war aga fas, ha leverel, ‘A Dhuw, Duw spyrysyon kig oll, mar pegh unn den, a vydhydh serrys gans an kuntelles oll?’ 23Ha'n Arloedh a leveris dhe Moyses: 24Lavar dhe'n kuntelles, Kewgh dhe-ves dhiworth kyrghynn annedh Koragh, Dathan hag Abiram.

25Ena Moyses a sevis ha mos dhe Dathan hag Abiram; ha henavogyon Ysrael a'n holyas. 26Hag ev a leveris dhe'n kuntelles, ‘Diberthewgh, my a'gas pys, a dyldow an debel wer ma, ha na dochyewgh travyth yw dhedha ma na vowgh diswrys gans aga feghosow oll.’ 27Ytho i a dhibarthas a gyrghynn annedh Koragh, Dathan hag Abiram, a bub tenewen; ha Dathan hag Abiram a dheuth yn-mes ha sevel orth daras aga thyldow, war-barth gans aga gwragedh, aga mebyon, ha'ga re vyghan. 28Ha Moyses a leveris, ‘Gans hemma hwi a wra godhvos an Arloedh dhe'm dannvon dhe wul oll an oberow ma, ha nyns o a'm govis vy. 29Mar merow an re ma mernans kemmyn pub den, po mar pydhons visitys gans an denkys a bub den, ena ny'm dannvonas an Arloedh. 30Mes mar kwra an Arloedh neppyth nowydh, ha'n dor a iger y anow, ha'ga howllenki, gans peub a bewons, hag i a dhiyskynn yn few dhe ifarn; ena hwi a wodhvydh an wer ma dhe dhispresya an Arloedh.’

31Ha kettell worfennas kewsel oll an geryow ma, an dor yn-danna a veu folsys a-les; 32ha'n dor a igoras y anow ha'ga howllenki, gans oll aga thiogethyow hag oll an wer a bewa Koragh ha'ga gwara oll. 33Ytho i, hag oll a bewens, a dhiyskynnas yn few dhe ifarn; ha'n dor a dhegeas a-ughta, hag i a eth mes a wel a-dhiworth kres an gemmynieth. 34Hag Ysrael oll hag esa a-dro a fias orth aga kri; rag i a leveris, ‘Ma na'gan kowllonko an dor!’ 35Ha tan a dheuth yn-mes dhiworth an Arloedh, hag a gowlloskas an dhew kans ha hanter kans gour ow profya an ynkys.

36Ena an Arloedh a leveris dhe Moyses:16:36 Y'n Ebrow, hag y'n Septuagint ha'n Vulgat 16:36–7:13 yw niverys 17:1-28. 37Lavar dhe Eleazar mab Aron an oferyas dhe gemmeres an ynkyslestri yn-bann yn-mes a'n tansys; ena skoell an tan yn-hons; rag sans yns, 38Ynkyslestri an re ma, neb a beghas orth kost aga bewnans, bedhens gwrys yn platyow mortholys avel gorheras an alter, rag i a's offrynnas a-rag an Arloedh; rakhenna sans yns. Yndellma y fydhons tokyn dhe vebyon Ysrael. 39Ytho Eleazar an oferyas a gemmeras an ynkyslestri a vrons, re offrynnsa an re a veu leskys; ha mortholys vons avel gorheras dhe'n alter, 40dhe vos kovheans dhe vebyon Ysrael, ma na wrello gour estren, ha nag yw a dhiyskynnysi Aron, dos nes dhe leski ynkys a-rag an Arloedh, ma na dheffo ha bos avel Koragh hag avel y gowethas – dell leveris an Arloedh dhe Eleazar dre leuv Moyses.

41Mes dhe'n vorow oll an kuntelles a vebyon Ysrael a grodhvolas war Moyses ha war Aron, ow leverel, ‘Hwi re ladhas pobel an Arloedh.’ 42Ha pan veu kuntellys an kuntelles erbynn Moyses hag erbynn Aron, i a dreylyas war-tu ha tylda an kuntelles; hag otta, an gommolenn a'n kudhas, ha golewder an Arloedh a omdhiskwedhas. 43Ha Moyses hag Aron a dheuth dhe'n tu a-rag a dylda an kuntelles, 44ha'n Arloedh a leveris dhe Moyses, 45‘Kewgh dhe-ves a-dhiworth an kuntelles ma, may hylliv aga howlleski yn unn lamm.’ Hag i a goedhas war aga fas. 46Ha Moyses a leveris dhe Aron, ‘Kemmer an ynkyslester, ha gorra tan ynno a-dhiworth an alter, ha'y dhoen yn uskis dhe'n kuntelles, ha gul prenedh ragdha; rag sorr res eth yn-mes dhiworth an Arloedh; an pla re dhallathas.’ 47Ytho Aron a'n kemmeras dell leveris Moyses, ha poenya yn mysk an kuntellyans; hag otta, an pla re dhallathsa seulabrys yn mysk an bobel; hag ev a worras an ynkys, ha gul prenedh rag an bobel. 48Hag ev a sevis ynter an re varow ha'n re vew; ha'n pla a veu lettys. 49Lemmyn an re a verwis der an pla o peswardhek mil ha seyth kans, dres niver an re a verwis yn negys Koragh. 50Hag Aron a dhehwelis dhe Moyses dhe dharas tylda an kuntelles pan veu lettys an pla.