Gwelenn Aron a Egin

1An Arloedh a leveris dhe Moyses: 2Kows orth mebyon Ysrael, ha kavoes anedha gwelynni, onan rag chi pub tas, a'ga hembrenkysi oll war-lergh chiow aga thasow, dewdhek gwelenn. Skrif hanow pub gour war y welenn, 3ha skrif hanow Aron war welenn Levi. Rag y fydh unn welenn rag penn chi pub tas. 4Ena ty a's gorr yn tylda an kuntelles a-rag an dustuni, le may fetyav genes. 5Ha gwelenn an gour a dhewisav a wra egina; yndellma my a wra dhe hedhi a-dhiwarnav krodhvolyow mebyon Ysrael may krodhvolons warnas. 6Moyses a gewsis orth mebyon Ysrael; ha pubonan a'n hembrenkysi a ros gwelenn dhodho, unn welenn rag pub hembrenkyas, war-lergh chi aga thasow: dewdhek gwelenn; hag yth esa gwelenn Aron yn mysk aga gwelynni. 7Ha Moyses a worras an gwelynni a-rag an Arloedh yn tylda an dustuni.

8Ha'n vorow Moyses eth a-berth yn tylda an dustuni; hag otta, gwelenn Aron rag chi Levi re eginsa ha dyllo eginyow, ha dri bleujennow yn-mes; ha hi a dhug alamandow adhves. 9Ena Moyses a dhros oll an gwelynni a-dhiworth lok an Arloedh dhe vebyon Ysrael oll, ha pub gour a viras ha kemmeres y welenn. 10Ha'n Arloedh a leveris dhe Moyses, ‘Daskorr gwelenn Aron a-rag an dustuni, dhe vos gwithys avel tokyn rag an vebyon a dhiwostytter, may hwrylli diwedh a'ga krodhvolyow warnav, ma na varwons.’ 11Moyses a wrug kepar dell worhemmynnsa an Arloedh dhodho; yndella ev a wrug.

12Ha mebyon Ysrael a leveris dhe Moyses, ‘Otta, ni a verow, diswrys on, diswrys on ni oll. 13Pubonan ow tos nes, neb a dheu nes dhe dabernakel an Arloedh, a verow. A wren ni oll mos dhe goll?’