Deverow an Oferysi y'n Sentri

1Ytho an Arloedh a leveris dhe Aron: Ty ha'th vebyon ha chi dha das genes a wra doen kammweyth an sentri; ha ty ha'th vebyon genes a wra doen kammweyth agas oferyaseth. 2Ha genes doro dha vreder ynwedh, loeth Levi, loeth dha das, may hallons junya genes, ha menystra dhis pan vydhydh ty, ha'th vebyon genes, a-rag tylda an dustuni. 3I a wra dha attendya ha gwitha deverow oll an tylda; mes ny wrons dos nes dhe lestri an sentri po dhe'n alter, ma na wrellons i, na hwi, merwel. 4I a wra junya genes, hag attendya tylda an kuntelles, rag servis oll an tylda; ha ny wra dos ogas dhywgh estren. 5Ha hwi a with deverow an sentri ha deverow an alter, ma na vo sorr na fella war vebyon Ysrael. 6Hag otta, my re gemmeras agas breder an Levysi yn-mes a vebyon Ysrael; i yw ro dhis, res dhe'n Arloedh, dhe wul servis tylda an kuntelles. 7Ha ty ha'th vebyon genes a wra attendya agas oferyaseth rag pup-tra ow tochya an alter hag a-ji dhe'n groglenn;18:7 dhe'n groglenn: Henn yw an groglenn ynter an klos ha'n tabernakel. ha hwi a wra servya. My a re agas oferyaseth yn ro; ha'n estren a dheu ogas a vydh gorrys dhe'n mernans.

Kevrenn an Offrynnow Res dhe Aron ha'y Vebyon

8Ena an Arloedh a leveris dhe Aron: Otta, my re ros dhis charj a'n offrynnow drehevys dhymm, oll an taklow sakrys a vebyon Ysrael; my re's ros dhis avel rann, ha dhe'th vebyon avel ordenans bys vykken. 9Hemma a vydh dhis a'n taklow an moyha sans, gwithys a'n tan: pub offrynn anedha – pub offrynn greun anedha, ha pub offrynn pegh anedha ha pub offrynn kammweyth anedha, hag a rons dhymm – a vydh an moyha sans dhis ha dhe'th vebyon. 10Yn tyller an moyha sans ty a'n deber; pub gorreydh a yll y dhybri; y fydh sans dhis. 11Hemm yw dhis ynwedh, offrynn drehevys a'ga ro, oll an offrynnow gwevys a vebyon Ysrael; my re's ros dhis, ha dhe'th vebyon ha dhe'th vyrghes genes, avel ordenans bys vykken; pub huni yw glan y'th chi a yll dybri anodho. 12Oll an gwella a'n oyl, hag oll an gwella a'n gwin hag a'n greun, kynsa frut a'n pyth a rons dhe'n Arloedh, my a re dhis. 13Kynsa frut adhves a oll eus yn aga thir, hag a dhrons dhe'n Arloedh, a vydh dhis; pub huni yw glan y'th chi a yll dybri anodho. 14Pup-tra sakrys yn Ysrael a vydh dhis. 15Pup-tra a iger an dorr a bub kig, po den po best, a offrynnons dhe'n Arloedh, a vydh dhis; byttegyns kynsa-genys mab-den ty a dhaspren, ha'n kynsa-genys a vestes avlan ty a dhaspren. 16Ha pris aga daspren (orth unn mis ty a's daspren) ty a sett orth pymp shekel yn arghans, war-lergh shekel an sentri hag yw ugens gera. 17Mes kynsa-genys ojyon, po kynsa-genys davas, po kynsa-genys gaver, ny dhasprenydh; sans yns. Ty a skoell aga goes war an alter, ha leski aga blonek avel offrynn dre dan, sawer plegadow dhe'n Arloedh; 18mes aga hig a vydh dhis; kepar dell yw dhis an vronn yw gwevys ha'n vordhos dhyghow. 19Oll an offrynnow drehevys a'n taklow sans a brof mebyon Ysrael dhe'n Arloedh my a re dhis, ha dhe'th vebyon ha dhe'th vyrghes genes, avel ordenans bys vykken; yth yw kevambos a hoelan bys vykken a-rag an Arloedh ragos ha rag dha agh genes. 20Ha'n Arloedh a leveris dhe Aron: Ny' fydh eretons yn aga thir, na ny' fydh rann vyth yntredha; my yw dha rann ha'th eretons yn mysk mebyon Ysrael.

21Dhe'n Levysi my re ros pub dega yn Ysrael rag eretons, yn attal a'ga servis a wrons, aga servis yn tylda an kuntelles. 22Hag alemma rag ny dheu mebyon Ysrael ogas dhe dylda an kuntelles, ken i a dheg pegh ha merwel. 23Mes an Levysi a wra servis tylda an kuntelles, hag i a wra doen aga hammweyth; y fydh ordenans bys vykken der agas henedhow; hag yn mysk mebyon Ysrael ny's tevydh eretons. 24Rag dega mebyon Ysrael, hag a dhrons avel offrynn drehevys dhe'n Arloedh, my re ros dhe'n Levysi avel eretons; ytho my re leveris dhedha na's tevydh eretons yn mysk mebyon Ysrael.

25Ha'n Arloedh a leveris dhe Moyses: 26Keffrys, ty a lever dhe'n Levysi: Pan gemmerowgh a-dhiworth mebyon Ysrael an dega re res dhywgh dhiworta rag agas eretons, ena hwi a wra offrynna offrynn drehevys anodho dhe'n Arloedh, dega a'n dega. 27Ha'gas offrynn drehevys a vydh reknys dhywgh kepar dell ve greun an leur-drushya, hag avel leunder an winwask. 28Yndellma hwi ynwedh a re offrynn drehevys dhe'n Arloedh a'gas degedhow oll, hag a dhegemmerowgh a-dhiworth mebyon Ysrael; hag anodho ty a re offrynn drehevys an Arloedh dhe Aron an oferyas. 29Yn-mes a'n rohow oll dhywgh, hwi a wra profya pub offrynn drehevys rag an Arloedh, a oll an gwella anedha, ow ri an rann sanshes anedha. 30Yndella ty a lever dhedha: Pan dhrehevowgh a-dhiworto an gwella anodho, an remenant a vydh reknys dhe'n Levysi avel askorr an leur-drushya, hag avel askorr an winwask; 31ha hwi a yll y dhybri yn pub tyller pynag, hwi ha'gas tiogethyow; rag yth yw agas gober rag agas servis yn tylda an kuntelles. 32Ha ny dhegowgh pegh dre hemma, pan dhrehevowgh an gwella anodho. Mes ny dhisakrowgh taklow sans mebyon Ysrael, ma na verwowgh.