Lusu an Lejek Rudh

1Lemmyn an Arloedh a leveris dhe Moyses hag Aron: 2Hemm yw ordenans an lagha re worhemmynnis an Arloedh: Kows dhe vebyon Ysrael may trollons dhywgh lejek rudh heb difyk na namm, ha warnedhi na dheuth bythkweth yew. 3Ha hwi a's re dhe Eleazar an oferyas, hag ev a's kemmer yn-mes a'n kamp ha hi a vydh ledhys a-ragdho; 4hag Eleazar an oferyas a wra kemmeres nebes a'y goes gans y vys, ha skoellya neppyth a'y goes war du a-rag tylda an kuntelles seythgweyth. 5Ha'n lejek a vydh leskys yn y wolok; hy kroghen, hy hig, ha'y goes, gans hy theyl, a vydh leskys; 6ha'n oferyas a wra kemmeres prenn keder ha hyssop ha pann kogh, ha'ga thewlel yn mysk losk an lejek. 7Ena an oferyas a wra golghi y dhillas ha badhya y gorf yn dowr, hag a-wosa ev a yll dos y'n kamp; ha'n oferyas a vydh avlan bys y'n gorthugher. 8Ev neb a lesk an lejek a wra golghi y dhillas yn dowr, ha badhya y gorf yn dowr, hag a vydh avlan bys y'n gorthugher. 9Ha gour neb yw glan a wra kuntell lusu an lejek, ha'ga gorra yn-mes a'n kamp yn tyller glan; hag i a vydh gwithys rag kuntelles mebyon Ysrael rag an dowr a lanheans, rag dileans pegh. 10Hag ev neb a guntell lusu an lejek a wra golghi y dhillas, ha bos avlan bys an gorthugher. Ha hemma a vydh dhe vebyon Ysrael, ha dhe'n alyon usi trigys yntredha, ordenans bys vykken.

11Ev neb a doch an korf marow a dhen pynag a vydh avlan seyth dydh; 12ev a wra omlanhe gans an dowr y'n tressa dydh hag y'n seythves dydh, hag yndellma bos glan; mes mar ny omlanha y'n tressa dydh hag y'n seythves dydh, ny dheu ha bos glan. 13Piwpynag a docchyo den marow, korf den pynag re verwis, ha ny omlanha, a dhefol tabernakel an Arloedh, ha'n den na a vydh treghys a-dhiworth Ysrael; drefenn na veu skoellys warnodho an dowr a lanheans, ev a vydh avlan; yma y avlander hwath warnodho.

14Homm yw an lagha pan verow den yn tylda; pub huni a dheu y'n tylda ha pub huni usi y'n tylda, a vydh avlan seyth dydh. 15Ha pub lester igor, na'n jeves gorher kelmys warnodho, yw avlan. 16Piwpynag y'n gwel igor a docchyo nebonan yw ledhys gans kledha, po korf marow, po askorn den, po bedh, a vydh avlan seyth dydh. 17Rag an den avlan i a gemmer neppyth a lusu losk an offrynn pegh ha dowr ow resek a vydh keworrys yn lester; 18ena gour glan a wra kemmeres hyssop, ha'y dhroghya y'n dowr, ha'y skoellya war an tylda, ha war oll an daffar ha war an dus esa ena, ha warnodho neb a davas an askorn, po an den ledhys, po an den marow, po an bedh; 19ha'n den glan a wra skoellya war an den avlan y'n tressa dydh hag y'n seythves dydh; yndellma y'n seythves dydh ev a'n glanha, hag ev a wra golghi y dhillas hag omvadhya yn dowr, ha dhe'n gorthugher ev a vydh glan.

20Mes an den yw avlan ha ny omlanha, an enev na a vydh treghys a-dhiworth an gemmynieth, drefenn ev dhe dhefola sentri an Arloedh; drefenn na veu skoellys warnodho an dowr a lanheans, ev yw avlan. 21Hag y fydh ordenans bys vykken ragdha. Ev neb a skoell an dowr a lanheans a wra golghi y dhillas; hag ev neb a doch an dowr a lanheans a vydh avlan bys an gorthugher. 22Ha pypynag a wra an den avlan y dochya a vydh avlan; ha piwpynag a'n tocchyo a vydh avlan bys an gorthugher.