Towlow rag an Kampow ha'n Kerdhow

1An Arloedh a leveris dhe Moyses hag Aron, 2‘Mebyon Ysrael a wra kampya peub ryb y vaner y honan, gans toknys chiow aga thasow; i a wra kampya a-dal tylda an kuntelles a bub tu. 3An re ow kampya war denewen an est war-tu ha'n howldrehevel a vydh a vaner an kamp a Yuda herwydh aga luyow; ha hembrenkyas mebyon Yuda a vydh Nahshon mab Amminadab. 4Y lu dell veu niverys a veu peswardhek mil ha tri-ugens ha hwegh kans. 5An re a gamp rybdho a vydh loeth Yssakar; ha hembrenkyas mebyon Yssakar a vydh Nethanel mab Suar; 6ha'y lu dell veu niverys a veu peswardhek mil ha dew-ugens ha peswar kans. 7Ena loeth Zebulun; ha hembrenkyas mebyon Zebulun a vydh Eliab mab Helon. 8Y lu dell veu niverys a veu seytek mil ha dew-ugens ha peswar kans. 9Niver kowal kamp Yuda, herwydh aga luyow, yw kans hwegh mil ha peswar-ugens ha peswar kans. I a wra mos yn kynsa war an kerdh.

10‘Dhe'n barth dhyghow y fydh baner kamp Rewben, herwydh aga luyow; ha hembrenkyas mebyon Rewben a vydh Elisur mab Shedeur. 11Y lu dell veu niverys a veu hwegh mil ha dew-ugens ha pymp kans. 12Ha'n re ow kampya rybdho a vydh loeth Simeon; ha hembrenkyas mebyon Simeon a vydh Shelumiel mab Surishadday. 13Y lu dell veu niverys a veu nownsek mil ha dew-ugens ha trihans. 14Ena loeth Gad; hembrenkyas mebyon Gad a vydh Eliasaf mab Reuel. 15Y lu dell veu niverys a veu pymp mil ha dew-ugens ha hwegh kans ha hanter-kans. 16Niver kowal kamp Rewben herwydh aga luyow, yw kans unnek ha dew-ugens mil ha hanter-kans. I a wra mos yn nessa war an kerdh.

17‘Ena tylda an kuntelles a wra mos war an kerdh, gans kamp an Levysi yn mysk an kampow; dell gampyons, yndellma i a wra mos war an kerdh, peub yn y le, ryb y vaner.

18‘War-tu ha'n howlsedhes y fydh baner kamp Efraym herwydh aga luyow; ha hembrenkyas mebyon Efraym a vydh Elishama mab Ammihud, 19Y lu dell veu niverys a veu dew-ugens mil ha pymp kans. 20Ha rybdho y fydh loeth Manasse; ha hembrenkyas mebyon Manasse a vydh Gamaliel mab Pedahsur. 21Y lu dell veu niverys a veu dewdhek mil warn ugens ha dew kans. 22Ena loeth Benyamin; hembrenkyas mebyon Benyamin a vydh Abidan mab Gideoni. 23Y lu dell veu niverys a veu pymthek mil warn ugens ha peswar kans. 24Niver kowal kamp Efraym, herwydh aga luyow, yw kans hag eth mil hag unn kans. I a wra mos yn tressa war an kerdh.

25‘War-tu ha'n gledhbarth y fydh baner kamp Dan herwydh aga luyow; ha hembrenkyas mebyon Dan a vydh Ahiezer mab Ammishadday. 26Y lu dell veu niverys a veu dew vil ha tri-ugens ha seyth kans. 27Ha'n re a gamp rybdho a vydh loeth Asher; ha hembrenkyas mebyon Asher a vydh Pagiel mab Okran. 28Y lu dell veu niverys a veu unn mil ha dew-ugens ha pymp kans. 29Ena loeth Naftali; hembrenkyas mebyon Naftali a vydh Ahira mab Enan. 30Y lu dell veu niverys a veu trydhek mil ha dew-ugens ha peswar kans. 31Niver kowal kamp Dan yw kans seytek ha dew-ugens mil ha hwegh kans. I a wra mos yn tiwettha, ryb aga baneryow.’

32An re ma yw mebyon Ysrael dell vons niverys herwydh chiow aga thasow; peub y'n kampow a veu niverys herwydh aga luyow o hwegh kans ha tri mil ha pymp kans ha hanter-kans. 33Mes ny veu niverys an Levysi yn mysk mebyon Ysrael, dell worhemmynnis an Arloedh dhe Moyses.

34Ytho mebyon Ysrael a wrug war-lergh pup-tra a worhemmynnis an Arloedh dhe Moyses; yndellma I a gampyas ryb aga baneryow, hag yndellma i a dhallathas war an kerdh, pubonan gans y deylu, herwydh chi y das.