Mernans Miryam, ha Dowrow Meriba

1Ha mebyon Ysrael, an kuntelles oll, a dheuth a-ji dhe wylvos Sin y'n kynsa mis, ha'n bobel a wortas yn Kadesh; ha Miryam a verwis ena, hag a veu ynkleudhys ena.

2Lemmyn nyns esa dowr rag an kuntelles; hag i a omguntellas war-barth erbynn Moyses hag erbynn Aron. 3Ha'n bobel a genkias gans Moyses ow leverel, ‘A marwen pan verwis agan breder a-rag an Arloedh! 4Prag y tresys kemmynieth an Arloedh a-berth y'n gwylvos ma, may ferwyn omma, ha ni ha'gan chatel? 5Ha prag y hwrussys dhyn dos yn-bann yn-mes a Ejyp, dh'agan dri dhe'n tebel dyller ma? Nyns yw tyller rag hasa has, na figys, na gwinbrennyer, na greunavalow; ha nyns eus dowr dh'y eva.’ 6Ena Moyses hag Aron eth a-dhiworth lok an gemmynieth dhe dharas tylda an kuntelles, ha koedha war aga fas. Ha golewder an Arloedh a omdhiskwedhas dhedha, 7ha'n Arloedh a leveris dhe Moyses: 8Kemmer an welenn, ha dri an kuntelles war-barth, ty hag Aron dha vroder, ha kewsewgh orth an garrek a-rag aga lagasow ha hi a re hy dowr; yndellma ty a dhre dowr yn-mes a'n garrek ragdha; yndellma ty a re diwes dhe'n kuntelles ha'ga chatel. 9Ytho Moyses a gemmeras an welenn esa a-dherag an Arloedh, dell worhemmynnis dhodho.

10Ena Moyses hag Aron a guntellas an gemmynieth war-barth a-rag an garrek, hag ev a leveris dhedha, ‘Klewewgh lemmyn, a dus dhiwostydh; a wren ni dri dowr ragowgh yn-mes a'n garrek ma?’ 11Ha Moyses a dhrehevis y dhorn ha gweskel an garrek gans y welenn diwweyth; ha dowr a dheuth yn-mes yn lanwes, ha'n kuntelles a evas, ha'ga chatel. 12Ha'n Arloedh a leveris dhe Moyses ha dhe Aron, ‘Drefenn na gryssowgh ynnov, dhe'm sanshe yn lagasow mebyon Ysrael, rakhenna ny vydhowgh ow tri an gemmynieth ma y'n tir re res dhedha.’ 13An re ma yw dowrow Meriba, le may kenkias mebyon Ysrael gans an Arloedh, ha dredha ev a brovas y vos sans.

Edom a Nagh Kummyas Tremena

14Moyses a dhannvonas kannasow a Kadesh dhe vyghtern Edom, ‘Yndellma y lever dha vroder Ysrael: Ty a woer oll an anken yw hwarvedhys dhyn: 15fatell eth agan tasow yn-nans dhe Ejyp, hag yth esen trigys yn Ejyp termyn hir; ha'n Ejyptianys a'gan dyghtyas yn harow, ha'gan tasow. 16Ha pan grisyn war an Arloedh, ev a glewas agan lev, ha dannvon el, ha'gan dri yn-mes a Ejyp; hag ottani yn Kadesh, sita war amal dha diredh. 17Lemmyn gas ni dhe dremena dres dha dir. Ny dremenyn der an gwel na der an gwinlannow, na ny wren eva dowr a buth; ni a wra mos yn fordh-veur an myghtern, ny dreylyn a-denewen dhe'n dyghow na dhe'n kledh, bys pan dremensyn dha diredh.’ 18Mes Edom a leveris dhodho, ‘Ny dremenowgh, ma na dhyffiv gans an kledha er dha bynn.’ 19Ha mebyon Ysrael a leveris dhodho, ‘Ni a gerdh der an fordh-veur; ha mar evyn a'th dowr, my ha'm chatel, ena my a'n pe; gas vy unnweyth dhe dremena war droes, travyth moy.’ 20Mes ev a leveris, ‘Ny dremenowgh.’ Hag Edom a dheuth yn-mes er aga fynn gans pobel niverus, ha gans dorn grev. 21Yndellma Edom a naghas ri fordh dhe Ysrael der y diredh; ytho Ysrael a dreylyas a-dhiworto.

Mernans Aron

22Hag i a dravalyas a-dhiworth Kadesh, ha mebyon Ysrael, an kuntelles oll, a dheuth dhe venydh Hor. 23Ha'n Arloedh a gewsis orth Moyses hag orth Aron yn menydh Hor, war amal pow Edom, ow leverel, 24‘Aron a vydh kuntellys dh'y bobel; rag ny wra entra an tir re res dhe vebyon Ysrael, drefenn hwi dhe rebellya erbynn ow gorhemmynn orth dowrow Meriba. 25Kemmer Aron hag Eleazar y vab, ha'ga dri dhe venydh Hor; 26ha diwisk y dhillas a-dhiwar Aron, ha'ga gorra war Eleazar y vab; hag Aron a vydh kuntellys dh'y bobel, hag a verow ena.’ 27Moyses a wrug dell worhemmynnis an Arloedh; hag i a yskynnas menydh Hor yn golok an kuntelles oll. 28Ha Moyses a dhiwiskas a-dhiwar Aron y dhillas, ha'ga gorra war Eleazar y vab; hag Aron a verwis ena war benn an menydh. Ena Moyses hag Eleazar a dhiyskynnas a'n menydh. 29Ha pan welas an kuntelles oll bos Aron tremenys, oll chi Ysrael a oelas rag Aron deg dydh warn ugens.