An Sarf a Vrons

1Pan glewas an Kananyas, myghtern Arad, esa trigys y'n Negeb, bos Ysrael ow tos dre fordh Atharim, ev a vatalyas orth Ysrael ha kemmeres re anedha yn kethneth. 2Hag Ysrael a wrug ambos dhe'n Arloedh, ow leverel, ‘Mar mynnydh yn hwir ri an bobel ma y'm dorn, ena my a wra sakra aga sitys dhe dhistruyans.’ 3Ha'n Arloedh a glewas lev Ysrael, hag a ros an Kananysi yn y dhorn;21:3 yn y dhorn: Ow siwya an Septuagint ha'n Syriek. Nyns usi an geryow y'n tekst ebrow. hag i a's sakras dhe dhistruyans, ha'ga sitys; ytho hanow an tyller a veu gelwys Horma.

4A-dhiworth menydh Hor i eth yn-kerdh der an fordh dhe'n Mor Rudh dhe vos a-dro dhe bow Edom; ha'n bobel a dheuth ha bos digolonnek war an fordh. 5Ha'n bobel a gewsis erbynn Duw hag erbynn Moyses, ‘Prag y'gan dresys yn-mes a Ejyp dhe verwel y'n gwylvos? Rag nyns eus boes na dowr, ha kas yw genen an boes diles ma.’ 6Ena an Arloedh a dhannvonas serf tanek yn mysk an bobel, hag i a vrathas an bobel, may ferwis lies den a Ysrael. 7Ha'n bobel a dheuth dhe Moyses, ha leverel, ‘Ni re beghas, rag ni a gewsis erbynn an Arloedh hag er dha bynn; gwra pysi dhe'n Arloedh, may kemmerro an serf dhe-ves ahanan.’ Ytho Moyses a bysis rag an bobel. 8Ha'n Arloedh a leveris dhe Moyses, ‘Gwra ragos sarf danek, ha'y gorra war beul; ha peub re beu brethys, pan y's gwel, a wra bewa.’ 9Ytho Moyses a wrug sarf a vrons, ha'y gorra war beul; ha mar prattha sarf den vytholl, ev a virsa orth an sarf vrons ha bewa.

An Kerdh dhe Moab

10Ha mebyon Ysrael eth yn-kerdh, ha kampya yn Oboth. 11Hag i eth yn-kerdh a-dhiworth Oboth, ha kampya yn Iye-abarim, y'n gwylvos usi a-dal Moab, war-tu ha'n howldrevel. 12Alena i eth yn-kerdh, ha kampya yn nans Zered. 13Alena i eth yn-kerdh, ha kampya a'n tu arall dhe Arnon, usi y'n gwylvos a ystynn a-dhiworth or an Amorysi; rag Arnon yw or Moab, yntra Moab ha'n Amorysi. 14Rakhenna yth yw leverys yn Lyver Breselyow an Arloedh,

‘Waheb yn Sufa ha'n nansow a Arnon

15ha ledrow an nansow

a ystynn dhe drigva Ar,

hag a boes trohag or Moab.’

16Hag alena i a besyas mos bys yn Beer; henn yw an puth a gewsis anodho an Arloedh dhe Moyses, ‘Kuntell an bobel war-barth, ha my a re dhedha dowr.’ 17Ena Ysrael a ganas an gan ma:

‘Sav, a buth!

Kenewgh dhodho!

18An bennsevigyon a balas an puth,

gwelhevin an bobel a'n kleudhyas

gans an dernwelenn, gans aga gwelynni.’

Ha dhiworth an gwylvos i eth dhe Mattana, 19hag a-dhiworth Mattana dhe Nahaliel, hag a-dhiworth Nahaliel dhe Bamoth, 20hag a-dhiworth Bamoth dhe'n nans yn gwel Moab ryb penn Pisga hag a vir war-woeles war an gwylvos.21:20 an gwylvos: Ebrow Yeshimon, martesen hanow tyller.

Fethans Sihon Myghtern an Amorysi

21Ena Ysrael a dhannvonas kannasow dhe Sihon myghtern an Amorysi, ow leverel, 22‘Gas vy dhe dremena dre dha dir; ny dreylyn a-denewen yn gwel nag yn gwinlann; ny wren eva dowr a buth; ni a wra mos yn fordh-veur an myghtern, bys pan dremensyn dha diredh.’ 23Mes ny asas Sihon Ysrael dhe dremena y diredh. Ev a guntellas war-barth oll y bobel, hag eth yn-mes erbynn Ysrael dhe'n gwylvos, hag a dheuth dhe Yahas, hag a vatalyas orth Ysrael. 24Hag Ysrael a'n gweskis gans min an kledha, ha kemmeres yn perghennogeth y dir a Arnon dhe Yabbok, bys y'n Ammonysi; rag krev o or an Ammonysi. 25Hag Ysrael a gemmeras oll an sitys ma, hag Ysrael a drevesigas sitys oll an Amorysi, yn Heshbon, hag yn oll y wigow. 26Rag Heshbon o sita Sihon myghtern an Amorysi, re omladhsa erbynn myghtern Moab, kyns ha kemmeres oll y dir yn-mes a'y dhorn, bys yn Arnon. 27Yndella an ganoryon a lavarow koth a lever,

‘Dewgh dhe Heshbon, gesewgh hi dhe vos drehevys,

bedhes fondys sita Sihon.

28Rag tan eth yn-rag a-dhiworth Heshbon,

flamm dhiworth sita Sihon.

Ev a gowlloskas Ar Moab,

arlydhi breow Arnon.

29Go-jy, A Moab!

Ty yw diswrys, a bobel Kemosh!

Ev re wrug y vebyon yn fowesigyon,

ha'y vyrghes yn kethesow,

dhe vyghtern an Amorysi, Sihon.

30Ni re dennas sethow er aga fynn;

distruys yw a Heshbon bys yn Dibon,

ha ni re wastyas bys yn Nofah, bys yn Medeba.’

Fethans Og Myghtern Bashan

31Yndellma Ysrael a drigas yn pow an Amorysi. 32Ha Moyses a dhannvonas dhe aspia Yazer; hag i a gemmeras y wigow, ha fesya an Amorysi esa ena. 33Ena i a dreylyas ha mos der an fordh dhe Bashan; hag Og myghtern Bashan a dheuth yn-mes er aga fynn, ev ha'y bobel oll dhe vatalyas, yn Edrei. 34Mes an Arloedh a leveris dhe Moyses, ‘Na borth own anodho; rag my re'n ros y'th dorn, hag oll y bobel, ha'y dir; ha ty a wra dhodho par dell wrussys dhe Sihon myghtern an Amorysi, esa trigys yn Heshbon.’ 35Ytho i a'n gweskis, ha'y vebyon, ha'y bobel oll, bys pan nag esa fowesik vytholl gesys dhodho; hag i a bewas y dir.