Balak a Elow Balaam may Mollottho Ysrael

1Ena mebyon Ysrael eth yn-kerdh, ha kampya yn plenys Moab, ryb Yordan, a-dal Yeriko. 2Ha Balak mab Sippor a welas pup-tra re wrussa Ysrael dhe'n Amorysi. 3Hag yth esa Moab yn own meur a'n bobel, drefenn aga bos lies; hag euth a'n jeva Moab a vebyon Ysrael. 4Ha Moab a leveris dhe henavogyon Midyan, ‘An routh ma a wra dybri pup-tra eus a-dro dhyn, par dell dheber an ojyon gwels an gwel.’ Ytho Balak mab Sippor, neb o myghtern Moab y'n termyn na, 5a dhannvonas kannasow dhe Balaam mab Beor dhe Pethor, usi ogas dhe'n avon, yn tir mebyon y bobel, dh'y elwel, ow leverel, ‘Otta, pobel re dheuth yn-mes a Ejyp; i a gudh enep an nor, hag ymons i trigys a-dal dhymm. 6Deus lemmyn, molloth an bobel ragov, rag aga bos re alloesek ragov; martesen y hallav aga fetha ha'ga fesya dhiworth an tir; rag dell wonn, ev neb a vennigydh yw benniges, ha neb a vollethydh yw mollothek.’

7Ytho henavogyon Moab ha henavogyon Midyan eth yn-kerdh gans pygans rag dewinieth yn aga dorn, ha dos dhe Balaam, ha ri dhodho messaj Balak. 8Hag ev a leveris dhodho, ‘Trigewgh omma an nos ma, ha my a dhre dhywgh ger, dell gews an Arloedh dhymm’; ytho pennsevigyon Moab a wortas gans Balaam. 9Ha Duw a dheuth dhe Balaam ha leverel, ‘Piw yw an wer ma genes?’ 10Ha Balaam a leveris dhe Dhuw, ‘Balak mab Sippor, myghtern Moab, re dhannvonas dhymm, ow leverel, 11“Otta, pobel re dheuth yn-mes a Ejyp, ha hi a gudh enep an dor; deus lemmyn ha'ga mollethi ragov; martesen y hallav omladh er aga fynn ha'ga gorra yn-mes.” ’ 12Duw a leveris dhe Balaam, ‘Ny wredh mos gansa; ny wredh mollethi an bobel, rag benniges yns.’ 13Ytho Balaam a sevis myttin, ha leverel dhe bennsevigyon Balak, ‘Kewgh dh'agas tir agas honan; rag an Arloedh re'm naghas mos genowgh.’ 14Ytho pennsevigyon Moab a sevis ha mos dhe Balak, ha leverel, ‘Balaam a nagh dos genen.’

15Unnweyth arta Balak a dhannvonas pennsevigyon, moy aga niver ha moy enorys agessa. 16Hag i a dheuth dhe Balaam ha leverel dhodho, ‘Yndellma y lever Balak mab Sippor: “Na'gas lett travyth a dhos dhymm; 17rag my a re dhywgh yn sur enor meur, ha pup-tra a leverydh dhymm my a'n gwra; dewgh, mollethewgh an bobel ma ragov.” ’ 18Mes Balaam a worthybis ha leverel dhe servysi Balak, ‘Kyn rollo Balak dhymm y ji leun a arghans hag owr, ny allsen mos dres gorhemmynn an Arloedh ow Duw, dhe wul le po moy. 19My a'gas pys, lemmyn, trigewgh omma an nos ma ynwedh, may hwodhviv neppyth pella a wra an Arloedh leverel dhymm.’ 20Ha Duw a dheuth dhe Balaam y'n nos ha leverel dhodho, ‘Mar teuva an wer dhe'th elwel, ke gansa; mes marnas an pyth a worhemmynnav, ty a'n gwra.’

Balaam, an Asen, ha'n El

21Ytho Balaam a sevis myttin, ha dibra y asen,22:21-33 y asen: An asen a veu kasek-asen. ha mos gans pennsevigyon Moab. 22Mes sorr Duw a veu enowys drefenn ev dhe vos; hag el an Arloedh a sevis y'n fordh avel y eskar. Lemmyn yth esa ev owth ehwias war an asen, hag yth esa y dhew was ganso. 23Ha'n asen a welas el an Arloedh ow sevel y'n fordh, ha kledha noeth yn y dhorn; ha'n asen a dreylyas a-denewen yn-mes a'n fordh, ha mos y'n gwel; ha Balaam a weskis an asen, dh'y threylya y'n fordh. 24Ena el an Arloedh a sevis yn fordh gul ynter an gwinlannow, gans fos a bub tu. 25Ha pan welas an asen el an Arloedh, hi a omherdhyas erbynn an fos ha stroetha troes Balaam erbynn an fos; ytho ev a's gweskis arta. 26Ena el an Arloedh eth yn-rag, ha sevel yn tyller kul, le nag esa fordh dhe dreylya naneyl dhe'n dyghow na dhe'n kledh. 27Pan welas an asen el an Arloedh, hi a wrowedhas yn-dann Balaam; ha sorr Balaam a veu enowys, hag ev a weskis an asen gans y welenn. 28Ena an Arloedh a igoras ganow an asen, ha hi a leveris dhe Balaam, ‘Pandr'a wrug vy dhis ma'm gweskis an teyr gweyth ma?’ 29Ha Balaam a leveris dhe'n asen, ‘Drefenn ty dhe wul ges ahanav: a pe kledha y'm dorn, erbynn lemmyn my a'th ladhsa.’ 30Ha'n asen a leveris dhe Balaam, ‘A nyns ov vy dha asen, warnav may marghegsys pup-prys a-ban veuv vy dhis bys y'n jydh ma? En vy bythkweth usys dhe wul yndellma dhis?’ Hag ev a leveris, ‘Nag es.’

31Ena an Arloedh a igoras dewlagas Balaam, hag ev a welas el an Arloedh, ow sevel y'n fordh, ha'y gledha noeth yn y dhorn; hag ev a omblegyas, ha koedha war y fas. 32Hag el an Arloedh a leveris dhodho, ‘Prag y hwesksys dha asen an teyr gweyth ma? Otta, my re dheuth yn-mes dhe'th enebi, rag dha fordh yw gorth a-ragov; 33ha'n asen a'm gwelas, ha treylya a-denewen a-ragov an teyr gweyth ma. Mar ny dreyllya a-denewen a-dhiworthiv, yn sur nammnygen my a'th ladhsa ha gasa hi dhe vewa.’ 34Ena Balaam a leveris dhe el an Arloedh, ‘My re beghas, rag ny wodhyen ty dhe sevel y'n fordh er ow fynn. Lemmyn ytho, mars yw tebel y'th wolok, my a dhehwel arta.’ 35Hag el an Arloedh a leveris dhe Balaam, ‘Ke gans an wer; mes na gows marnas an ger a worhemmynnav dhis, henna y kewsydh.’ Ytho Balaam eth yn-rag gans pennsevigyon Balak.

36Pan glewas Balak bos Balaam devedhys, ev eth yn-mes dhe vetya ganso bys yn sita Moab,22:36 bys yn sita Moab: Po martesen b ys yn Ar a Moab; gwel Niverow 21:15, Dewteronomi 2:9, 18; Ysay 15:1. war or Arnon, yn penn pella an or. 37Ha Balak a leveris dhe Balaam, ‘A ny dhannvenis dhis dhe'th elwel? Prag ny dheuthys dhymm? A ny allav yn hwir dha enora?’ 38Balaam a leveris dhe Balak, ‘Otta, my re dheuth dhis! A ny vydh dhymm galloes vyth dhe leverel neppyth a'm honan? An ger a worr Duw y'm ganow, henna y tal dhymm kewsel.’ 39Ena Balaam eth gans Balak, hag i a dheuth dhe Kiryath-husoth. 40Ha Balak a offrynnas oghen ha deves, ha dannvon rann dhe Balaam ha dhe'n bennsevigyon esa ganso.

41Ha'n vorow Balak a gemmeras Balaam ha'y dhri yn-bann dhe Bamoth-baal; hag alena ev a welas an rann ogassa a'n bobel.22:41 an rann ogassa a'n bobel: Henn yw an rann a gamp an Ysraelysi esa yn Plenys Moab, a gledh dhe'n Mor Marow, a veu hewel dhiworth penn an menydh may feu Bamoth-baal warnodho.