Gordhyans Baal-peor

1Hag Ysrael ow triga yn Shittim, an bobel a dhallathas horya gans mowesi Moab. 2An re ma a elwis an bobel dhe sakrifisow aga duwow, ha'n bobel a dhybris, hag omblegya dh'aga duwow. 3Ytho Ysrael a lenas dhe Baal-peor. Ha sorr an Arloedh a dhewis erbynn Ysrael; 4ha'n Arloedh a leveris dhe Moyses, ‘Kemmer oll pennow an bobel, ha'ga kregi y'n howl a-rag an Arloedh, may treyllyo sorr fers an Arloedh dhiworth Ysrael.’ 5Ha Moyses a leveris dhe vreusysi Ysrael, ‘Peub ahanowgh gwra ladha y wer re omyewas dhe Baal-peor.’

6Hag otta, onan a vebyon Ysrael a dheuth hag a dhros Midyanyades dh'y vreder yn golok Moyses hag yn golok an kuntelles oll a vebyon Ysrael, hag i owth oela orth daras tylda an kuntelles. 7Pan y'n gwelas Finehas mab Eleazar, mab Aron an oferyas, ev a sevis ha gasa an kuntelles, ha kemmeres guw yn y dhorn 8ha mos war-lergh an gour a Ysrael y'n tylda, ha gwana aga dew, an gour a Ysrael ha'n venyn, dre hy horf. Yndellma an pla a veu astelys a-dhiworth mebyon Ysrael. 9Byttegyns an re a verwis der an pla o peswar mil warn ugens.

10Ha'n Arloedh a leveris dhe Moyses, 11‘Finehas mab Eleazar, mab Aron an oferyas, re dhastreylyas ow sorr a-dhiworth mebyon Ysrael, rag y vos avius, avel gans ow avi vy, yn aga mysk. Ytho ny dhistruis mebyon Ysrael y'm avi. 12Ytho lavar, “Otta, y rov dhodho ow hevambos a gres; 13hag y fydh dhodho, ha dh'y dhiyskynnysi war y lergh, kevambos a oferyaseth bys vykken, drefenn y vos avius rag y Dhuw, ha gul daspren rag mebyon Ysrael.” ’

14Hanow an gour ledhys a Ysrael, a veu ledhys war-barth gans an Vidyanyades, o Zimri mab Salu, penn chi tasek an Simeonysi. 15Ha hanow an Vidyanyades a veu ledhys o Kozbi myrgh Sur, hag o penn chi tasek yn Midyan.

16Ha'n Arloedh a leveris dhe Moyses, 17‘Omsett erbynn an Midyanysi, ha'ga gweskel; 18rag i re'th arvedhas gans aga felder, ganso ma'th hussons yn mater Peor, hag yn mater Kozbi, myrgh penntern Midyan, aga hwoer, a veu ledhys yn dydh an pla drefenn Peor.’