An Offrynnow Pub-dydhyek

1An Arloedh a leveris dhe Moyses: 2Gorhemmynn dhe vebyon Ysrael, ha leverel dhedha: Ow offrynn, ow boes rag ow offrynnow leskys, ow sawer plegadow, gwaytyewgh profya dhymm yn y seson ewn. 3Ha ty a lever dhedha, Hemm yw offrynn dre dan hag a offrynnowgh dhe'n Arloedh: dew oen unn bloedh heb namm, dydh ha dydh, avel offrynn pub-dydhyek. 4An eyl oen ty a wra offrynna myttinweyth, ha'y gila ty a wra offrynna y'n gorthugher; 5ynwedh an degves rann a efa a vleus fin, rag offrynn greun, kemmyskys gans kwarter hin a oyl gweskys. 6Offrynn leskys pub-dydhyek yw, hag a veu ordenys yn menydh Sinay rag sawer plegadow, offrynn dre dan dhe'n Arloedh. 7Y offrynn diwes a vydh peswora rann a hin rag pub oen; y'n tyller sans ty a wra diveri offrynn diwes a dhiwes krev dhe'n Arloedh. 8An oen arall ty a wra offrynna gorthugherweyth; avel an offrynn greun y'n myttin, ha kepar ha'y offrynn diwes. Ty a'n offrynn avel offrynn dre dan, sawer plegadow dhe'n Arloedh.

Offrynn an Sabot

9Y'n sabot dew oen unn bloedh heb namm, ha diw dhegves rann a efa a vleus fin rag offrynn greun, kemmyskys gans oyl, ha'y offrynn diwes: 10hemm yw an offrynn leskys a bub sabot, ryb an offrynn leskys pub-dydhyek ha'y offrynn diwes.

An Offrynnow Misyek

11Yn dallethow agas misyow ty a wra offrynna offrynn leskys dhe'n Arloedh: dew darow yowynk, unn hordh, seyth oen unn bloedh heb namm; 12ynwedh teyr degves rann a efa a vleus fin rag offrynn greun, kemmyskys gans oyl, rag pub tarow; ha diw dhegves rann a vleus fin rag offrynn greun, kemmyskys gans oyl, rag an unn hordh; 13hag unn degves rann a efa a vleus fin kemmyskys gans oyl avel offrynn greun rag pub oen; rag offrynn leskys a sawer plegadow, offrynn dre dan dhe'n Arloedh. 14Aga offrynnow diwes a vydh hanter hin a win rag tarow, tressa rann a hin rag hordh, ha kwarter hin rag oen; hemm yw an offrynn leskys a bub mis dres misyow an vlydhen. 15Ynwedh unn bogh rag offrynn pegh dhe'n Arloedh; offrynnys vydh, ryb an offrynn leskys pub-dydhyek ha'y offrynn diwes.

Offrynnow yn Termyn an Pask

16Y'n peswardhegves dydh a'n kynsa mis yth yw pask an Arloedh. 17Hag yn pymthegves dydh an mis ma yth yw goel; seyth dydh bara heb goell a vydh dybrys. 18Y'n kynsa dydh y fydh kuntelles sans: ny wrewgh ober arvethys. 19Hwi a offrynn offrynn dre dan, offrynn leskys dhe'n Arloedh: dew darow yowynk, unn hordh, ha seyth oen unn bloedh; i a vydh dhywgh heb namm; 20ynwedh aga offrynn greun a vleus fin kemmyskys gans oyl; teyr degves rann a efa ty a offrynn rag tarow, ha diw dhegves rann rag hordh; 21Unn degves rann ty a offrynn rag peub a'n seyth oen; 22ynwedh unn bogh rag offrynn pegh, dhe wul prenedh ragowgh. 23Ty a wra offrynna an re ma, ryb offrynn leskys an myttin, hag yw rag offrynn leskys pub-dydhyek. 24Y'n keth vaner ty a wra offrynna pub dydh, dres seyth dydh, boes offrynn dre dan, sawer plegadow dhe'n Arloedh; offrynnys vydh ryb an offrynn leskys pub-dydhyek ha'y offrynn diwes. 25Hag y'n seythves dydh hwi a'gas bydh kuntelles sans: ny wrewgh ober arvethys.

Offrynnow yn Goel an Seythunyow

26Yn dydh an kynsa frut, pan offrynnowgh offrynn greun a reun nowydh dhe'n Arloedh dh'agas dy'goel a seythunyow, hwi a'gas bydh kuntelles sans; ny wrewgh ober arvethys, 27mes offrynnewgh offrynn leskys, sawer plegadow dhe'n Arloedh; dew darow yowynk, unn hordh, seyth oen unn bloedh; 28ynwedh aga offrynn greun a vleus fin kemmyskys gans oyl, teyr degves rann a efa rag pub tarow, diw dhegves rann rag unn hordh, 29unn degves rann rag peub a'n seyth oen; 30gans unn bogh, rag gul prenedh ragowgh. 31Ryb an offrynn leskys pub-dydhyek ha'y offrynn greun, hwi a's offrynn gans aga offrynnow diwes. I a vydh dhywgh heb namm.