Offrynnow yn Dy'goel an Hirgern

1Y'n kynsa dydh a'n seythves mis hwi a'gas bydh kuntelles sans; ny wrewgh ober arvethys. Dydh yw ragowgh dhe hwytha kern. 2Hwi a wra offrynna offrynn leskys, sawer plegadow dhe'n Arloedh; unn tarow yowynk, unn hordh, seyth oen unn bloedh heb namm, 3ha'ga offrynn greun a vleus fin kemmyskys gans oyl, teyr degves rann a efa rag an tarow, diw dhegves rann rag an hordh, 4hag unn degves rann rag peub a'n seyth oen; 5gans unn bogh rag offrynn pegh, rag gul prenedh ragowgh; 6ryb offrynn leskys an loer nowydh, ha'y offrynn greun, ha'n offrynn leskys pub-dydhyek, ha'y offrynn greun, ha'ga offrynnow diwes, herwydh an ordenans ragdha, sawer plegadow, offrynn dre dan dhe'n Arloedh.

Offrynnow yn Dy'goel an Dehwelyans

7Y'n degves dydh a'n seythves mis ma hwi a'gas bydh kuntelles sans, hag omjastia; ny wrewgh ober arvethys. 8Hwi a wra offrynna offrynn leskys dhe'n Arloedh, sawer plegadow: unn tarow yowynk, unn hordh, seyth oen unn bloedh; i a vydh dhywgh heb namm; 9ha'ga offrynn greun a vleus fin kemmyskys gans oyl, teyr degves rann a efa rag an tarow, diw dhegves rann rag an unn hordh, 10unn degves rann rag peub a'n seyth oen; 11ynwedh unn bogh rag offrynn pegh, ryb offrynn pegh an prenedh, ha'n offrynn leskys pub-dydhyek, ha'ga offrynnow diwes.

Offrynnow Goel an Skovvaow

12Y'n pymthegves dydh hwi a'gas bydh kuntelles sans; ny wrewgh ober arvethys, ha hwi a with goel dhe'n Arloedh seyth dydh. 13Hwi a wra offrynna offrynn leskys, offrynn dre dan, sawer plegadow dhe'n Arloedh, trydhek tarow yowynk, dew hordh, peswardhek oen unn bloedh; i a vydh heb namm, 14ha'ga offrynn greun a vleus fin kemmyskys gans oyl, teyr degves rann a efa rag peub a'n trydhek tarow, diw dhegves rann rag peub a'n dhew hordh, 15hag unn degves rann rag peub a'n peswardhek oen; 16ynwedh unn bogh rag offrynn pegh, ryb an offrynn leskys pub-dydhyek, y offrynn greun ha'y offrynn diwes.

17Y'n nessa dydh, dewdhek tarow yowynk, dew hordh, peswardhek oen unn bloedh heb namm, 18ha'ga offrynn greun ha'ga offrynnow diwes rag an terewi, rag an hordhes ha rag an eyn, war-lergh aga niver, herwydh an ordenans; 19ynwedh unn bogh rag offrynn pegh, ryb an offrynn leskys pub-dydhyek, ha'y offrynn greun, ha'ga offrynnow diwes.

20Y'n tressa dydh unnek tarow, dew hordh, peswardhek oen unn bloedh heb namm, 21ha'ga offrynn greun ha'ga offrynnow diwes rag an terewi, rag an hordhes ha rag an eyn, war-lergh an niver, herwydh an ordenans; 22ynwedh unn bogh rag offrynn pegh, ryb an offrynn leskys pub-dydhyek, ha'y offrynn greun, ha'y offrynn diwes.

23Y'n peswora dydh deg tarow, dew hordh, peswardhek oen unn bloedh heb namm, 24aga offrynn greun ha'ga offrynnow diwes rag an terewi, rag an hordhes ha rag an eyn, war-lergh aga niver, herwydh an ordenans; 25ynwedh unn bogh rag offrynn pegh, ryb an offrynn leskys pub-dydhyek, ha'y offrynn greun, ha'y offrynn diwes.

26Y'n pympes dydh naw tarow, dew hordh, peswardhek oen unn bloedh heb namm, 27ha'ga offrynn greun ha'ga offrynnow diwes rag an terewi, rag an hordhes ha rag an eyn, war-lergh aga niver, herwydh an ordenans; 28ynwedh unn bogh rag offrynn pegh, ryb an offrynn leskys pub-dydhyek, ha'y offrynn greun, ha'y offrynn diwes.

29Y'n hweghves dydh eth tarow, dew hordh, peswardhek oen unn bloedh heb namm, 30ha'ga offrynn greun ha'ga offrynnow diwes rag an terewi, rag an hordhes ha rag an eyn, war-lergh aga niver, herwydh an ordenans; 31ynwedh unn bogh rag offrynn pegh, ryb an offrynn leskys pub-dydhyek, ha'y offrynn greun, ha'y offrynnow diwes.

32Y'n seythves dydh seyth tarow, dew hordh, peswardhek oen unn bloedh heb namm, 33ha'ga offrynn greun ha'ga offrynnow diwes rag an terewi, rag an hordhes ha rag an eyn, war-lergh aga niver, herwydh an ordenans; 34ynwedh unn bogh rag offrynn pegh, ryb an offrynn leskys pub-dydhyek, ha'y offrynn greun, ha'y offrynn diwes.

35Y'n ethves dydh hwi a'gas bydh kuntelles solem: ny wrewgh ober arvethys, 36Hwi a wra offrynna offrynn leskys, offrynn dre dan, sawer plegadow dhe'n Arloedh: unn tarow, unn hordh, seyth oen gorow unn bloedh heb namm, 37aga offrynn greun ha'ga offrynnow diwes rag an tarow, rag an hordh ha rag an eyn, war-lergh aga niver, herwydh an ordenans; 38ynwedh unn bogh rag offrynn pegh, ryb an offrynn leskys pub-dydhyek, ha'y offrynn greun, ha'y offrynn diwes.

39An re ma hwi a wra offrynna dhe'n Arloedh yn agas goelyow, keffrys ha'gas ambosow ha'gas offrynnow bolonjedhek, rag agas offrynnow leskys, ha rag agas offrynnow greun, ha rag agas offrynnow diwes, ha rag agas offrynnow kres.

40Ha Moyses a leveris dhe vebyon Ysrael pup-tra poran dell worhemmynnis an Arloedh dhe Moyses.29:40 yw niverys 30:1 y'n Ebrow, an Septuagint ha'n Vulgat.