Mebyon Aron

1An re ma yw henedhow Aron ha Moyses y'n termyn may kewsis an Arloedh gans Moyses war venydh Sinay. 2An re ma yw henwyn mebyon Aron: Nadab an kynsa-genys, hag Abihu, Eleazar, hag Ithamar; 3an re ma yw henwyn mebyon Aron, an oferysi untys, a ordenas dhe servya avel oferysi. 4Mes Nadab hag Abihu a verwis a-dherag an Arloedh pan offrynnsons tan astranj3:4 astranj: An styr yw ankler; martesen estren, po heb awtorita. a-dherag an Arloedh yn gwylvos Sinay; ha ny's tevo fleghes. Ytho Eleazar hag Ithamar a servyas avel oferysi gans Aron aga thas.

Deverow an Levysi

5Ha'n Arloedh a leveris dhe Moyses, 6Doro loeth Levi yn ogas, ha'ga gorra a-rag Aron an oferyas, may fenystro dhodho. 7I a with y dheverow ev ha deverow an kuntelles kowal a-rag tylda an kuntelles, dell venystrons dhe'n tabernakel; 8i a with daffar oll tylda an kuntelles, ha'n deverow rag mebyon Ysrael dell venystrons dhe'n tabernakel. 9Ha ty a re an Levysi dhe Aron ha'y vebyon; i yw res oll yn tien dhodho yn sur a-dhiworth mebyon Ysrael. 10Ha ty a wra charjya Aron ha'y vebyon dhe witha aga dever oferyasek; mes mar teffo neb estren yn ogas, ev a vydh gorrys dhe'n mernans.

11Ha'n Arloedh a leveris dhe Moyses, 12‘Otta, my re gemmeras an Levysi yn-mes a vebyon Ysrael yn le pub kynsa-genys a iger an brys yn mysk mebyon Ysrael. An Levysi a vydh dhymm, 13rag pub kynsa-genys yw dhymm; y'n jydh may ledhis pub kynsa-genys yn pow Ejyp, my a sakras dhymm ow honan pub kynsa-genys yn Ysrael, hag a vab-den hag a vest; i a vydh dhymm: my yw an Arloedh.’

Niveryans an Levysi

14Ha'n Arloedh a leveris dhe Moyses yn gwylvos Sinay, 15‘Gwra nivera mebyon Levi, herwydh chiow aga thasow, herwydh aga theyluyow; pub gorreydh a unn mis y oes ha moy ty a wra nivera.’ 16Ytho Moyses a's niveras herwydh ger an Arloedh, dell veu gorhemmynnys dhodho. 17Ha'n re ma o mebyon Levi herwydh aga henwyn: Gershon ha Kohath ha Merari. 18Ha'n re ma yw henwyn mebyon Gershon herwydh aga theyluyow: Libni ha Shimei. 19Ha mebyon Kohath herwydh aga theyluyow: Amram, Yshar, Hebron, hag Uzziel. 20Ha mebyon Merari herwydh aga theyluyow: Mahli ha Mushi. An re ma yw teyluyow an Levysi, herwydh chiow aga thasow.

21A Gershon y feu teylu an Libnysi ha teylu an Shimeysi; an re ma o teyluyow an Gershonysi. 22Aga niver herwydh niver pub gorreydh a unn mis y oes ha moy o seyth mil ha pymp kans. 23Teyluyow an Gershonysi a wra kampya a-dryv an tabernakel troha'n howlsedhes, 24gans Eliasaf mab Lael, avel penn chi tasek an Gershonysi. 25Ha charj mebyon Gershon yn tylda an kuntelles yw an tabernakel, an tylda ha'y gudhans, ha'n groglenn dhe dharas tylda an kuntelles, 26ha kroglennow an klos, ha kroglenn daras an klos usi a-dro dhe'n tabernakel ha'n alter, ha'y gerdyn, dh'y wonis oll.

27A Kohath y feu teylu an Amramysi, ha teylu an Ysharysi, ha teylu an Hebronysi, ha teylu an Uzzielysi; an re ma o teyluyow an Kohathysi. 28Aga niver herwydh niver pub gorreydh a unn mis y oes ha moy o eth mil ha hwegh kans, ow kwitha deverow an sentri. 29Teyluyow mebyon Kohath a wra kampya a'n dhyghowbarth dhe'n tabernakel, 30gans Elisafan mab Uzziel avel penn chi tasek teyluyow an Kohathysi. 31Ha'ga charj yw an argh, an voes, an kantoler, an alteryow, lestri an sentri dredha may fenystro an oferysi, ha'n groglenn, dh'y wonis oll. 32Hag Eleazar mab Aron an oferyas yw penn war hembrenkysi an Levysi; ev a worwel an re a attend deverow an sentri.

33A Merari y feu teylu an Mahlysi ha teylu an Mushysi: an re ma yw teyluyow an Merarysi. 34Aga niver herwydh niver pub gorreydh a unn mis y oes ha moy o hwegh mil ha dew kans. 35Ha penn chi tasek teyluyow an Merarysi o Suriel mab Abihayl; i yw dhe gampya a'n gledhbarth dhe'n tabernakel. 36Ha'n charj apoyntys dhe vebyon Merari yw framyow an tabernakel, an barrys, an kolovenyow, an selyow, hag oll aga daffar, dh'y wonis oll; 37ynwedh kolovenyow an klos a-dro, ha'ga selyow ha'ga ebilyer ha'ga herdyn.

38Ha'n re ow kampya a-rag an tabernakel dhe'n est, a-rag tylda an kuntelles war-tu ha'n howldrehevel, yw Moyses hag Aron ha'y vebyon, neb a with deverow an sentri, pypynag a dal bos gwrys rag mebyon Ysrael; ha mar teffo estren yn ogas, ev a vydh gorrys dhe'n mernans. 39Oll a veu niverys a'n Levysi, a wrug Moyses hag Aron aga nivera orth gorhemmynna an Arloedh, herwydh aga theyluyow, pub gorreydh a unn mis y oes ha moy, o dew vil warn ugens.

Daspren an Re Gynsa-genys

40Ha'n Arloedh a leveris dhe Moyses, ‘Kemmer niveryans a bub gorreydh kynsa-genys a vebyon Ysrael, a unn mis y oes ha moy, ow kemmeres aga niver herwydh aga henwyn. 41Ha ty a gemmer an Levysi ragov – my yw an Arloedh – yn le pub kynsa-genys yn mysk mebyon Ysrael, ha chatel an Levysi yn le oll an chatel kynsa-genys a vebyon Ysrael.’ 42Ytho Moyses a niveras pub kynsa-genys yn mysk mebyon Ysrael, dell worhemmynnis an Arloedh dhodho. 43Ha pub kynsa-genys gorow, herwydh niver an henwyn a unn mis aga oes ha moy dell veu niverys, o dew vil warn ugens, dew kans ha trydhek ha tri-ugens.

44Ha'n Arloedh a leveris dhe Moyses, 45‘Kemmer an Levysi yn le pub kynsa-genys yn mysk mebyon Ysrael, ha chatel an Levysi yn le aga chatel; ha'n Levysi a vydh dhymm: my yw an Arloedh. 46Ha rag daspren an dhew kans ha trydhek ha tri-ugens a'n re gynsa-genys a vebyon Ysrael, yw moy aga niver es an Levysi, 47ty a gemmer pymp shekel pub huni, ow rekna herwydh shekel an sentri (an shekel ma yw ugens gera), 48ha ri an arghans dhe Aron ha'y vebyon rag daspren an re a vo aga niver moy ages niver an Levysi.’ 49Ytho Moyses a gemmeras arghans an daspren a-dhiworth an re o moy aga niver ages an re dasprenys gans an Levysi; 50a-dhiworth an re gynsa-genys a vebyon Ysrael ev a gemmeras an arghans, mil shekel trihans ha pymp ha tri-ugens, reknys war-lergh shekel an sentri; 51ha Moyses a ros arghans an daspren dhe Aron ha'y vebyon, herwydh ger an Arloedh, dell worhemmynnis an Arloedh dhe Moyses.