Bresel erbynn Midyan

1An Arloedh a leveris dhe Moyses, 2‘Diell mebyon Ysrael war an Midyanysi; a-wosa ty a vydh kuntellys dhe'th pobel.’ 3Ha Moyses a leveris dhe'n bobel, ‘Ervewgh gwer ahanowgh rag an vresel, mayth ellons erbynn Midyan, dhe gowlwul dial an Arloedh war Midyan. 4Hwi a wra dannvon mil a bub loeth a Ysrael dhe'n vresel.’ 5Ytho proviys veu, yn-mes a'n milyow a Ysrael, mil a bub loeth, dewdhek mil ervys rag bresel. 6Ha Moyses a's dannvonas dhe'n vresel, mil a bub loeth, war-barth gans Finehas mab Eleazar an oferyas, gans lestri an sentri ha'n hirgern rag gwarnyans yn y dhorn. 7I a werryas erbynn Midyan, dell worhemmynnis an Arloedh dhe Moyses, hag i a ladhas pub gorreydh. 8I a ladhas myghternedh Midyan, gans an re erell anedha a veu ledhys – Evi, Rekem, Sur, Hur, ha Reba, an pymp myghtern a Midyan; hag ynwedh i a ladhas Balaam mab Beor gans an kledha. 9Ha mebyon Ysrael a gemmeras benynes Midyan yn kethneth ha'ga re vyghan; hag i a gemmeras yn preydh oll aga gwarthek, aga greow, hag oll aga gwara. 10Oll aga sitys y'n tylleryow mayth esens trigys, hag oll aga hampow, i a loskas gans tan, 11ha kemmeres oll an preydh ha'n pyth a veu pyllys, hag a dhen hag a vest. 12Ena i a dhros an gethyon ha'n pyth a veu pyllys ha'n preydh dhe Moyses, ha dhe Eleazar an oferyas, ha dhe guntelles mebyon Ysrael, dhe'n kamp yn plenys Moab ryb Yordan a-dal Yeriko.

13Moyses, hag Eleazar an oferyas, ha hembrenkysi oll an kuntelles, eth yn-rag dhe vetya gansa yn-mes a'n kamp. 14Ha Moyses o serrys orth soedhogyon an lu, kaptenyon milyow ha kaptenyon kansow, re dhothya a servis y'n vresel. 15Ha Moyses a leveris dhedha, ‘A essowgh oll an benynes dhe vewa? 16Otta, an re ma a wrug dhe vebyon Ysrael, dre gusul Balaam, omdhegi yn tislel erbynn an Arloedh yn negys Peor, hag y teuth an pla yn mysk kuntelles an Arloedh. 17Lemmyn ytho, ledhewgh pub gorreydh yn mysk an re vyghan, ha ledhewgh pub benyn re aswonnis gour dre goska ganso. 18Mes oll an mowesi yowynk na aswonnis gour dre goska ganso, gwithewgh yn few dh'agas honan. 19Kampyewgh yn-mes a'n kamp seyth dydh; pubonan re ladhas den ha pubonan re dochyas den ledhys, omlanhewgh y'n tressa dydh hag y'n seythves dydh, hwi ha'gas kethyon. 20Hwi a wra purhe pub dillasenn, pup-tra a groghen, pub gweyth a vlew gaver, pup-tra a brenn.’

21Hag Eleazar an oferyas a leveris dhe'n wer a vresel galsa dhe'n vatel: ‘Hemm yw ordenans an lagha re worhemmynnis an Arloedh dhe Moyses: 22Mes an owr, an arghans, an brons, an horn, an sten, ha'n plomm, 23pup-tra a yll sevel erbynn an tan, hwi a wra passya der an tan, hag y fydh glan. Byttegyns y fydh purhes ynwedh gans an dowr a lanheans; ha pyth pynag na yll sevel erbynn an tan, hwi a wra passya dre dhowr. 24Res yw dhywgh golghi agas dillas y'n seythves dydh, ha hwi a vydh glan; hag a-wosa hwi a wra dos a-ji dhe'n kamp.’

Ranna an Gethyon ha'n Preydh

25An Arloedh a leveris dhe Moyses, 26‘Gwra rekna an pyth a veu pyllys, hag a dhen hag a vest, ty hag Eleazar an oferyas ha pennow chiow tasow an kuntelles; 27ha ranna an pyth a veu pyllys yn diw rann, ynter an vreselyoryon neb a gemmeras rann y'n vresel – neb eth y'n vatel, ha'n kuntelles oll. 28Ha gwra tolli rag an Arloedh trubyt a-dhiworth an wer a vresel neb eth yn batel, onan yn-mes a bymp kans, a'n dus ha'n oghen ha'n asenes ha'n deves; 29kemmer e a'ga hanter, ha'y ri dhe Eleazar an oferyas avel offrynn dhe'n Arloedh. 30Hag a-dhiworth an hanter a vebyon Ysrael ty a gemmer onan tennys yn-mes a bub hanter-kans, a'n dus ha'n oghen ha'n asenes ha'n deves, a'n gwarthek oll, ha'ga ri dhe'n Levysi a's teves charj a dabernakel an Arloedh.’ 31Ha Moyses hag Eleazar a wrug dell worhemmynnis an Arloedh dhe Moyses.

32Lemmyn an taklow pyllys gesys a'n preydh a gemmeras an wer a vresel o: hwegh kans ha pymthek ha tri-ugens mil dhavas, 33dewdhek ha tri-ugens mil warthek, 34onan ha tri-ugens mil asen, 35ha dewdhek warn ugens mil dhen a'n benynes na aswonnsa gour dre goska ganso. 36Ha'n hanter, an rann a'n re neb eth dhe vresel, o yn niver tri hans mil ha seytek warn ugens, pymp kans davas, 37ha trubyt deves an Arloedh o hwegh kans ha pymthek ha tri-ugens. 38An gwarthek o hwetek mil warn ugens, hag anedha trubyt an Arloedh o dewdhek ha tri-ugens. 39An asenes o deg mil warn ugens ha pymp kans, hag anedha trubyt an Arloedh o onan ha tri-ugens. 40An dus o hwetek mil, hag anedha trubyt an Arloedh o dewdhek den warn ugens. 41Ha Moyses a ros an trubyt, hag o offrynn drehevys an Arloedh, dhe Eleazar an oferyas, dell worhemmynnis an Arloedh dhe Moyses.

42A-dhiworth an hanter rann dhe vebyon Ysrael, hag a veu rynnys gans Moyses dhiworth an pyth esa dhe'n wer galsa dhe vresel – 43lemmyn an hanter dhe'n kuntelles o trihans mil ha seytek warn ugens, pymp kans davas, 44hwetek warn ugens mil warthek, 45ha deg war ugens mil, pymp kans asen, 46ha hwetek mil dhen – 47a-dhiworth an hanter dhe vebyon Ysrael Moyses a gemmeras onan yn pub hanter-kans, hag a dus hag a vestes, ha'ga ri dhe'n Levysi a's tevo charj a dabernakel an Arloedh; dell worhemmynnis an Arloedh dhe Moyses.

48Ena an soedhogyon esa a-ugh an milyow a'n lu, kaptenyon milyow ha kaptenyon kansow, a dheuth nes dhe Moyses, 49ha leverel dhe Moyses, ‘Dha servysi re niveras an wer a vresel usi yn-dann agan galloes, ha ny fyll gour vyth a-dhiworthyn. 50Ha ni re dhros offrynn an Arloedh, an pyth a gavas pub gour, taklow yn owr, breghwisk ha breghelligow, bysowyer sel, skinennow, ha paderennow, dhe wul prenedh ragon a-rag an Arloedh.’ 51Ha Moyses hag Eleazar an oferyas a dhegemmeras anedha an owr, pup-tra wonedhys. 52Hag oll an owr a'n offrynn drehevys a offrynnsons dhe'n Arloedh, a-dhiworth kaptenyon milyow ha kaptenyon kansow, o hwetek mil, seyth kans ha hanter-kans shekel. 53(Gwer an vresel re gemmersa preydh, pub gour ragdho ev y honan.) 54Ha Moyses hag Eleazar an oferyas a gemmeras an owr a-dhiworth kaptenyon milyow ha kansow ha'y dhri a-ji dhe dylda an kuntelles, avel kovheans rag mebyon Ysrael a-rag an Arloedh.