Gad ha Rewben dhe Driga a'n Est dhe Yordan

1Lemmyn mebyon Rewben ha mebyon Gad a's tevo routh veur a warthek; hag i a welas pow Yazer ha pow Gilead, hag otta, an tyller o tyller rag gwarthek. 2Ytho mebyon Gad ha mebyon Rewben a dheuth ha leverel dhe Moyses ha dhe Eleazar an oferyas ha dhe hembrenkysi an kuntelles, 3‘Ataroth, Dibon, Yazer, Nimra, Heshbon, Eleale, Sebam, Nebo, ha Beon, 4an tir a wrug an Arloedh y weskel a-rag kuntelles Ysrael, yw tir rag gwarthek; ha'th servysi a's teves gwarthek.’ 5Hag i a leveris, ‘Mar kevsyn gras y'th wolok, bedhes res an tir ma dhe'th servysi rag perghennogeth; na'gan kemmer a-dreus dhe'n Yordan.’

6Mes Moyses a leveris dhe vebyon Gad ha dhe vebyon Rewben, ‘A wra dha vreder mos dhe vresel, ha hwi esedhys omma? 7Prag y tigennerthowgh kolonn mebyon Ysrael a dreusi dhe'n tir a ros an Arloedh dhedha? 8Yndella y hwrug agas tasow, pan y's dannvenis a Kadesh-barnea dhe weles an tir. 9Rag pan yskynnsons dhe nans Eshkol, ha gweles an tir, i a dhigennerthas kolonn mebyon Ysrael a vones y'n tir re rosa an Arloedh dhedha. 10Ha sorr an Arloedh a veu enowys y'n jydh na, hag ev a dos, ow leverel, 11“Yn sur denvyth a dheuth yn-bann yn-mes a Ejyp, a ugens bloedh ha moy, ny wra gweles an tir a des y ri dhe Abraham, dhe Ysak, ha dhe Yakob, drefenn na'm holsons yn tien; 12nagonan marnas Kaleb mab Yefunne an Kenizzyas ha Yoshua mab Nun, rag i re holyas yn tien an Arloedh.” 13Ha sorr an Arloedh a dhewis erbynn Ysrael, hag ev a wrug dhedha gwandra y'n gwylvos dew-ugens blydhen, bys pan veu gorfennys oll an henedh re wrussa drog yn golok an Arloedh. 14Hag otta, hwi re sevis yn le agas tasow, bagas a beghadoryon, dhe gressya hwath moy sorr fers an Arloedh erbynn Ysrael. 15Rag mar treylyowgh dhe-ves a'y holya, ev a wra aga gasa y'n gwylvos; ha hwi a wra distrui oll an bobel ma.’

16Ena i a dheuth nes dhodho, ha leverel, ‘Ni a dhrehav korlannow deves rag agan greow, ha sitys rag agan re vyghan, 17mes ni a gemmer arvow, parys dhe vos a-rag mebyon Ysrael rag aga hembronk, bys pan wrussyn aga dri dh'aga thyller; ha'gan re vyghan a wra triga y'n sitys kerys rag own a annedhysi an tir. 18Ny wren dehweles dh'agan chiow bys pan wra mebyon Ysrael erita peub y eretons. 19Rag ny wren erita gansa a'n tu arall dhe'n Yordan ha pella es henna; drefenn agan eretons re dheuth dhyn a'n tu ma dhe'n Yordan, troha'n est.’ 20Ytho Moyses a leveris dhedha, ‘Mar kwrewgh hemma, mar kemmerowgh arvow ha mos a-rag an Arloedh rag an vresel, 21ha pub gour ervys ahanowgh a wra tremena dres an Yordan a-dherag an Arloedh, erna vo y eskerens herdhys yn-mes a-dheragdho 22ha'n tir bos fethys a-dherag an Arloedh; a-wosa, hwi a wra dehweles ha bos heb blam a-rag an Arloedh hag a-rag Ysrael; ha'n tir ma a vydh agas perghennogeth a-dherag an Arloedh. 23Mes mar ny wrewgh yndellma, otta, hwi re beghas erbynn an Arloedh; ha bedhewgh sur, agas pegh a wra agas diskevra. 24Drehevewgh sitys dh'agas re vyghan, ha korlannow dh'agas deves, ha gwrewgh an pyth re dhedhewsowgh.’ 25Ha mebyon Gad ha mebyon Rewben a leveris dhe Moyses, ‘Dha servysi a wra dell worhemmynn ow arloedh. 26Agan re vyghan, agan gwragedh, agan greow, ha'gan gwarthek oll, a vydh ena yn sitys Gilead; 27mes dha servysi a wra tremena a-dreus, pubonan ervys rag bresel, dhe werrya a-dherag an Arloedh, dell worhemmynn ow arloedh.’

28Ytho Moyses a ros gorhemmynn a-dro dhedha dhe Eleazar an oferyas, ha dhe Yoshua mab Nun, ha dhe bennow teyluyow loethow mebyon Ysrael. 29Ha Moyses a leveris dhedha, ‘Mebyon Gad ha mebyon Rewben, pubonan ervys rag vresel a-dherag an Arloedh, mar tremenons genowgh dres an Yordan ha'n tir fethys a-ragowgh, ena hwi a re dhedha pow Gilead avel perghennogeth; 30mes mar ny wrons i tremena ervys genowgh, i a's tevydh perghennogeth yntredhowgh yn pow Kanan.’ 31Ha mebyon Gad ha mebyon Rewben a worthybis, ‘Dell leveris an Arloedh dhe'th servysi, yndella ni a wra. 32Ni a wra tremena ervys a-rag an Arloedh yn pow Kanan, ha ni a with perghennogeth agan eretons a'n tu arall dhe'n Yordan.’

33Ha Moyses a ros dhedha, dhe vebyon Gad ha dhe vebyon Rewben ha dhe'n hanter-loeth Manasse mab Yosep, gwlaskor Sihon myghtern an Amorysi ha gwlaskor Og myghtern Bashan, an tir ha'y sitys, gans tiredh an sitys y'n kyrghynn. 34Ha mebyon Gad a dhrehevis Dibon, Ataroth, Aroer, 35Atroth, Shofan, Yazer, Yogbeha, 36Beth-nimra ha Beth-haran, sitys kerys ha korlannow rag deves. 37Ha mebyon Rewben a dhrehevis Heshbon, Eleale, Kiryathaym, 38Nebo, ha Baal-meon (aga henwyn dhe vos chanjys), ha Sibma; hag i a ros henwyn erell dhe'n sitys a dhrehevsons. 39Ha mebyon Makir mab Manasse eth dhe Gilead ha'y hemmeres, ha fesya an Amorysi esa ynni. 40Ha Moyses a ros Gilead dhe Makir mab Manasse, hag ev a drigas ynni. 41Ha Yair mab Manasse eth ha kemmeres aga gwigow, ha'ga henwel Havvoth-yair. 42Ha Noba eth ha kemmeres Kenath ha'y gwigow, ha'y henwel Noba, war-lergh y hanow y honan.