Oryon Kanan

1An Arloedh a leveris dhe Moyses: 2Gorhemmynn dhe vebyon Ysrael, ha leverel dhedha: Pan dhewgh dhe bow Kanan (hemm yw an tir hag a goedh dhywgh avel eretons, pow Kanan gans y oryon), 3agas tenewen dyghow a vydh a-dhiworth gwylvos Sin, ryb amal Edom; hag y'n est, agas or dhyghow a vydh dhiworth penn Mor an Hoelan; 4ha'gas or a wra treylya dhiworth an dhyghowbarth bys yn bolgh Akrabbim, ha treusi dhe Sin, ha'y benn a vydh a'n dhyghowbarth dhe Kadesh-barnea; ena y hwra mos yn-rag dhe Hasar-addar, ha tremena bys yn Asmon; 5ha'n or a wra treylya a-dhiworth Asmon dhe wover Ejyp, ha'y benn a vydh orth an mor.

6Dhe or an howlsedhes, hwi a'gas bydh an Mor Bras ha'y arvor; homma a vydh agas or a'n howlsedhes.

7Homma a vydh agas or a'n gogledh: a'n Mor Meur hwi a wra merkya agas linenn dhe venydh Hor; 8a-dhiworth menydh Hor hwi a's merk bys yn Lebo-hamath, ha Sedad a vydh penn an or; 9ena an or a ystynn dhe Zifron ha'y benn a vydh Hasar-enan; hemma a vydh agas or y'n gogledh.

10Hwi a wra merkya agas or a'n howldrevel a-dhiworth Hasar-enan dhe Shefam; 11ha'n or a wra diyskynna a-dhiworth Shefan dhe Ribla a'n barth est dhe Ain; ha'n or a wra diyskynna, ha drehedhes skoedh mor Kinnereth a'n est; 12ha'n or a wra diyskynna dhe'n Yordan, ha'y dhiwedh a vydh Mor an Hoelan. Hemma a vydh agas tir ha'y oryon oll a-dro.

13Moyses a worhemmynnis dhe vebyon Ysrael, ow leverel: Hemm yw an tir a heryowgh gans tewlel prenn, re worhemmynnis an Arloedh dhe ri dhe'n naw loeth ha dhe'n hanter-loeth; 14rag loeth mebyon Rewben herwydh chiow tasow, ha loeth mebyon Gad herwydh chiow aga thasow, re dhegemmeras aga eretons; hag ynwedh hanter-loeth Manasse re dhegemmeras aga eretons; 15an dhew loeth ha'n hanter-loeth a dhegemmeras aga eretons a'n tu arall dhe Yordan a'n est dhe Yeriko, war-tu ha'n howldrehevel.

An Hembrenkysi rag Ranna an Tir yn Kanan

16An Arloedh a leveris dhe Moyses: 17An re ma yw henwyn an wer a wra ranna an tir rag agas eretons: Eleazar an oferyas ha Yoshua mab Nun. 18Ty a wra kemmeres unn hembrenkyas a bub loeth, dhe ranna an tir rag eretons. 19An re ma yw henwyn an wer: a loeth Yuda, Kaleb mab Yefunne. 20A loeth mebyon Simeon, Shemuel mab Ammihud. 21A loeth Benyamin, Elidad mab Kislon. 22A loeth mebyon Dan, hembrenkyas, Bukki mab Yogli. 23A vebyon Yosep: a loeth mebyon Manasse, hembrenkyas, Hanniel mab Efod. 24A loeth mebyon Efraym, hembrenkyas, Kemuel mab Shiftan. 25A loeth mebyon Zebulun, hembrenkyas, Elisafan mab Parnak. 26A loeth mebyon Yssakar, hembrenkyas, Paltiel mab Azzan. 27Hag a loeth mebyon Asher, hembrenkyas, Ahihud mab Shelomi. 28A loeth mebyon Naftali, hembrenkyas, Pedahel mab Ammihud. 29An re ma yw an wer a worhemmynnis an Arloedh dhedha ranna eretons rag mebyon Ysrael yn pow Kanan.