Eretons ha Demmedhyans Myrghes Selofehad

1Pennow teyluyow mebyon Gilead mab Makir, mab Manasse, a-dhiworth chiow tasow mebyon Yosep, a dheuth nes ha kewsel a-rag Moyses hag a-rag an hembrenkysi, pennow chiow tasow mebyon Ysrael. 2I a leveris, ‘An Arloedh a worhemmynnis dhe'm arloedh may rollens tir avel eretons gans tewlel prenn dhe vebyon Ysrael; hag ow arloedh a veu gorhemmynnys gans an Arloedh dhe ri eretons Selofehad agan broder dh'y vyrghes. 3Mes mars yns demmedhys dhe vebyon bynag a loethow erell a vebyon Ysrael ena aga eretons a vydh kemmerys a-dhiworth eretons agan tasow, ha keworrys dhe eretons an loeth mayth esons ynno; ytho y fydh kemmerys dhe-ves a-dhiworth myns agan eretons. 4Ha pan dheu yubile mebyon Ysrael, ena aga eretons a vydh keworrys dhe eretons an loeth mayth esons ynno; ha'ga eretons a vydh kemmerys a-dhiworth eretons loeth agan tasow.’

5Ha Moyses a worhemmynnis dhe vebyon Ysrael war-lergh ger an Arloedh, ow leverel, ‘Loeth mebyon Yosep re leveris yn ewn. 6Hemm yw an pyth a worhemmynn an Arloedh a-dro dhe vyrghes Selofehad, “Gas i dhe dhemmedhi gans an re a dybons bos an gwella; marnas i a wra demmedhi a-ji dhe deylu loeth aga thas. 7Yndella ny vydh eretons mebyon Ysrael treusworrys a'n eyl loeth dh'y gila; rag pubonan a vebyon Ysrael a wra glena orth eretons loeth y dasow. 8Ha pub myrgh a bew eretons yn loeth pynag a vebyon Ysrael a vydh gwreg dhe onan a'n teylu a loeth hy thas, may pewo pubonan yn mysk mebyon Ysrael eretons y thasow. 9Ytho ny vydh eretons vyth treusworrys a'n eyl loeth dh'y gila; rag pubonan a loethow mebyon Ysrael a wra glena orth y eretons y honan.” ’

10Kepar dell worhemmynnis an Arloedh dhe Moyses, yndella y hwrug myrghes Selofehad; 11rag Mahla, Tirsa, Hogla, Milka, ha Noa, myrghes Selofehad, a veu demmedhys dhe vebyon breder aga thas. 12I a veu demmedhys yn teyluyow mebyon Manasse mab Yosep, ha'ga eretons a wortas yn loeth teylu aga thas.

13An re ma yw an gorhemmynnow ha'n breusow a worhemmynnis an Arloedh dre leuv Moyses dhe vebyon Ysrael yn plenys Moab ryb Yordan a-dal Yeriko.