An Kohathysi

1An Arloedh a leveris dhe Moyses ha dhe Aron, 2‘Kemmer niveryans mebyon Kohath a-dhiworth mebyon Levi, herwydh aga theyluyow ha chiow aga thasow, 3a dheg bloedh warn ugens dhe dheg bloedh ha dew-ugens, peub a yll entra servis an lu, dhe wul an ober yn tylda an kuntelles. 4Hemm yw servis mebyon Kohath yn tylda an kuntelles: an taklow an moyha sans. 5Pan wra an kamp mos yn-rag, Aron ha'y vebyon a wra entra ha diswul vayl an groglenn, ha kudha argh an dustuni ganso; 6ena i a wra gorra warnedhi kudhans a greghyn morhoghes, ha lesa warnedhi kweth dhien a las, ha settya hy gwelynni. 7Ha war voes bara an wolok i a wra lesa kweth las ha gorra warnedhi an platyow, an skudellow, an bollow, an kostrels rag offrynn an diwes; ha'n bara usi ena pup-prys a vydh warnedhi. 8Ena i a wra lesa dresti pann kogh, ha kudha henna gans kudhans a greghyn morhoghes, ha settya hy gwelynni. 9Hag i a gemmer pann glas, ha kudha an kantoler rag an golow, gans y lugern, y evelyow, y badellow, ha'n lestri oll rag an oyl yw proviys dhodho: 10hag i a wra y worra gans oll y dhaffar yn kudhans a greghyn morhoghes ha'y worra war an framweyth degans. 11Ha war an alter owrek i a wra lesa pann glas, ha'y hudha gans kudhans a greghyn morhoghes, ha settya hy gwelynni. 12Hag i a wra kemmeres oll an lestri a'n servis hag yw devnydhys y'n sentri ha'ga gorra yn kweth las, ha'ga hudha gans kudhans a greghyn morhoghes, ha'ga gorra war an framweyth degans. 13Hag i a gemmer dhe-ves an lusu ha lesa kweth a burpur warnedhi; 14hag i a worr warnedhi oll an daffar yw devnydhys rag an servis ena, an padellow tan, an kigveryow, an reuvow, ha'n bollow, oll daffar an alter; hag i a wra lesa warnedhi kudhans a greghyn morhoghes, ha gorra ynni hy gwelynni. 15Ha pan vydh Aron ha'y vebyon gorfennys ow kudha an sentri hag oll daffar an sentri, dell dhalleth an kamp war an fordh, wosa henna mebyon Kohath a wra dos dhe dhoen an re ma, mes ny goedh dhedha tochya an taklow sans, ma na varwons. An re ma yw taklow tylda an kuntelles a vydh degys gans mebyon Kohath.

16‘Hag Eleazar mab Aron an oferyas a'n jevydh charj a'n oyl rag an golow, an ynkys hweg, an offrynn greun pub-dydhyek,4:16 pub-dydhyek: Ow siwya an Septuagint. Ebrow pup-prys. hag oyl an untyans, gans gorwel oll an tabernakel ha pup-tra eus ynno, an sentri ha'y lestri.’

17An Arloedh a leveris dhe Moyses hag Aron, 18‘Na as loeth teyluyow an Kohathysi dhe vos distruys yn mysk an Levysi; 19mes gwra aga dyghtya yndellma, may fewons, ha ma na varwons pan dhons ogas dhe'n taklow an moyha sans: Aron ha'y vebyon a wra mos ha'ga ordena peub dh'y oberenn ha dh'y vegh; 20mes nyns ons dhe vires war an taklow sans hwath rag pols, ma na varwons.’

An Gershonysi ha'n Merarysi

21An Arloedh a leveris dhe Moyses, 22‘Kemmer niveryans a vebyon Gershon ynwedh, herwydh chiow aga thasow ha'ga theyluyow; 23a dheg bloedh warn ugens aga oes bys yn deg ha dew-ugens bloedh, ty a wra aga nivera, peub a yll entra an servis, dhe wul an ober yn tylda an kuntelles. 24Hemm yw gonis teyluyow an Gershonysi, dhe servya ha dhe dhoen beghyow: 25i a wra doen kroglennow an tabernakel, ha tylda an kuntelles gans y gudhans, ha'n kudhans a greghyn morhoghes usi warnodho, ha'n groglenn rag porth tylda an kuntelles, 26ha kroglennow an klos, ha kroglenn daras yet an klos usi a-dro dhe'n sentri ha'n alter, ha'ga herdyn, ha pub daffar rag aga servis; hag i a wra pup-tra hag yw res dhe vos gwrys yn aga govis. 27Oll an servis a vebyon an Gershonysi war-lergh ger Aron ha'y vebyon, rag oll aga ober a dhegans, yn oll aga servis; ha ty a's charj gans oll aga ober a dhegans. 28Hemm yw servis teyluyow mebyon an Gershonysi yn tylda an kuntelles, ha'ga charj a vydh yn-dann leuv Ithamar mab Aron an oferyas.

29‘Ha mebyon Merari: ty a wra aga nivera herwydh aga theyluyow ha chiow aga thasow; 30a dheg bloedh warn ugens aga oes bys yn deg ha dew-ugens bloedh, ty a wra aga nivera, peub a yll entra an servis, dhe wul an ober yn tylda an kuntelles. 31Ha hemm yw an pyth mayth yns charjys dh'y dhoen, yn oll aga servis yn tylda an kuntelles: framyow an tabernakel, gans y varrys, y golovenyow ha selyow, 32ha kolovenyow an klos a-dro gans aga selyow, aga ebilyer ha'ga herdyn, gans oll aga daffar hag oll aga darbar; ha der aga henwyn ty a reken an taklow mayth yns charjys dh'aga doen. 33Hemm yw servis teyluyow mebyon Merari, yn oll aga servis yn tylda an kuntelles, yn-dann leuv Ithamar mab Aron an Oferyas.’

Niveryans an Levysi

34Ha Moyses hag Aron ha hembrenkysi an kuntelles a niveras mebyon an Kohathysi, herwydh aga theyluyow ha chiow aga thasow, 35a dheg bloedh warn ugens aga oes bys yn deg ha dew-ugens bloedh, peub a ylli entra an servis, dhe oberi yn tylda an kuntelles. 36Ha'ga niver herwydh aga theyluyow o dew vil seyth kans ha hanter-kans. 37Hemm o niver teyluyow an Kohathysi, oll an re esa ow servya yn tylda an kuntelles, a wrug Moyses hag Aron aga nivera herwydh gorhemmynna an Arloedh dre leuv Moyses.

38Niver mebyon Gershon, herwydh aga theyluyow ha chiow aga thasow, 39a dheg bloedh warn ugens aga oes bys yn deg ha dew-ugens bloedh, peub a yll entra an servis dhe oberi yn tylda an kuntelles: 40aga niver herwydh aga theyluyow ha chiow aga thasow o dew vil hwegh kans ha deg warn ugens. 41Hemm o niver teyluyow mebyon Gershon, oll an re esa ow servya yn tylda an kuntelles, a wrug Moyses hag Aron aga nivera herwydh gorhemmynna an Arloedh.

42Niver teyluyow mebyon Merari, herwydh aga theyluyow ha chiow aga thasow, 43a dheg bloedh warn ugens aga oes bys yn deg ha dew-ugens bloedh, peub a ylli entra an servis, rag ober yn tylda an kuntelles: 44aga niver herwydh aga theyluyow o tri mil ha dew kans. 45An re ma yw an re a veu niverys a deyluyow mebyon Merari, a wrug Moyses hag Aron aga nivera herwydh gorhemmynna an Arloedh dre leuv Moyses.

46Oll an re a veu niverys a'n Levysi, a wrug Moyses hag Aron ha hembrenkysi Ysrael aga nivera, herwydh aga theyluyow ha chiow aga thasow, 47a dheg bloedh warn ugens aga oes bys yn deg ha dew-ugens bloedh, peub a ylli entra yn ober an servis hag yn ober a dhoen beghyow yn tylda an kuntelles, 48an re anedha a veu niverys o eth mil pymp kans ha peswar-ugens. 49Herwydh gorhemmynna an Arloedh i a veu niverys dre leuv Moyses, peub dh'y oberenn a servya po a dhoen; yndellma i a veu niverys ganso, dell worhemmynnis an Arloedh dhe Moyses.