An Nazirysi

1Ha'n Arloedh a leveris dhe Moyses, 2Lavar dhe vebyon Ysrael, Pan gollenow gour po benyn ambos arbennik, ambos nazirek, dhe vos sakrys avel naziryas dhe'n Arloedh, 3ev a wra omwitha dhiworth gwin ha korev; ny wra eva aysel gwrys a win na aysel gwrys a gorev, na eva sugen gwinreun na dybri gwinreun kro po syghys. 4Dydhyow oll may fo naziryas ny wra dybri travyth yw askorrys gans an gwinbrenn, na hwath an has na'n rusk.

5Dydhyow oll y ambos nazirek ny wra altenn vyth dos war y benn; bys pan vydh kowlwrys an termyn may fo sakrys avel naziryas dhe'n Arloedh, ev a vydh sans; ev a wra gasa kudynnow y wols dhe devi hir.

6Dydhyow oll may fo sakrys avel naziryas dhe'n Arloedh ny wra mos ogas dhe gorf marow. 7Na rag y das, na rag y vamm, na rag y vroder na rag y hwoer, mar merwons, ny wra dh'y honan bos avlan; rag y sakrans dhe Dhuw a vydh war y benn. 8An dydhyow oll a'y sakrans ev a vydh sans dhe'n Arloedh.

9Ha mar merow den rybdho desempis, hag ev a dhefol y benn sakrys, ena ev a wra treghi gols y benn yn dydh y lanheans; y'n seythves dydh ev a dregh y wols. 10Y'n ethves dydh ev a dhre diw durenn po diw golomm yowynk dhe'n oferyas dhe dharas tylda an kuntelles, 11ha'n oferyas a wra profya an eyl rag offrynn pegh ha'y ben rag offrynn leskys, ha gul prenedh ragdho, rag ev a beghas dre reson an korf marow. Hag ev a wra sakra y benn an keth jydh na, 12ha bos naziryas dhe'n Arloedh rag dydhyow y sakrans, ha dri oen gorow a unn bloedh rag offrynn kammweyth; mes an termyn kyns a vydh mannhes, drefenn bos defolys y sakrans.

13Ha hemm yw an lagha rag an naziryas, pan vydh kowlwrys termyn y sakrans: ev a vydh dres dhe dharas tylda an kuntelles, 14hag ev a dhre y offrynn dhe'n Arloedh, unn oen gorow a unn bloedh heb namm rag offrynn leskys, hag unn oenes benow a unn bloedh heb namm avel offrynn pegh, hag unn hordh heb namm avel offrynn kres, 15ha kanstell a vara heb goell, tesennow rond a vleus fin kemmyskys gans oyl, ha tesennow tanow heb goell urys gans oyl, ha'ga offrynn greun ha'ga offrynnow diwes. 16Ha'n oferyas a wra aga dri a-rag an Arloedh ha gul y offrynn pegh ha'y offrynn leskys, 17hag ev a wra profya an hordh avel sakrifis offrynn kres dhe'n Arloedh gans y ganstell a vara heb goell; an oferyas a wra profya ynwedh y offrynn greun ha'y offrynn diwes. 18Ha'n naziryas a wra treghi gols y benn sakrys dhe dharas tylda an kuntelles, hag a wra kemmeres gols y benn sakrys ha'y worra war an tan usi yn-dann sakrifis an offrynn kres. 19Ha'n oferyas a wra kemmeres skoedh an hordh, pan vydh bryjys, hag unn desenn rond a vara heb goell a'n ganstell, hag unn desenn danow a vara heb goell, ha'ga gorra war dhiwdhorn an naziryas, wosa ev dhe dreghi gols y sakrans. 20Ha'n oferyas a wra aga gwevya rag offrynn gwevys a-rag an Arloedh; i yw rann sans dhe'n oferyas, war-barth gans an vronn a vydh gwevys ha'n vordhos a vydh drehevys; ha wosa henna an naziryas a yll eva gwin.

21Hemm yw an lagha rag an naziryas a wra an ambos. Y offrynn dhe'n Arloedh a vydh herwydh y ambos nazirek, war-barth gans an pyth may hyll kavoes an pygans ragdho; herwydh y ambos a wrello, yndella ev a wra herwydh an lagha rag y sakrans avel naziryas.

Bennath gans Aron ha'y Vebyon

22An Arloedh a leveris dhe Moyses: 23Lavar dhe Aron ha'y vebyon, Yndellma hwi a wra benniga mebyon Ysrael: hwi a lever dhedha,

24An Arloedh re'th vennikko ha'th witha:

25An Arloedh re wrello dh'y fas splanna warnas ha bos grassyes dhis:

26An Arloedh re dhrehaffo y fas warnas, ha ri dhis kres.

27Yndellma i a wra gorra ow hanow war vebyon Ysrael ha my a wra aga benniga.